ប្រយ័ត្ន! ជំងឺ mpox ប្រភេទ Clade 1b ដ៏គ្រោះថ្នាក់ មកដល់ប្រទេសជិតខាង កម្ពុជា ហើយ

តាមការចុះផ្សាយរបស់ BBC នៅថ្ងៃសុក្រទី២៣ខែសីហាឆ្នាំ២០២៤, អ្នកជិតខាងកម្ពុជា គឺប្រទេសថៃ ពេលនេះបានបញ្ជាក់ច្បាស់ហើយថា ការរកឃើញករណីជំងឺ mpox លើបុរសអឺរ៉ុបម្នាក់ដែលធ្វើដំណើរមកពីទ្វីបអាហ្វ្រិកកាលពីសប្តាហ៍មុន ពិតជាប្រភេទ Clade 1b ដ៏គ្រោះថ្នាក់មែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការរកឃើញនេះ ធ្វើឲ្យថៃ ក្លាយជាប្រទេសដំបូងគេនៅអាស៊ី ដែលរកឃើញជំងឺ mpox ប្រភេទ Clade 1b ដ៏កាចសាហាវ និងជាប្រទេសទី២លើពិភពលោក បន្ទាប់ពីស៊ុយអែត ដែលរាយការណ៍ករណីឆ្លង ជំងឺ mpox ប្រភេទ Clade 1b នៅខាងក្រៅទ្វីបអាហ្វ្រិក។

យោងតាមនាយកដ្ឋានគ្រប់គ្រងជំងឺរបស់ប្រទេសថៃ បុរសវ័យ៦៦ឆ្នាំដែលឆ្លងជំងឺ បានមកដល់ទីក្រុងបាងកក នៅថ្ងៃទី១៤ខែសីហា។ គាត់ចាប់ផ្តើមចេញរោគសញ្ញានៅថ្ងៃបន្ទាប់ ហើយក៏បញ្ជូនទៅមន្ទីរពេទ្យភ្លាមៗ។

បន្ទាប់ពីការធ្វើតេស្តនៅមន្ទីរពិសោធន៍ នាយកដ្ឋានគ្រប់គ្រងជំងឺថៃ (DDC) បញ្ជាក់ថា គាត់ពិតជាឆ្លងជំងឺ mpox ប្រភេទ Clade 1b មែន។ យោងតាម DDC, «យើងបានពិនិត្យមនុស្សចំនួន៤៣នាក់ដែលមានទំនាក់ទំនងជិតស្និទ្ធជាមួយអ្នកជំងឺ ហើយរហូតមកដល់ពេលនេះ ពួកគេមិនមានរោគសញ្ញាអ្វីឡើយ ប៉ុន្តែយើងត្រូវតែបន្តតាមដានឲ្យគ្រប់២១ថ្ងៃ»។

ដោយឡែក កាលពីសប្តាហ៍ ប្រទេសប៉ាគីស្ថាននិងហ្វីលីពីន ក៏រាយការណ៍ពីករណីឆ្លងជំងឺ mpox ដែរ ប៉ុន្តែមិនមែនប្រភេទ Clade 1b ទេ ពោលគឺជាប្រភេទប្រភេទ Clade 2 ដែលស្រាលជាងនេះ។

ចាប់តាំងពីការផ្ទុះឡើងនៅសាធារណរដ្ឋប្រជាធិបតេយ្យកុងហ្គោ កាលពីឆ្នាំមុនមក ជំងឺ mpox បានសម្លាប់មនុស្សចំនួន៤៥០នាក់ហើយ។ ក្រោយមក វាក៏ឆ្លងរាលដាលទៅកាន់ប្រទេសជិតខាងមួយចំនួន ដូចជាប៊ូរុនឌី កេនយ៉ា រវ៉ាន់ដា និងអ៊ូហ្គង់ដា។

សូមបញ្ជាក់ថា  mpox Clade 1b ​អាចឆ្លង​រាល​ដាលងាយបំផុតតាមរយៈទំនាក់ទំនងជិតស្និទ្ធ ដូចជារួមភេទ ប៉ះពាល់ស្បែកទល់ស្បែក និងការនិយាយឬដកដង្ហើមនៅជិតមនុស្សម្នាក់ទៀត ហើយរោគសញ្ញាដំបូងរបស់ជំងឺនេះរួមមាន គ្រុនក្តៅ ឈឺក្បាល ឈឺសាច់ដុំ ឈឺខ្នង ហើមកូនកណ្តុរ គ្រុនញាក់ និងគ្មានកម្លាំងក្នុងខ្លួន ហើយកើតដំបៅស្បែក៕

អត្ថបទ៖ សុខ សុវណ្ណ

ចុចអាន៖ ថៃ រក​ឃើញ​ករណី​ឆ្លង​ជំងឺ mpox សង្ស័យ​ជា​ប្រភេទ Clade 1 ដ៏​គ្រោះថ្នាក់