ព័ត៌មានអន្ដរជាតិ

រកឃើញគ្រាប់ពេជ្រធំជាងគេទី២លើលោក ទំហំប៉ុនបាតដៃ នៅអាហ្វ្រិកខាងត្បូង

បានផុស

៤ ម៉ោង មុន

នៅ

ថ្ងៃសុក្រ ២៣ សីហា ២០២៤

ដោយ

គ្រាប់ពេជ្រដ៏ធំទំហំ ២៤៩២ការ៉ាត់ ដែលជាពេជ្រធំជាងគេលំដាប់ទី២នៅលើពិភពលោក ត្រូវបានគេរកឃើញនៅប្រទេសបុតស្វាណា ក្នុងតំបន់អាហ្វ្រិកខាងត្បូង ដោយក្រុមហ៊ុនរុករករ៉ែរបស់កាណាដា។

គ្រាប់ពេជ្រ ២៤៩២ការ៉ាត់ របស់ក្រុមហ៊ុន Lucara (រូបភាព៖ EPA)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុន Lucara Diamond បាននិយាយនៅក្នុងសេចក្តីថ្លែងការណ៍កាលពីថ្ងៃទី២២ខែសីហាថា គ្រាប់ពេជ្រនេះត្រូវបានគេរកឃើញនៅក្នុងអណ្តូងរ៉ែពេជ្រ Karowe នៅភាគឦសានប្រទេសបុតស្វាណា ដោយប្រើបច្ចេកវិទ្យាស្កេនកាំរស្មីអ៊ិច។

ក្រុមហ៊ុន Lucara មិនបានបញ្ជាក់អំពីតម្លៃប៉ាន់ស្មាននៃគ្រាប់ពេជ្រដែលមានទំហំប៉ុនបាតដៃនេះទេ។ ប៉ុន្តែបើតាមការចុះផ្សាយរបស់កាសែត Financial Times ប្រភពពីក្រុមហ៊ុន Lucara ដែលសុំមិនបង្ហាញអត្តសញ្ញាណ បានវាយតម្លៃថា ពេជ្រ១គ្រាប់នេះអាចលក់បានដល់ទៅ ៤០លានដុល្លារឯណោះ។

បើគិតពីទំហំការ៉ាត់ គ្រាប់ពេជ្រដែលទើបរកឃើញ គឺជាគ្រាប់ពេជ្រធំលំដាប់ទី២របស់ពិភពលោក បន្ទាប់ពីការរកឃើញគ្រាប់ពេជ្រ Cullinan ទំហំ ៣០១៦ការ៉ាត់ នៅអាហ្វ្រិកខាងត្បូងកាលពីឆ្នាំ១៩០៥។

ប្រធានក្រុមហ៊ុន Lucara លោក William Lamb បានរៀបរាប់ថា វាគឺជាការរកឃើញដ៏អស្ចារ្យ ដែលប្រើប្រាស់បច្ចេកវិទ្យា Mega Diamond Recovery X-ray របស់ក្រុមហ៊ុន ដែលបានដាក់ឲ្យដំណើរការនៅក្នុងឆ្នាំ២០១៧។

បុតស្វាណា គឺជាប្រទេសផលិតពេជ្រដ៏ធំបំផុតមួយរបស់ពិភពលោក។ ការផលិតពេជ្រ ត្រូវចាត់ទុកជាប្រភពចំណូលចម្បងរបស់បុតស្វាណា ដែលស្មើនឹង ៣០%នៃផលិតផលក្នុងស្រុកសរុប និង ៨០%នៃការនាំចេញ។

មុនពេលការរកឃើញគ្រាប់ពេជ្រដ៏ធំនេះ ក្រុមហ៊ុន Lucara ក៏ធ្លាប់រកឃើញគ្រាប់ពេជ្រធំមួយទៀតនៅអណ្ដូងរ៉ែ Karowe កាលពីឆ្នាំ២០១៩ផងដែរ ដោយកាលណោះគ្រាប់ពេជ្រដែលរកឃើញមានទំហំ ១៧៥៨ការ៉ាត់ ហើយដាក់ឈ្មោះឲ្យពេជ្រនោះថា «Sewelo»។

អណ្តូងរ៉ែពេជ្រ Karowe បានចាប់ផ្តើមបើកដំណើរការក្នុងឆ្នាំ២០១២ ដោយលក់ពេជ្របានចំនួន ២១៦គ្រាប់ ហើយក្នុង១គ្រាប់ៗមានតម្លៃជាង ១លានដុល្លារ និងពេជ្រប្រហែលជា ១១គ្រាប់ផ្សេងទៀតអាចលក់ក្នុង១គ្រាប់ៗបានជាង ១០លានដុល្លារ៕

ដោយ៖ ឈាង