ព័ត៌មានអន្ដរជាតិ

ត្រឹម១ខែ លោកស្រី ហារីស រកលុយចូលបក្សបាន ៥០០លានដុល្លារ

បានផុស

៤ ខែ មុន

នៅ

ថ្ងៃពុធ ២១ សីហា ២០២៤

ដោយ

Chheang

ចាប់តាំងពីក្លាយជាបេក្ខភាពប្រធានាធិបតីមក លោកស្រី កាម៉ាឡា ហារីស (Kamala Harris) រៃអង្គាសប្រាក់ចូលគណបក្សប្រជាធិបតេយ្យបានប្រហែល ៥០០លានដុល្លារ។ នេះបើយោងតាមការចុះផ្សាយរបស់ទីភ្នាក់ងារព័ត៌មាន Reuters នៅថ្ងៃទី២១ខែសីហា។

លោកស្រី កាម៉ាឡា ហារីស អនុប្រធានាធិបតីអាមេរិក (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី ហារីស បានក្លាយជាបេក្ខភាពប្រធានាធិបតីរបស់គណបក្សប្រជាធិបតេយ្យកាលពីថ្ងៃទី២១ខែកក្កដា ហើយការប្រមូលប្រាក់ចូលបក្សរបស់លោកស្រីបានបំបែកកំណត់ត្រាមិនធ្លាប់មាននាពេលកន្លងមក។ វាជាការឆ្លុះបញ្ចាំងពីសម្លេងគាំទ្រដ៏ច្រើនសន្ធឹកសម្រាប់លោកស្រីដើម្បីប្រកួតប្រជែងជាមួយលោក ដូណាល់ ត្រាំ (Donald Trump) ដែលជាបេក្ខភាពមកពីបក្សសាធារណរដ្ឋ ក្នុងការបោះឆ្នោតនាថ្ងៃទី៥ខែវិច្ឆិកាខាងមុខ។

សាច់ប្រាក់ដែលប្រមែប្រមូលបាន មានសារៈសំខាន់ណាស់សម្រាប់គណបក្សនយោបាយនៅអាមេរិក ដែលនឹងត្រូវយកទៅធ្វើយុទ្ធនាការឃោសនាបោះឆ្នោត និងការផ្សព្វផ្សាយនានាក្នុងគោលបំណងបញ្ចុះបញ្ចូលអ្នកបោះឆ្នោតឲ្យងាកមកគាំទ្រគណបក្សរបស់ខ្លួន។

ត្រឹម១សប្ដាហ៍ដំបូងប៉ុណ្ណោះ លោកស្រី ហារីស រៃអង្គាសប្រាក់បានចំនួន ២០០លានដុល្លារ ដែលជាហេតុនាំឲ្យលោកស្រីទទួលបានការគាំទ្រយ៉ាងឆាប់រហ័សដើម្បីក្លាយជាបេក្ខភាពរបស់គណបក្ស បន្ទាប់ពីលោក ចូ បៃដិន (Joe Biden) បោះបង់ឱកាសប្រជែងតំណែងប្រធានាធិបតីសម្រាប់អាណត្តិទី២របស់លោក ក្រោយធ្វើមិនបានល្អក្នុងការជជែកដេញដោលជាមួយលោក ត្រាំ កាលពីខែមិថុនាកន្លងទៅ។ បើបូកសរុបការរៃអង្គាសប្រាក់ទាំងលោកស្រី ហារីស និងលោក បៃដិន គណបក្សប្រជាធិបតេយ្យទទួលបានថវិកាចូលរួមពីអ្នកគាំទ្រច្រើនជាង១ពាន់លានដុល្លារ។

កាលពីឆ្នាំ២០២០ យុទ្ធនាការរបស់គណបក្សប្រជាធិបតេយ្យដែលកាលណោះមាន លោក បៃដិន ជាបេក្ខភាពប្រធានាធិបតី រៃអង្គាសបានប្រាក់សរុបចំនួន ១,០៤ពាន់លានដុល្លារ ហើយបើបូកបញ្ចូលពីប្រភពខាងក្រៅផ្សេងៗ រកបាន ១,៦២ពាន់លានដុល្លារ។ នេះបើយោងតាមទិន្នន័យពី OpenSecrets ដែលជាអង្គការតាមដានពីលំហូរសាច់ប្រាក់នៅក្នុងនយោបាយអាមេរិក៕

ដោយ៖ ឈាង