អាមេរិក ចាប់ឃុំខ្លួនបុរសម្នាក់ ដែល គំរាមសម្លាប់លោក ត្រាំ

ប៉ូលិសអាមេរិក បានចាប់ឃុំខ្លួនបុរស​ម្នាក់ ដែល​បង្ហោះសារ​លើ​បណ្តាញ​សង្គមជាច្រើនលើកច្រើនសា​ គំរាម​សម្លាប់​បេក្ខជន​ប្រធានាធិបតី​គណបក្ស​សាធារណរដ្ឋ​លោក ដូណាល់ ត្រាំ នារយៈពេលប៉ុន្មានសប្តាហ៍មកនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ FOX News នៅថ្ងៃសុក្រទី២៣ខែសីហាឆ្នាំ២០២៤, បុរសឈ្មោះ Ronald Lee Syvrud អាយុ៦៦ឆ្នាំជាអ្នករស់នៅរដ្ឋ Arizona ត្រូវបានចាប់ខ្លួននាវេលាម៉ោង២:៣០រសៀល ក្នុងតំបន់ Cochise County ភាគអាគ្នេយ៍រដ្ឋ Arizona។

ពាក់ព័ន្ធរឿងនេះ អ្នកនាំពាក្យសេវាកម្មសម្ងាត់ Alexandria Worley និយាយថា «យើងកំពុងស៊ើបអង្កេតលើលោក Syvrud ហើយភ្លាមៗនេះ យើងមិនទាន់និយាយអ្វីបានទេ»។

ក្រៅពីករណីខាងលើ លោក Syvrud ក៏ត្រូវមន្ត្រីអាមេរិកតាមចាប់ខ្លួនផងដែរ ជុំវិញការចោទប្រកាន់ជាច្រើន រួមទាំងពីបទបើកបរក្រោមឥទ្ធិពលគ្រឿងស្រវឹងនៅក្នុងរដ្ឋ Wisconsin និងការប្រើអំពើហិង្សានៅក្នុងតំបន់ Graham នៃរដ្ឋ Arizona។

ការចាប់ខ្លួននេះកើតឡើង ស្របពេលលោក ត្រាំ ទៅដល់ទីក្រុង Cochise ដើម្បីពិនិត្យព្រំដែន អាមេរិក-ម៉ិកស៊ិក ហើយធ្វើយុទ្ធនាការឃោសនាបោះឆ្នោតនៅទីនោះតែម្តង។

រម្លឹកទៅថ្ងៃទី១៤ខែកក្កដា, ពេលនោះពិភពលោកពិតជាភ្ញាក់ផ្អើលយ៉ាងខ្លាំងចំពោះករណីលបធ្វើឃាតលោក ត្រាំ អំឡុងពេលជួបជុំជាមួយអ្នកគាំទ្រនៅរដ្ឋ Pennsylvania ប៉ុន្តែមិនអាចយកជីវិតលោកបានឡើយ។

ហេតុការណ៍នោះបណ្តាលឲ្យមនុស្ស២នាក់ស្លាប់ ក្នុងនោះមានម្នាក់ជាខ្មាន់កាំភ្លើងឈ្មោះ Thomas Matthew Crooks និងម្នាក់ជាអ្នកចូលរួមពិធីជួបជុំ ខណៈ២នាក់ទៀត រងរបួសធ្ងន់។ យ៉ាងណា លោក ត្រាំ មិនគ្រោះថ្នាក់ដល់អាយុជីវិតទេ គ្រាន់តែរបួសត្រង់ត្រចៀកប៉ុណ្ណោះ៕

អត្ថបទ៖ សុខ សុវណ្ណ

ចុចអាន៖ ត្រាំ ឈរនិយាយក្នុងកញ្ចក់ការពារគ្រាប់ ពេលជួបអ្នកគាំទ្រនៅខាងក្រៅលើកដំបូង តាំងពីត្រូវគេលបប្រហារ