ព័ត៌មានអន្ដរជាតិ

UN ថា សំណង់អគារជាង៨០%នៅហ្គាហ្សាត្រូវបានបំផ្លិចបំផ្លាញ

បានផុស

១ ខែ មុន

នៅ

ថ្ងៃអង្គារ ២០ សីហា ២០២៤

ដោយ

Chheang

មន្ត្រីអង្គការសហប្រជាជាតិ (UN) បានប្រកាសថា សំណង់អគារជាង ៨០ភាគរយនៅតំបន់ហ្គាហ្សាស្ទ្រីបត្រូវបានបំផ្លាញ ដោយសារភ្លើងសង្គ្រាមរវាងក្រុមសកម្មប្រយុទ្ធហាម៉ាស និងប្រទេសអ៊ីស្រាអែល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងបទសម្ភាសន៍ជាមួយសារព័ត៌មាន Al Qahera កាលពីថ្ងៃទី១៩ខែសីហា លោក Abdallah Al-Dardari ជំនួយការអគ្គលេខាធិការអង្គការសហប្រជាជាតិ បានឲ្យដឹងថា ការខាតបង់ដោយសារសង្គ្រាមនៅហ្គាហ្សា មានតម្លៃប៉ាន់ស្មានចន្លោះពី ៥០ ទៅ ៦០ពាន់លានដុល្លារ។ យ៉ាងណា តួលេខពិតប្រាកដនឹងត្រូវដឹងច្បាស់ បន្ទាប់ពីសង្គ្រាមត្រូវបានបញ្ចប់ ដោយមានការស្ទង់មតិផ្នែកវិស្វកម្មលម្អិតដើម្បីវាយតម្លៃលើការបំផ្លិចបំផ្លាញ និងការកសាងឡើងវិញ។

បន្ថែមពីនេះ លោក Al-Dardari បានបញ្ជាក់ទៀតថា ក្នុងការបំផ្លិចបំផ្លាញ ក៏មានទាំងរចនាសម្ព័ន្ធដែលបង្កើតឡើងដោយអង្គការសហប្រជាជាតិផងដែរ ដែលមានតម្លៃខ្ទង់ ៥៥លានដុល្លារ។

លោក Al-Dardari បានបន្តថា បើប្រៀបធៀបនឹងគ្រោះមហន្តរាយផ្សេងៗ ស្ថានភាពនៅតំបន់ហ្គាហ្សាស្ទ្រីបគឺអាក្រក់ខ្លាំងជាងឆ្ងាយណាស់។

មន្ត្រីអង្គការសហប្រជាជាតិរូបនេះ បាននិយាយថា៖ «យើងមិនអាចរង់ចាំរហូតដល់ចប់ការប្រយុទ្ធ ដើម្បីចាប់ផ្តើមផ្តល់សេវាសំខាន់ៗដល់ប្រជាជនប៉ាឡេស្ទីននោះទេ… ក្រុមរបស់យើងបានឈរជើងនៅទីនោះស្រាប់ហើយ… យើងត្រៀមខ្លួនរួចជាស្រេចហើយមានវត្តមាននៅហ្គាហ្សា ដើម្បីធ្វើការលើវិស័យសុខាភិបាល ការអប់រំ លំនៅដ្ឋាន ថាមពល ទឹកស្អាត និងការគ្រប់គ្រងសំណល់រឹង»។

សូមបញ្ជាក់សាជាថ្មីម្ដងទៀតថា ក្រុមហាម៉ាសបានសម្លាប់មនុស្សប្រហែល ១២០០នាក់នៅក្នុងការវាយប្រហារលើអ៊ីស្រាអែលកាលពីថ្ងៃទី៧ខែតុលាឆ្នាំ២០២៣ ហើយបានចាប់មនុស្ស ២៥១នាក់ផ្សេងទៀតទៅកាន់ហ្គាហ្សាធ្វើជាចំណាប់ខ្មាំង។ ចំណែកឯការវាយសងសឹករបស់អ៊ីស្រាអែលនៅតំបន់ហ្គាហ្សា បានឆក់យកជីវិតមនុស្សមិនតិចជាង ៤ម៉ឺននាក់ ដែលភាគច្រើនជាស្ត្រី និងកុមារ ហើយជាង ៩ម៉ឺននាក់បានរងរបួស៕

ដោយ៖ ឈាង