ព័ត៌មានអន្ដរជាតិ

គណបក្សលោក Prawit រង្គោះរង្គើផ្ទៃក្នុងយ៉ាងខ្លាំង

បានផុស

៦ ខែ មុន

នៅ

ថ្ងៃអង្គារ ២០ សីហា ២០២៤

ដោយ

គណបក្ស Palang Pracharath Party (PPP) របស់លោកឧត្តមសេនីយ៍ Prawit Wongsuwan អតីតឧបនាយករដ្ឋមន្ត្រីនិងជារដ្ឋមន្ត្រីក្រសួងមហាផ្ទៃថៃ រងនូវភាពរង្គោះរង្គើរយ៉ាងខ្លាំងនៅថ្ងៃអង្គារនេះ បន្ទាប់ពីអគ្គលេខាធិការគណបក្សបានប្រកាសលាលែង និងក្រោយពេល២ថ្ងៃប៉ុណ្ណោះពេល លោក Prawit ប្រើហិង្សាលើអ្នកសារព័ត៌មានជាស្ត្រីនៅថ្ងៃបោះឆ្នោតជ្រើសរើសនាយករដ្ឋមន្ត្រីថ្មី។

លោក Prawit Wongsuwan ប្រធានគណបក្ស PPP។ រូបភាព snipping

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Thammanat Peompao នៅថ្ងៃអង្គារនេះ បានប្រកាសលាលែងពីតួនាទីជាអគ្គលេខាធិការគណបក្ស PPP និងត្រូវបានគេរាយការណ៍ថា ប្រុងទៅចូលរួមជាមួយគណបក្សថ្មី គឺគណបក្ស Kla Tham (Kla Dhamma) ដែលដឹកនាំដោយលោកស្រី Narumon Pinyosinwat ដែលទើបចាកចេញពីគណបក្ស Palang Pracharath នោះដែរ។។ នេះបើយោងតាមសារព័ត៌មាន Khaosod ដែលបានផុសលើបណ្តាញសង្គមរបស់ខ្លួន។

លោក Thammanat Peompao ដែលបច្ចុប្បន្នជារដ្ឋមន្ត្រីស្តីទីនៃក្រសួងកសិកម្ម និងសហករណ៍ បានប្រកាសលាលែងពីគណបក្សនេះនៅថ្ងៃអង្គារ បន្ទាប់ពីមានពាក្យចចាមរ៉ាមជុំវិញទំនាស់ជាមួយ ឧត្តមសេនីយ៍ Prawit Wongsuwan ដែលជាប្រធានគណបក្ស Palang Pracharath ជុំវិញការតែងតែងក្នុងគណៈរដ្ឋមន្ត្រីថ្មី។ ក្នុងពេលជាមួយគ្នានេះ មានសេចក្តីរាយការណ៍ថា សមាជិក១៨រូបផ្សេងទៀតនឹងលាឈប់ដូចគ្នាទៅតាមលោក Thammanat Peompao ទៅចូលរួមជាមួយគណបក្សថ្មី។

លោក Thamanat Peompao អគ្គលេខាធិការបក្សដែលប្រកាសលាលែង។ Khaosod

គណបក្ស Palang Pracharath ទទួលបានសមាជិកសភាចំនួន៤០ពីការបោះឆ្នោតសកលកាលពីឆ្នាំ២០២៣។

តាមសេចក្តីរាយការណ៍នោះ លោកឧត្តមសេនីយ៍ Prawit Wongsuwan បានបញ្ជាឱ្យសមាជិកសភាចំនួន២៥នាក់របស់គាត់បញ្ជាក់ឡើងវិញនូវភាពស្មោះត្រង់របស់ពួកគេចំពោះគណបក្ស PPP ហើយបានណែនាំពួកគេឱ្យស្នាក់នៅការិយាល័យគណបក្ស។

គណបក្ស Palang Pracharath ដឹកនាំដោយ ឧត្តមសេនីយ៍ Prawit Wongsuwan ដែលជាអ្នកគាំទ្រលោកឧត្តមសេនីយ៍ ប្រាយុធ ចាន់អូចា ក្នុងការធ្វើរដ្ឋប្រហារទម្លាក់រដ្ឋាភិបាលភិបាលរបស់លោកស្រី យីងឡាក់ ស៊ីណាវ៉ាត្រាកាលឆ្នាំ២០១៤ ហើយនៅក្នុងថ្ងៃបោះឆ្នោតសភាដើម្បីគាំទ្របេក្ខភាព លោកស្រី ផែថងថាន ស៊ីណាវ៉ាត្រា លោក Prawit Wongsuwan បានបង្ហាញកាយវិការហិង្សាដាក់អ្នកសារព័ត៌មានជាស្រ្តីក្នុងពេលដែលនាងស្ទាក់សួរសំណួរជុំវិញជំហរនយោបាយរបស់លោក៕

រ៉ាន់ រើយ