ព័ត៌មានអន្ដរជាតិ

ពន្លឺនៃដំណើរការចរចាសន្តិភាព អ៊ុយក្រែន-រុស្ស៊ី លេចឡើង អំឡុងទស្សនកិច្ចរបស់ម៉ូឌី

បានផុស

៥ ខែ មុន

នៅ

ថ្ងៃសៅរ៍ ២៤ សីហា ២០២៤

ដោយ

ការរំពឹងទុកដ៏ទូលំទូលាយសម្រាប់ដំណើរការចរចាសន្តិភាពរវាងរុស្ស៊ីនិងអ៊ុយក្រែននៅពេលវត្តមានរបស់នាយករដ្ឋមន្ត្រីឥណ្ឌានៅក្នុងប្រទេសអ៊ុយក្រែនជាលើកដំបូង គឺពិតដូចការវិភាគរបស់អ្នកជំនាញការទូតនិងកិច្ចការអន្តរជាតិបានលើកឡើងនៅមុនដំណើរទស្សនកិច្ចជាប្រវត្តិសាស្រ្តនេះមកដល់។

ទោះបីមិនបង្ហាញច្បាស់លាស់ក្នុងរបៀបវារៈនៃដំណើរទស្សនកិច្ច វាក៏មិនមានភាពចៃដន្យណាមួយកើតឡើងដែរ សម្រាប់ដំណើរទស្សនកិច្ចលើកដំបូងរបស់នាយករដ្ឋមន្ត្រីឥណ្ឌា ណារ៉េនដ្រាន ម៉ូឌី ដែលត្រូវគេដឹងថា មានបំណងពន្លត់ភ្នក់ភ្លើងសង្គ្រាមដែលបានអូសបន្លាយអស់រយៈពេល៣០ខែគត់នៅថ្ងៃនេះ (២៤កុម្ភៈ២០២២-២៤សីហា២០២៤)។

លោក ម៉ូឌី កៀកស្មាលោក Zelensky មើលរូបភាពកុមារត្រូវសម្លាប់ដោយការវាយប្រហាររបស់រុស្ស៊ី។ Modi

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយជំនួបជាមួយប្រធានាធិបតីអ៊ុយក្រែន នាយករដ្ឋមន្ត្រីឥណ្ឌា បានបង្ហោះសារនៅលើបណ្តាញសង្គមហ្វេសប៊ុក Narendra Modi ផ្លូវការ របស់ខ្លួន ដោយបានលើកឡើងពីជំនួបពិភាក្សាលើការពង្រឹងកិច្ចសហប្រតិបត្តិការដែលបានគ្រោងទុក ហើយលើសពីនេះគឺការជជែកអំពីដំណើរការចរចាសន្តិភាពជាមួយភាគីរុស្ស៊ី។

លោក ម៉ូឌី បានសរសេរសារដែលមានខ្លឹមសារដើមថា៖«ប្រធានាធិបតី Volodymyr Zelensky និងខ្ញុំមានការពិភាក្សាប្រកបដោយប្រសិទ្ធភាពក្នុងទីក្រុងកៀវថ្ងៃនេះ[សុក្រ]។ ឥណ្ឌាចង់ពង្រឹងទំនាក់ទំនងសេដ្ឋកិច្ចជាមួយអ៊ុយក្រែន។ យើងបានពិភាក្សាអំពីវិធីជំរុញកិច្ចសហប្រតិបត្តិការក្នុងវិស័យកសិកម្ម បច្ចេកវិទ្យា វេជ្ជសាស្រ្ត និងវិស័យផ្សេងៗទៀត។ យើងក៏បានយល់ព្រមផងដែរក្នុងការពង្រឹងទំនាក់ទំនងវប្បធម៌បន្ថែមទៀត។

លោកម៉ូឌី ពិភាក្សាជាមួយ លោក Zelensky។ Modi

សារដែលសង្កត់ធ្ងន់លើការចរចាសន្តិភាព លោកម៉ូឌី សរសេរថា៖«យើងក៏មានការពិភាក្សាអំពីជម្លោះដែលកំពុងកើតឡើង។ វាមានសារៈសំខាន់បំផុតដែលសន្តិភាពត្រូវបានរក្សា។ ដំណោះស្រាយដោយសន្តិវិធីចំពោះជម្លោះគឺល្អបំផុតសម្រាប់មនុស្សជាតិ»។

ការធ្វើដំណើរទស្សនកិច្ចរបស់នាយករដ្ឋមន្ត្រីឥណ្ឌានៅពេលនេះ គឺកើតឡើងក្នុងរយៈពេលជាងមួយខែបន្ទាប់ពីនាយករដ្ឋមន្ត្រីឥណ្ឌា បានធ្វើដំណើរទស្សនកិច្ចដ៏ចម្រូងចម្រាសមួយទៅកាន់ទីក្រុងមូស្គូ កាលពីសប្តាហ៍ទី២នៃខែកក្កដា។

