ព័ត៌មានអន្ដរជាតិ

បុគ្គលិកសាលាបាញ់សម្លាប់មនុស្ស៣នាក់នៅប្រទេសបូស្នី

បានផុស

១ ខែ មុន

នៅ

ថ្ងៃព្រហស្បតិ៍ ២២ សីហា ២០២៤

ដោយ

បុគ្គលិកសាលាម្នាក់បានបាញ់សម្លាប់មនុស្សបីនាក់កាលពីថ្ងៃពុធនៅក្នុងទីក្រុងមួយនៅភាគពាយព្យនៃប្រទេសបូស្នី (Bosnian) នៅតំបន់បាល់ទិក ខណៈខ្មាន់កាំភ្លើងបានរងរបួសយ៉ាងធ្ងន់ធ្ងរ បន្ទាប់ពីព្យាយាមសម្លាប់ខ្លួនឯង។ នេះបើយោងតាមការចេញផ្សាយរបស់ទីភ្នាក់ងារព័ត៌មាន APនៅថ្ងៃទី២២ខែសីហានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យប៉ូលិសប្រចាំតំបន់ បានឲ្យដឹងថា ការបាញ់ប្រហារបានកើតឡើងនៅម៉ោងប្រហែល១០ព្រឹក ម៉ោងក្នុងស្រុក នៅសាលាអនុវិទ្យាល័យមួយក្នុងទីក្រុង Sanski Most ចម្ងាយប្រហែល ៣០០គីឡូម៉ែត្រ ភាគពាយព្យនៃរដ្ឋធានី សារ៉ាយ៉េវ៉ូ (Sarajevo) របស់ប្រទេសបូស្នី។

តាមសម្ដីរបស់អ្នកនាំពាក្យខ្នាន់កាំភ្លើងបានប្រើ «អាវុធយោធា កាំភ្លើងស្វ័យប្រវត្តិ»។ បន្ទាប់មកបានប៉ុនប៉ងសម្លាប់ខ្លួនឯង ហើយស្ថិតក្នុងស្ថានភាពធ្ងន់ធ្ងរនៅក្នុងមន្ទីរពេទ្យមួយនៅ Banja Luka ក្បែរនោះ។ជនរងគ្រោះនៅក្នុងការបាញ់ប្រហារួមមាននាយកសាលា លេខាធិការ និងគ្រូបង្រៀនម្នាក់។ សាលានេះត្រូវបាន បិទសម្រាប់វិស្សមកាលរដូវក្តៅ ប៉ុន្តែមានមនុស្សនៅក្នុងសាលា ខណៈដែលមានការប្រឡងម្តងទៀតកំពុងដំណើរការ។

បើយោងតាមទូរទស្សន៍ប្រចាំតំបន់ N1 បានរាយការណ៍ថា បុរសនោះមានជម្លោះជាមួយនឹងការគ្រប់គ្រងសាលា។ទោះយ៉ាងណាមិនមានព័ត៌មានលម្អិតផ្សេងទៀតភ្លាមៗទេ។

គួរបញ្ជាក់ផងដែរថា តំបន់បាល់ទិកគឺពោពេញដោយអាវុធធុនតូច និងសព្វាវុធចាប់តាំងពីសង្គ្រាមឆ្នាំ ១៩៩០ ដែលជាផ្នែកមួយនៃការបែកបាក់នៃប្រទេសយូហ្គោស្លាវី ជាពិសេសនៅបូស្នី ដែលជាប្រទេសដែលមានប្រជាជនប្រហែល៣,៥លាននាក់។ យោងតាមការសិក្សាឆ្នាំ ២០១០ របស់កម្មវិធីអភិវឌ្ឍន៍អង្គការសហប្រជាជាតិ មានអាវុធប្រហែល ៧៥០០០០ ដើមនៅក្នុងកម្មសិទ្ធិខុសច្បាប់នៅក្នុងប្រទេសនេះ។

ករណីស្រដៀងគ្នាក៏កើតមាននៅប្រទេសផ្សេងទៀតដែរដូចជាកាលពីខែមុន អតីតយុទ្ធជនម្នាក់បានចូលទៅក្នុងផ្ទះថែទាំមនុស្សចាស់នៅក្នុងទីប្រជុំជនដ៏ស្ងប់ស្ងាត់មួយក្នុងប្រទេសក្រូអាស៊ី ហើយបានបើកការបាញ់ប្រហារដោយបានសម្លាប់មនុស្ស៦នាក់និងរបួស៦នាក់ផ្សេងទៀត។

កាលពីខែឧសភា ក្មេងជំទង់ម្នាក់នៅប្រទេសស៊ែប៊ី បានបាញ់ប្រហារនៅសាលាមួយដោយប្រើកាំភ្លើងរបស់ឪពុកគាត់ ដោយបានសម្លាប់កុមារ ៩ នាក់ និងកងសន្តិសុខសាលាម្នាក់។ មួយថ្ងៃក្រោយមក ខ្មាន់កាំភ្លើងអាយុ ២០ឆ្នាំបានសម្លាប់មនុស្ស៩នាក់ និងរបួស១២នាក់នៅទីក្រុង Belgrade រដ្ឋធានីប្រទេសស៊ែប៊ី ៕