ព័ត៌មានអន្ដរជាតិ

អ្នកស្លាប់កើនដល់២០៩នាក់ដោយទឹកជំនន់នៅប៉ាគីស្ថាន ខណៈភ្លៀងបន្តធ្លាក់ខ្លាំង

បានផុស

៣ ខែ មុន

នៅ

ថ្ងៃពុធ ២១ សីហា ២០២៤

ដោយ

ទឹកជំនន់យ៉ាងគំហុកដែលបង្កឡើងដោយភ្លៀងមូសុងបានហូរកាត់តាមដងផ្លូវនានាក្នុងភាគខាងត្បូងប្រទេសប៉ាគីស្ថាន និងបានបិទផ្លូវហាយវេដ៏សំខាន់មួយនៅភាគខាងជើង ខណៈដែលចំនួនអ្នកស្លាប់ដោយសារឧបទ្ទវហេតុទាក់ទងនឹងភ្លៀងបានកើនឡើងដល់ ២០៩នាក់ចាប់តាំងពីថ្ងៃទី១ខែកក្កដា។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី២១ខែសីហានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជ្ញាធរគ្រប់គ្រងគ្រោះមហន្តរាយបានឲ្យដឹងថា មនុស្ស១៤នាក់បានស្លាប់នៅទូទាំងខេត្ត Punjab ក្នុងរយៈពេល២៤ម៉ោងចុងក្រោយ ខណៈភាគច្រើននៃអ្នកស្លាប់ផ្សេងទៀតគឺនៅក្នុងខេត្ត Khyber Pakhtunkhwa និង Sindh ។

មន្ត្រីជាន់ខ្ពស់នៃនាយកដ្ឋានឧតុនិយមប៉ាគីស្ថានក៏បានឲ្យដឹងផងដែរថា ភ្លៀងធ្លាក់ខ្លាំងចុងក្រោយបំផុតនឹងបន្តនៅសប្តាហ៍នេះនៅតាមផ្នែកខ្លះនៃប្រទេស ខណៈភ្លៀងធ្លាក់នៅភាគខាងត្បូងប្រទេសប៉ាគីស្ថានបានជន់លិចផ្លូវនានាក្នុងស្រុក Sukkur នៃខេត្ត Sindh ទោះយ៉ាងណា កិច្ចខិតខំប្រឹងប្រែងកំពុងដំណើរការដើម្បីសម្អាតផ្លូវហាយវេ Karakorum ដ៏សំខាន់នៅភាគខាងជើងបន្ទាប់ពីមានការបាក់ដី។

លើសពីនេះទឹកជំនន់យ៉ាងគំហុកក៏បានបំផ្លាញស្ពានមួយចំនួននៅភាគខាងជើងដែលរំខានដល់ការធ្វើចរាចរណ៍ផងដែរ ដែលជមរុញឲ្យរដ្ឋាភិបាលហាមប្រាមអ្នកទេសចរឱ្យចៀសវាងតំបន់ដែលរងការប៉ះពាល់។

លើសពីនេះអាជ្ញាធរគ្រប់គ្រងគ្រោះមហន្តរាយជាតិ បាននិយាយថា ទឹកជំនន់យ៉ាងគំហុកក៏បានបំផ្លាញស្ពានមួយចំនួននៅភាគខាងជើងដែលរំខានដល់ការធ្វើចរាចរណ៍ផងដែរ ដែលជម្រុញឲ្យរដ្ឋាភិបាលហាមប្រាមអ្នកទេសចរឱ្យចៀសវាងតំបន់ដែលរងការប៉ះពាល់ ខណៈផ្ទះជាង ២២០០ ខ្នងត្រូវបានខូចខាតនៅទូទាំងប្រទេសប៉ាគីស្ថានចាប់តាំងពីថ្ងៃទី១ ខែកក្កដា នៅពេលដែលភ្លៀងមូសុងបានចាប់ផ្តើម។

មិនត្រឹមតែប្រទេសប៉ាគីស្ថាននោះទេ ប្រទេសអាហ្វហ្គានីស្ថានដែលនៅជាប់ព្រំដែននោះក៏មានភ្លៀងធ្លាក់ខ្លាំងដែរ និងការខូចខាតទាក់ទងនឹងទឹកជំនន់ចាប់តាំងពីខែឧសភា ដោយមនុស្សជាង៨០នាក់បានស្លាប់ ហើយកាលពីថ្ងៃអាទិត្យ មនុស្សបីនាក់បានស្លាប់នៅពេលដែលរថយន្តរបស់ពួកគេត្រូវបានទឹកនាំទៅ។

គួរបញ្ជាក់ថារដូវខ្យល់មូសុងប្រចាំឆ្នាំរបស់ប្រទេសប៉ាគីស្ថានចាប់ផ្តើមពីខែកក្កដាដល់ខែកញ្ញា ខណៈអ្នកវិទ្យាសាស្ត្រ និងអ្នកព្យាករណ៍អាកាសធាតុបានព្រមានពីការប្រែប្រួលអាកាសធាតុចំពោះភ្លៀងធ្លាក់ខ្លាំងក្នុងប៉ុន្មានឆ្នាំថ្មីៗនេះ ខណៈក្នុងឆ្នាំ ២០២២ ភ្លៀងធ្លាក់ដែលបណ្ដាលមកពីអាកាសធាតុបានជន់លិចមួយភាគបីនៃប្រទេសនេះផងដែរ ដោយបានសម្លាប់មនុស្ស ១៧៣៩នាក់ និងបង្កការខូចខាតចំនួន៣០ ពាន់លានដុល្លារ៕