ព័ត៌មានអន្ដរជាតិ

រុស្ស៊ី បាញ់ទម្លាក់ដ្រូន១០គ្រឿងរបស់អ៊ុយក្រែន ដែលបម្រុងវាយប្រហាររដ្ឋធានីមូស្គូ

បានផុស

១ ខែ មុន

នៅ

ថ្ងៃពុធ ២១ សីហា ២០២៤

ដោយ

Chheang

អភិបាលក្រុងមូស្គូ លោក Sergey Sobyanin បានអះអាងថា កងការពារដែនអាកាសរុស្ស៊ី បានបាញ់ទម្លាក់ដ្រូនវាយប្រហាររបស់អ៊ុយក្រែនចំនួន ១០គ្រឿង កាលពីយប់កាលពីថ្ងៃទី២១ខែសីហា នៅជិតរដ្ឋធានីមូស្គូ ដែលនេះគឺជា «ការប៉ុនប៉ងដ៏ធំបំផុតមួយ ដើម្បីវាយប្រហារមូស្គូ ដោយយន្តហោះគ្មានមនុស្សបើក គិតមកទល់នឹងបច្ចុប្បន្ន»។

លោក Sergey Sobyanin អភិបាលក្រុងមូស្គូ (រូបភាព៖ Getty)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការពារជាតិរុស្ស៊ី បានអះអាងថា ដ្រូនអ៊ុយក្រែនត្រូវបានបាញ់ទម្លាក់នៅតំបន់ Moscow Oblast ខណៈដែលកំពុងធ្វើដំណើរឆ្ពោះទៅកាន់រដ្ឋធានី។

ពាក់ព័ន្ធនឹងការវាយប្រហារលើកនេះ យោធាអ៊ុយក្រែននៅមិនទាន់ធ្វើអត្ថាធិប្បាយអំពីការចោទប្រកាន់នៅឡើយទេ។ មួយវិញទៀត ក៏មិនទាន់មានរបាយការណ៍អំពីការខូចខាត ឬមនុស្សរងរបួសនៅក្នុងការវាយប្រហារនោះដែរ។

កងកម្លាំងអ៊ុយក្រែន តែងធ្វើការវាយប្រហារដោយដ្រូនជាប្រចាំនៅលើទឹកដីរុស្ស៊ី ដោយផ្តោតលើមូលដ្ឋានយោធា រោងចក្រចម្រាញ់ប្រេង និងកន្លែងឧស្សាហកម្ម។ កន្លងមក អ៊ុយក្រែន ក៏ធ្លាប់បានកំណត់គោលដៅនៅក្រុងមូស្គូជាមួយនឹងការវាយប្រហារដោយដ្រូនផងដែរ។ យ៉ាងណាមិញ រដ្ឋាភិបាលក្រុងកៀវមិនសូវជាចេញមុខទទួលខុសត្រូវជាផ្លូវការចំពោះការវាយប្រហារនៅលើដីរុស្ស៊ីនោះឡើយ៕

ដោយ៖ ឈាង