ព័ត៌មានអន្ដរជាតិ

លោក បៃដិន ដាក់សម្ពាធលើលោក Netanyahu ពីភាពបន្ទាន់នៃបទឈប់បាញ់នៅហ្គាហ្សា

បានផុស

៧ ខែ មុន

នៅ

ថ្ងៃព្រហស្បតិ៍ ២២ សីហា ២០២៤

ដោយ

Chheang

សេតវិមាន បានប្រកាសថា ប្រធានាធិបតីអាមេរិក លោក ចូ បៃដិន (Joe Biden) នៅក្នុងកិច្ចសន្ទនាតាមទូរសព្ទជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu កាលពីថ្ងៃពុធ បានសង្កត់ធ្ងន់លើតម្រូវការបន្ទាន់ ដើម្បីបញ្ចប់កិច្ចព្រមព្រៀងបទឈប់បាញ់ និងការដោះលែងចំណាប់ខ្មាំងនៅតំបន់ហ្គាហ្សា ហើយបានចង្អុលបង្ហាញថា ការពិភាក្សានៅរដ្ឋធានីគែរ ប្រទេសអេហ្ស៊ីបនាពេលខាងមុខថាមានសារៈសំខាន់ណាស់។

លោក ចូ បៃដិន ប្រធានាធិបតីអាមេរិក និងលោក Benjamin Netanyahu នាយករដ្ឋមន្ត្រីអ៊ីស្រាអែល (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចសន្ទនាតាមទូរសព្ទនេះ ធ្វើឡើងបន្ទាប់ពីដំណើរទស្សនកិច្ចបន្ទាន់មួយរបស់រដ្ឋមន្ត្រីការបរទេសអាមេរិក លោក Antony Blinken ទៅកាន់តំបន់មជ្ឈិមបូព៌ា ដែលទើបបញ្ចប់កាលពីថ្ងៃអង្គារ តែមិនទទួលបានលទ្ធផលជាផ្លែផ្កាសមប្រកបអ្វីឡើយ ពោលគឺគ្មានកិច្ចព្រមព្រៀងរវាងអ៊ីស្រាអែល និងក្រុមសកម្មប្រយុទ្ធហាម៉ាស ស្តីពីបទឈប់បាញ់នៅហ្គាហ្សា។

ក្រុមអ្នកសម្របសម្រួលដែលបានប្រឹងប្រែងអស់រយៈពេលជាច្រើនខែដើម្បីសម្រេចបាននូវបទឈប់បាញ់ គ្រោងនឹងធ្វើការប្រជុំគ្នាម្ដងទៀតនៅប៉ុន្មានថ្ងៃខាងមុខក្នុងទីក្រុងគែរ។

សេចក្តីថ្លែងការណ៍របស់សេតវិមាន បានរៀបរាប់ថា៖ «លោកប្រធានាធិបតីបានសង្កត់ធ្ងន់លើភាពបន្ទាន់នៃការនាំយកកិច្ចព្រមព្រៀងបទឈប់បាញ់ និងការដោះលែងចំណាប់ខ្មាំងឈានទៅដល់ការបិទបញ្ចប់ និងការពិភាក្សាអំពីកិច្ចចរចាពេលខាងមុខនៅទីក្រុងគែរ ដើម្បីដកចេញនូវឧបសគ្គដែលនៅសេសសល់»។

យោងតាមទីភ្នាក់ងារព័ត៌មាន Reuters ក្នុងសេចក្តីថ្លែងការណ៍ បានបញ្ជាក់ទៀតថា លោក បៃដិន និងលោក Netanyahu ក៏បានពិភាក្សាអំពីកិច្ចខិតខំប្រឹងប្រែង ដើម្បីគាំទ្រអ៊ីស្រាអែល ដោយដាក់ពង្រាយកងកម្លាំងការពារអាមេរិក «ប្រឆាំងនឹងការគំរាមកំហែងទាំងអស់ពីប្រទេសអ៊ីរ៉ង់ រួមទាំងក្រុមភេរវករដែលជាបក្ខពួក ដូចជា ក្រុមហាម៉ាស ក្រុមហេសបូឡា និងក្រុមហ៊ូធី»។

អ៊ីរ៉ង់ បានប្តេជ្ញាសងសឹកចំពោះការសម្លាប់មេដឹកនាំក្រុមហាម៉ាស លោក Ismail Haniyeh នៅទីក្រុងតេហេរ៉ង់ កាលពីថ្ងៃទី៣១ខែកក្កដា ហើយបានចោទប្រកាន់អ៊ីស្រាអែលថាជាអ្នកប្រព្រឹត្ត។ អ៊ីស្រាអែលមិនបានបញ្ជាក់ ឬបដិសេធថាខ្លួនស្ថិតនៅពីក្រោយការសម្លាប់នេះឬក៏យ៉ាងណានោះទេ។

សហរដ្ឋអាមេរិក បានបញ្ជាឲ្យដាក់ពង្រាយនាវាមុជទឹកបំពាក់មីស៊ីលស្វ័យប្រវត្តិទៅកាន់មជ្ឈិមបូព៌ា និងបានបញ្ជាឲ្យនាវាផ្ទុកយន្តហោះចម្បាំង Abraham Lincoln ពន្លឿនការដាក់ពង្រាយរបស់ខ្លួនទៅកាន់តំបន់ ដើម្បីពង្រឹងការការពាររបស់អ៊ីស្រាអែល។

លោក Blinken និងបណ្ដាប្រទេសសម្របសម្រួលមកពីអេហ្ស៊ីប និងកាតា បានកំណត់ក្តីសង្ឃឹមរបស់ពួកគេលើ «សំណើផ្សារភ្ជាប់» របស់សហរដ្ឋអាមេរិក ក្នុងគោលបំណងកាត់បន្ថយចន្លោះប្រហោងរវាងភាគីជម្លោះទាំងពីរនៅក្នុងសង្គ្រាមហ្គាហ្សាដែលមានអាយុកាលជាង១០ខែមកនេះ៕

ដោយ៖ ឈាង