ព័ត៌មានអន្ដរជាតិ

កូរ៉េខាងជើង ថ្កោលទោសអាមេរិកដែលលក់ឧទ្ធម្ភាគចក្រយោធាឲ្យកូរ៉េខាងត្បូង

បានផុស

៤ សប្តាហ៍ មុន

នៅ

ថ្ងៃសុក្រ ២៣ សីហា ២០២៤

ដោយ

បើតាមការចុះផ្សាយរបស់សារព័ត៌មាន KCNA នៅថ្ងៃទី២៣ខែសីហា ក្រសួងការបរទេសកូរ៉េខាងជើងបានថ្កោលទោសគម្រោងលក់ឧទ្ធម្ភាគចក្រយោធា Apache របស់សហរដ្ឋអាមេរិកទៅឲ្យកូរ៉េខាងត្បូង ដោយប្ដេជ្ញាថានឹងចាត់វិធានការបន្ថែមទៀតដើម្បីពង្រឹងវិស័យការពារជាតិរបស់ខ្លួន។

ឧទ្ធម្ភាគចក្រ AH-64E Apache (រូបភាព៖ ShutterStock)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ទីរបញ្ចកោណ បានប្រកាសកាលពីថ្ងៃទី១៩ខែសីហាថា ក្រសួងការបរទេសសហរដ្ឋអាមេរិកបានអនុម័តការលក់ប្រភេទឧទ្ធម្ភាគចក្រវាយប្រហារ AH-64E Apache ចំនួន ៣៦គ្រឿង និងឧបករណ៍ផ្សេងៗបំពាក់លើឧទ្ធម្ភាគចក្ររួមទាំងមីស៊ីលផងដែរ ក្នុងតម្លៃប្រហែល ៣,៥ពាន់លានដុល្លារ ដើម្បីគាំទ្រដល់កូរ៉េខាងត្បូងទប់ទល់នឹងការគំរាមកំហែងពីសត្រូវ ក៏ដូចជាចូលរួមនៅក្នុងប្រតិបត្តិការក្នុងតំបន់។

កូរ៉េខាងជើង បានរិះគន់គម្រោងលក់នេះថាជាសកម្មភាពធ្វើឲ្យភាពតានតឹងកាន់តែធ្ងន់ធ្ងរ ខណៈអាមេរិកនិងកូរ៉េខាងត្បូងកំពុងរៀបចំសមយុទ្ធយោធា Ulchi Freedom Shield ប្រចាំឆ្នាំរួមគ្នា។ ក្រសួងការបរទេសកូរ៉េខាងជើង បានរៀបរាប់ថា៖ «នេះគឺជាទង្វើញុះញង់ដែលព្រហើននៃការបង្កើនអស្ថិរភាពសន្តិសុខនៅក្នុងតំបន់»។

បន្ថែមពីនេះ កូរ៉េខាងជើងបានចោទប្រកាន់ក្រុងវ៉ាស៊ីនតោនថាបានបង្កើនការប្រឈមមុខដាក់គ្នាផ្នែកយោធា «រំខានដល់តុល្យភាពយោធា ហើយបង្កើនគ្រោះថ្នាក់នៃជម្លោះថ្មី» នៅក្នុងតំបន់តាមរយៈការផ្គត់ផ្គង់អាវុធដ៍គ្រោះថ្នាក់ដល់សម្ព័ន្ធមិត្តរបស់ខ្លួន។ ក្រុងព្យុងយ៉ាង បានប្រកាសថែមទៀតថា យុទ្ធសាស្ត្ររារាំងរបស់ខ្លួន គឺពង្រឹងលើការការពារសន្តិសុខ និងផលប្រយោជន៍ជាតិ ព្រមទាំងសន្តិភាពក្នុងតំបន់ ដោយសន្យាថានឹងធ្វើសកម្មភាពយោធាជាបន្តបន្ទាប់ ដើម្បីជំរុញការការពារខ្លួន៕

ដោយ៖ ឈាង

ចុចអាន៖ អាមេរិក អនុម័តការលក់ឧទ្ធម្ភាគចក្រយោធាតម្លៃ៣,៥ពាន់លានដុល្លារឲ្យកូរ៉េខាងត្បូង