ខេត្តរបស់វៀតណាម ជាប់ខេត្តរតនគិរីរបស់កម្ពុជា ជួបគ្រោះរញ្ជួយដីទៀតហើយ

សារព័ត៌មាន Tuoi Tre រាយការណ៍កាលពីថ្ងៃអង្គារទី២០ខែសីហាឆ្នាំ២០២៤ថា ខេត្ត Kon Tum របស់វៀតណាម ដែលមានព្រំប្រទល់ជាប់ខេត្តរតនគិរីរបស់ប្រទេសកម្ពុជា បានជួបគ្រោះរញ្ជួយដីជាថ្មីម្តងទៀត ដោយលើកនេះមានកម្រិត៤.២រ៉ិចទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីវិទ្យាស្ថានភូគព្ភសាស្ត្រវៀតណាម, រញ្ជួយដីបានកើតឡើងនាវេលាម៉ោង ១:០៥នាទីរសៀល ដោយចំណុចកណ្តាលស្ថិតនៅក្នុងស្រុក Kon Plong។

យ៉ាងណាក្តី ដោយសារតែនេះជាការរញ្ជួយកម្រិតស្រាល វាមិនបង្កឲ្យមានគ្រោះមហន្តរាយធ្ងន់ធ្ងរអ្វីទេ ប៉ុន្តែអាជ្ញាធរក៏បានចុះទៅពិនិត្យនិងវាយតម្លៃការខូចខាតនៅតាមទីតាំងនានាផងដែរ។

សូមបញ្ជាក់ថា តំបន់​នេះ​បាន​រង​ការ​រញ្ជួយ​ដី​ញឹកញាប់ណាស់ នារយៈពេល​ប៉ុន្មាន​សប្តាហ៍​ថ្មីៗ​នេះ ជាហេតុ​បង្កក្តី​ព្រួយ​បារម្ភ​ដល់ប្រជាពលរដ្ឋ។

ជាក់ស្តែង កាលពីថ្ងៃទី៨ខែសីហា ការរញ្ជួយដីចំនួន៥លើក ដែលមានកម្រិតចាប់ពី២.៥ទៅ ៤.២រ៉ិចទ័រ បានវាយប្រហារខេត្តនេះ ប៉ុន្តែមិនមានហានិភ័យនៃគ្រោះមហន្តរាយទេ។

ចាប់ពីថ្ងៃទី២៨ខែកក្កដាដល់ថ្ងៃទី១ខែសីហា ស្រុក Kon Plong រងគ្រោះដោយរញ្ជួយដីជាង ៦០លើក ប៉ុន្តែភាគច្រើនត្រូវបានចាត់ថ្នាក់ថាជាគ្រោះមហន្តរាយធម្មជាតិកម្រិតសូន្យ លើកលែងតែរញ្ជួយដីកម្រិត៥រ៉ិចទ័រ ដែលកើតឡើងនៅម៉ោង១១:៣៥នាទីព្រឹកថ្ងៃទី២៨ខែកក្កដា ប៉ុណ្ណោះ។

ការ​រញ្ជួយនោះទៀតសោត ​មិនមែនវាយប្រហារ​ត្រឹម​ខេត្ត Kon Tum ទេ វាថែម​ទាំងធ្វើឲ្យរង្គើ​ទូទាំង​ខេត្តនិង​ក្រុង​ជា​ច្រើន​ទៀត ​ក្នុង​ប្រទេស​វៀតណាម និង​សូម្បី​តែ​នៅ​តំបន់​មួយ​ចំនួន​នៃ​ប្រទេស​ថៃ និង​កម្ពុជា ផងដែរ៕ 

អត្ថបទ៖ សុខ សុវណ្ណ

ចុចអាន៖ វៀតណាម ព្រមានកើតរញ្ជួយដីបន្តទៀត នៅខេត្ត ជាប់ព្រំដែនកម្ពុជា