អ៊ីតាលី ព្រមានថា លោកខាងលិច អាចបញ្ឆេះសង្គ្រាមលោកលើកទី៣

ឧបនាយករដ្ឋមន្ត្រីអ៊ីតាលីលោក Matteo Salvini ព្រមានថា ខ្នងបង្អែកអ៊ុយក្រែននៅលោកខាងលិច អាចបង្កឲ្យមានសង្គ្រាមលោកលើកទី៣ ដោយសារតែការបន្តផ្តល់សព្វាវុធដល់ទីក្រុងកៀវ យកទៅវាយប្រហារគោលដៅនៅលើដីរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងទៅកាន់ប្រព័ន្ធផ្សព្វផ្សាយ Il Sussidiario កាលពីថ្ងៃពុធទី២១ខែសីហាឆ្នាំ២០២៤ លោក Salvini ដែលក៏ជារដ្ឋមន្ត្រីក្រសួងហេដ្ឋារចនាសម្ព័ន្ធនិងដឹកជញ្ជូន និងជាមេដឹកនាំគណបក្ស Lega Nord (Northern League) ផងដែរនោះ បាននិយាយថា «ការបញ្ជូនអាវុធទៅវាយប្រហារ និងសម្លាប់មនុស្សនៅលើទឹកដីរុស្ស៊ី នឹងក្លាយជាគ្រោះមហន្តរាយ។ នោះគឺជម្លោះពិភពលោកតែម្តង»។

រម្លឹកទៅមុនការបោះឆ្នោតសភាអ៊ឺរ៉ុបក្នុងខែមិថុនា កាលនោះ លោក Salvini ក៏ជំរុញប្រជាជនអ៊ីតាលី កុំអនុញ្ញាតឲ្យគណបក្សឆ្វេងនិយមឈ្នះផងដែរ ព្រោះពួកគេនឹងចាប់ដៃជាមួយប្រធានាធិបតីបារាំង Emmanuel Macron ហើយធ្វើឲ្យសង្គ្រាមលោកលើកទី៣ ក្លាយជាការពិត។

មិនត្រឹមប៉ុណ្ណឹង ឧបនាយករដ្ឋមន្ត្រីរូបនេះ ថែមទាំងបញ្ជាក់ថា អ៊ីតាលី នឹងមិនយល់ព្រមលើការបញ្ជូនអាវុធប្រភេទកាចសាហាវទៅឲ្យអ៊ុយក្រែនទេ លុះត្រាតែយើងប្រាកដចិត្តថា អាវុធទាំងនោះ ច្បាស់ជានឹងមិនត្រូវបានយកទៅប្រើដើម្បីវាយប្រហារនិងសម្លាប់មនុស្សនៅក្នុងប្រទេសរុស្ស៊ីទេ។ បើអ៊ីចឹងមែន វានឹងក្លាយជាឧប្បត្តិហេតុ ដែលនាំឆ្ពោះទៅរកសង្រ្គាមលោកលើកទី៣។

មិនមែនតែអ៊ីតាលីទេ សូម្បីប្រធានាធិបតីតួកគី Recep Tayyip Erdogan ក៏ព្រមានដូចគ្នានេះដែរ ដោយលោកលើកឡើងថា «ពិតជារឿងគួរឲ្យសោកស្តាយជាទីបំផុត ដែលមានប្រទេសនៅលោកខាងលិច ប្រកាន់យកវិធីសាស្រ្ត ចង់បង្កឲ្យមានសង្គ្រាមលោកលើកទី៣»។

លោក Erdogan អះអាងថា មហាអំណាចលោកខាងលិចមួយចំនួន ហាក់ដូចជាកំពុងព្យាយាមខ្លាំងណាស់ ដើម្បីបង្វែរជម្លោះនៅអ៊ុយក្រែន ឲ្យប្រែក្លាយទៅជាសង្រ្គាមលោកទាំងមូល ប៉ុន្តែលោក​សង្ឃឹម​ថា ​សន្តិភាព​នឹង​នៅតែកើតឡើងបាន។

ពាក់ព័ន្ធបញ្ហានេះដែរ រុស្ស៊ីក៏បញ្ជាក់ច្បាស់ហើយថា ប្រសិនបើលោកខាងលិចនិងអង្គការណាតូ នៅតែប្រកាន់យកវិធីសាស្រ្តយ៉ាងគឃ្លើនបែបនេះទៀត ការប្រឈមមុខដាក់គ្នាច្បាស់ចៀសមិនផុតឡើយ ហើយអាចឈានដល់សង្គ្រាមនុយក្លេអ៊ែរទៀតផង៕

អត្ថបទ៖ សុខ សុវណ្ណ

ចុចអាន៖ សង្គ្រាមលោកលើកទី៣នឹងផ្ទុះ បើណាតូ បញ្ជូនទ័ពទៅអ៊ុយក្រែន