ព័ត៌មានអន្ដរជាតិ

ពលរដ្ឋនីហ្សេរីយ៉ា ខឹងសម្បារ ក្រោយរដ្ឋយកលុយទិញយន្តហោះថ្មីឲ្យប្រធានាធិបតី

បានផុស

៣ សប្តាហ៍ មុន

នៅ

ថ្ងៃព្រហស្បតិ៍ ២២ សីហា ២០២៤

ដោយ

ប្រជាជននីហ្សេរីយ៉ាជាច្រើន បានបញ្ចេញប្រតិកម្មដោយកំហឹង បន្ទាប់ពីរដ្ឋទិញយន្តហោះថ្មីមួយគ្រឿងសម្រាប់លោកប្រធានាធិបតី Bola Tinubu ចំពេលសេដ្ឋកិច្ចកំពុងជួបប្រទះនឹងវិបត្តិដ៏អាក្រក់បំផុតមិនធ្លាប់មាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបញ្ជាទិញយន្តហោះថ្មីនេះ ធ្វើឡើងមិនដល់ពីរសប្តាហ៍ផង បន្ទាប់ពីប្រជាជននីហ្សេរីយ៉ារាប់ពាន់នាក់បានប្រមូលផ្ដុំគ្នាតាមដងផ្លូវនៅទូទាំងប្រទេស ដើម្បីធ្វើបាតុកម្មចំពោះការកើនឡើងនៃវិបត្តិស្រេកឃ្លាន និងការឡើងថ្លៃទំនិញ។

ក្រោយជាប់ឆ្នោតកាលពីឆ្នាំមុនដើម្បីដឹកនាំប្រទេសដែលមានប្រជាជនច្រើនជាងគេនៅទ្វីបអាហ្រ្វិក លោក Tinubu បានណែនាំកំណែទម្រង់សេដ្ឋកិច្ចជាច្រើន រួមទាំងការដកប្រាក់ឧបត្ថម្ភធនប្រេងឥន្ធនៈ ដែលជាកត្តាធ្វើឲ្យអតិផរណាខ្ពស់។ អតិផរណានៅនីហ្សេរីយ៉ាបច្ចុប្បន្នកើនឡើងច្រើនជាង ៣០% ឯណោះ។

ប្រធានាធិបតីនីហ្សេរីយ៉ា បាននិយាយថា កំណែទម្រង់នេះគឺចាំបាច់ដើម្បីកាត់បន្ថយការចំណាយរបស់រដ្ឋាភិបាល និងជំរុញកំណើនសេដ្ឋកិច្ចក្នុងរយៈពេលវែង។

កាលពីខែមករា លោក Tinubu បានប្រកាសកាត់បន្ថយចំនួនគណៈប្រតិភូធ្វើដំណើរផ្លូវរដ្ឋចំនួន ៦០% រួមទាំងអ្នកចូលរួមផ្ទាល់ជាមួយលោកផងដែរ។ ទោះយ៉ាងណាក៏ដោយ កាលពីថ្ងៃចន្ទ លោក Tinubu បានចាកចេញទៅកាន់ប្រទេសបារាំង ដោយប្រើយន្តហោះ Airbus A330 ដែលទើបទិញថ្មី ខណៈដែលយន្តហោះសម្រាប់ប្រធានាធិបតីបច្ចុប្បន្នមានចំនួន១០គ្រឿងរួចមកហើយ។

តម្លៃយន្តហោះនេះមិនត្រូវបានគេបង្ហើបឲ្យដឹងទេ ហើយក៏មិនមានការបង្ហាញអំពីមូលហេតុក្នុងការធ្វើដំណើរទៅប្រទេសបារាំងរបស់លោក Tinubu ដែរ។

នៅក្នុងសេចក្តីថ្លែងការណ៍មួយនៅលើបណ្ដាញសង្គម X ជំនួយការប្រព័ន្ធផ្សព្វផ្សាយរបស់ប្រធានាធិបតី Tinubu លោក Bayo Onanuga បាននិយាយថា យន្តហោះថ្មីនឹងជួយសន្សំថវិការដ្ឋបានច្រើន។ លោក ថា៖ «យន្តហោះថ្មីដែលបានទិញក្នុងតម្លៃទាបជាងទីផ្សារ អាចជួយសន្សំសំចៃថ្លៃថែទាំ និងថ្លៃសាំងដ៏ច្រើនរបស់នីហ្សេរីយ៉ា ដល់ទៅរាប់លានដុល្លារក្នុងមួយឆ្នាំៗ»។

បើយោងតាមការចុះផ្សាយរបស់សារព័ត៌មាន BBC យន្តហោះប្រធានាធិបតីនីហ្សេរីយ៉ា មានអាយុកាល១៥ឆ្នាំ ហើយនឹងត្រូវប្រើប្រាស់ជំនួសយន្តហោះចាស់ Boeing BBJ 737-700 ដែលមានអាយុកាល១៩ឆ្នាំ។

មន្ត្រីនីហ្សេរីយ៉ា ធ្លាប់បាននិយាយថា យន្តហោះប្រធានាធិបតីមានតម្លៃថែទាំថ្លៃ ដោយសារអាយុកាលដ៏ចំណាស់របស់ពួកវា។ កាលពីខែមិថុនា សមាជិកសភា បានស្នើឲ្យទិញយន្តហោះថ្មី២គ្រឿងសម្រាប់ប្រធានាធិបតី និងអនុប្រធានាធិបតី ដោយលើកឡើងថាយន្តហោះចាស់មិនមានសុវត្ថិភាពនោះទេ។ លុះដល់ខែកក្កដា សមាជិកសភាបានអនុម័តកញ្ចប់ថវិកាបន្ថែម ដែលបង្កើនថវិការដ្ឋឆ្នាំ២០២៤ ពី ១៨ពាន់លានដុល្លារ ឡើងដល់ជាង ២២ពាន់លានដុល្លារ៕

ដោយ៖ ឈាង

Related Topics:ប្រទេសនីហ្សេរីយ៉ា