ព័ត៌មានអន្ដរជាតិ

អូស្ត្រាលី និងន័រវែស រួមគ្នាបង្កើតរោងចក្រផលិតមីស៊ីល

បានផុស

៦ ខែ មុន

នៅ

ថ្ងៃព្រហស្បតិ៍ ២២ សីហា ២០២៤

ដោយ

Chheang

អូស្ត្រាលី បាននិយាយថា ខ្លួននឹងវិនិយោគប្រាក់ចំនួនជាង ៥៧៣លានដុល្លា ដើម្បីបង្កើតរោងចក្រផលិតមីស៊ីលរួមគ្នាជាមួយកងការពារទីក្រុង Kongsberg របស់ប្រទេសន័រវែស នៅអាកាសយានដ្ឋាន NewCastle លើឆ្នេរសមុទ្រភាគខាងកើតរបស់ប្រទេសអូស្ត្រាលី នាចុងឆ្នាំ២០២៤។

រដ្ឋមន្ត្រីក្រសួងការពារជាតិអូស្ត្រាលី លោក Pat Conroy (រូបភាព៖ AAP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រោងចក្រថ្មីនេះ នឹងផលិតប្រភេទមីស៊ីល Naval Strike និងមីស៊ីល Joint Strike រយៈចម្ងាយឆ្ងាយ។ រដ្ឋមន្ត្រីក្រសួងការពារជាតិអូស្ត្រាលី លោក Pat Conroy បាននិយាយនៅក្នុងសេចក្តីថ្លែងការណ៍មួយថា រោងចក្រនេះនឹងក្លាយជាកន្លែងមួយក្នុងចំណោមកន្លែងតែពីរគត់នៅលើពិភពលោកដែលអាចផលិតមីស៊ីលប្រភេទទាំងនេះបាន ហើយជាទីតាំងតែមួយគត់នៅខាងក្រៅទីក្រុង Kongsberg ប្រទេសន័រវេស។

អូស្ត្រាលី បានប្រកាសទៀតថា ខ្លួននឹងបង្កើនការផលិតសព្វាវុធបញ្ជាដោយស្វ័យប្រវត្តិក្រោមទម្រង់ការពារ ដើម្បីពង្រឹងសមត្ថភាពវាយប្រហារក្នុងរយៈចម្ងាយឆ្ងាយរបស់កងកម្លាំងការពារអូស្ត្រាលី ចំពេលភាពតានតឹងកំពុងកើនឡើងនៅឥណ្ឌូប៉ាស៊ីហ្វិក។

រោងចក្រថ្មីនេះ ក៏នឹងអភិវឌ្ឍប្រភេទមីស៊ីលល្បឿនលឿនជាងសម្លេងផងដែរ ក្រោមភាពជាដៃគូបច្ចេកវិទ្យាការពារ Aukus ជាមួយសហរដ្ឋអាមេរិក និងអង់គ្លេស ហើយនឹងចាប់ផ្តើមផលិតរួមគ្នានូវមីស៊ីលស្វ័យប្រវត្តិជាមួយសហរដ្ឋអាមេរិកនៅឆ្នាំក្រោយ។

ការិយាល័យរបស់លោក Conroy បាននិយាយនៅក្នុងសេចក្តីថ្លែងការណ៍មួយថា៖ «ការបង្កើតរោងចក្រផលិតនៅអាកាសយានដ្ឋាន Newcastle នឹងជួយធ្វើឲ្យប្រទេសអូស្ត្រាលីកាន់តែមានទំនុកចិត្តលើខ្លួនឯង និងជំរុញការស្តុកទុកសម្រាប់សង្រ្គាម ខណៈជួយគាំទ្រដល់សេដ្ឋកិច្ចក្នុងស្រុក និងឧស្សាហកម្មការពារជាតិរបស់អូស្ត្រាលី»៕

ដោយ៖ ឈាង