ជនជាតិវៀតណាមរាប់រយនាក់ ប្រញាប់ចាកចេញពីប្រទេស មីយ៉ាន់ម៉ា

ជនជាតិវៀតណាមជិត៤០០នាក់ ត្រូវបានធ្វើមាតុភូមិនិវត្តន៍ពីប្រទេសមីយ៉ាន់ម៉ា កាលពីថ្ងៃព្រហស្បតិ៍ម្សិលមិញ ចំពេលមានអស្ថិរភាពនយោបាយនិងជំងឺរាតត្បាតកូវីដ១៩ នៅក្នុងប្រទេសនេះ។

ជើងហោះហើរចំនួនពីរជើង ដែលរៀបចំដោយក្រសួងការបរទេស ស្ថានទូតវៀតណាមប្រចាំនៅមីយ៉ាន់ម៉ា និងក្រុមហ៊ុនអាកាសចរណ៍វៀតណាម បាននាំពលរដ្ឋរបស់ខ្លួនចេញពីប្រទេសមីយ៉ាន់ម៉ា មកកាន់ទីក្រុង ដាណាង ភាគកណ្តាល។

សេចក្តីប្រកាសព័ត៌មានកាលពីថ្ងៃព្រហស្បតិ៍ដោយក្រសួងការបរទេស បាននិយាយថា ពលរដ្ឋដែលបានធ្វើមាតុភូមិនិវត្តន៍រួមមាន អ្នកដែលមានអាយុក្រោម១៨ឆ្នាំ, មនុស្សចាស់, អ្នកដែលមានជំងឺប្រចាំកាយនិងអ្នកផ្សេងទៀតដែលមានជំងឺធ្ងន់ធ្ងរ។

វិធានការទប់ស្កាត់ជំងឺកូវីដ១៩រួមមានដូចជា ការប្រកាសផ្នែកវេជ្ជសាស្រ្ត, ការត្រួតពិនិត្យកម្តៅរាងកាយនិងឧបករណ៍ការពារ ត្រូវបានដាក់អនុវត្តក្នុងជើងហោះហើរដើម្បីការពារការឆ្លងមេរោគកូរ៉ូណា។

មជ្ឈមណ្ឌលគ្រប់គ្រងជំងឺក្រុងដាណាង (CDC) បាននិយាយថា បន្ទាប់ពីយន្តហោះចុះចតក្នុងទីក្រុងដាណាង ពលរដ្ឋត្រូវបានគេដាក់ឲ្យធ្វើចត្តាឡីស័កនៅតាមទីតាំងដែលគ្រប់គ្រងដោយយោធាក្នុងទីក្រុងដាណាងនិងខេត្ត Quang Nam ភាគកណ្តាល។

ប្រទេសមីយ៉ាន់ម៉ាកំពុងជួបប្រទះនូវអស្ថិរភាពនយោបាយ បន្ទាប់ពីកងទ័ពដណ្តើមអំណាចនិងឃុំខ្លួនមេដឹកនាំរដ្ឋាភិបាលលោកស្រី អ៊ុងសាន ស៊ូជី និងមេដឹកនាំគណបក្សជាច្រើនរូបទៀតកាលពីខែមុន។

ការតវ៉ាបានផ្ទុះឡើងទូទាំងប្រទេស ហើយមនុស្សយ៉ាងតិច៥០នាក់ត្រូវបានសម្លាប់៕

ប្រែសម្រួលដោយ៖ Vann Vann

ប្រភព៖ VN Express