ក្នុងដំណើរទស្សនកិច្ចទៅកាន់ទីក្រុងមូស្គូនាពេលនោះ លោក Zelensky បានរិះគន់ដំណើរទស្សនកិច្ចរបស់លោក ម៉ូឌី ទៅកាន់ទីក្រុងមូស្គូកាលពីថ្ងៃទី៨ខែកក្កដា ដែលបង្កើតរូបភាពរបស់មេដឹកនាំឥណ្ឌាបានឱបគ្នាយ៉ាងកក់ក្តៅជាមួយប្រធានាធិបតីរុស្ស៊ី វ៉្លាឌីមៀរ ពូទីន (Vladimir Putin) ដែលកើតឡើងត្រឹមតែប៉ុន្មានម៉ោងបន្ទាប់ពីការវាយប្រហារដោយកាំជ្រួចរបស់ភាគីរុស្ស៊ីទៅលើមន្ទីរពេទ្យកុមារក្នុងទីក្រុងកៀវ ដោយបានសម្លាប់មនុស្សរាប់សិបនាក់។

ប៉ុន្តែ ជំនួបនៅថ្ងៃសុក្រ លោក Zelensky និងមន្ត្រីឥណ្ឌាបានបញ្ចេញសម្លេងផ្សះផ្សា ខណៈដែលលោកម៉ូឌីបានបង្ហាញខ្លួនគាត់ក្នុងការធ្វើដំណើរលើកដំបូងទៅកាន់ប្រទេសអ៊ុយក្រែនក្នុងនាមជាអ្នកបង្កើតសន្តិភាពអព្យាក្រឹត និងជាមេដឹកនាំដែលមានឥទ្ធិពលក្នុងកម្រិតអន្តរជាតិ។

យោងតាមការដកស្រង់របស់សារព័ត៌មាន The Washington Post នាយករដ្ឋមន្ត្រីឥណ្ឌា លោក ម៉ូឌី បាននិយាយថា៖«ខ្ញុំចង់ធានាដល់អ្នក[Zelensky]ថា ឥណ្ឌាត្រៀមខ្លួនរួចរាល់ហើយដើម្បីដើរតួនាទីយ៉ាងសកម្មក្នុងកិច្ចខិតខំប្រឹងប្រែងណាមួយឆ្ពោះទៅរកសន្តិភាព។ ខ្ញុំចង់ឱ្យយើងទាំងអស់គ្នាមើលឃើញពន្លឺនៃសន្តិភាពកាន់តែឆាប់បំផុត»។

លោក ម៉ូឌី បានកត់សម្គាល់ថា គាត់និងលោក Zelensky បានគោរពបូជាដល់កុមារដែលត្រូវបានសម្លាប់ក្នុងជម្លោះដោយយោងទៅលើការវាយប្រហារដោយកាំជ្រួចរបស់រុស្ស៊ីដែលស្របពេលជាមួយនឹងដំណើរទស្សនកិច្ចនៅទីក្រុងមូស្គូរបស់គាត់។ លោក ម៉ូឌី បាននិយាយថា៖«បេះដូងខ្ញុំនៅតែដក់ជាប់យ៉ាងជ្រាលជ្រៅ បន្ទាប់ពីខ្ញុំបានឃើញកន្លែងដែលកុមារត្រូវគេធ្វើឃាត»។

ជាការឆ្លើយតប លោក Zelensky បានសាទរចំពោះកិច្ចប្រជុំនេះថាជា «ប្រវត្តិសាស្ត្រ» ហើយបានហៅដំណើរទស្សនកិច្ចរបស់លោក ម៉ូឌី ថា «ជាសញ្ញានៃមិត្តភាពពិតប្រាកដ»។ នៅលើបណ្តាញសង្គម X លោក Zelensky បានកត់សម្គាល់ថាគាត់និងម៉ូឌី បាន«គោរពដល់ការចងចាំរបស់កុមារដែលជីវិតរបស់ពួកគេត្រូវបានចាប់យកដោយការឈ្លានពានរបស់រុស្ស៊ី»។

ចាប់តាំងពីសង្រ្គាមបានផ្ទុះឡើងក្នុងខែកុម្ភៈឆ្នាំ ២០២២ មន្ត្រីអ៊ុយក្រែនបានជំរុញឱ្យឥណ្ឌាថ្កោលទោសការឈ្លានពានរបស់រុស្ស៊ីលើអ៊ុយក្រែន និងប្រកាន់ជំហររឹងមាំជាងមុនប្រឆាំងនឹងរុស្ស៊ី ដែលជាដៃគូដ៏យូរលង់របស់ឥណ្ឌា ប៉ុន្តែឥណ្ឌាមិនដែលអើពើចំពោះការអំពាវនាវនេះ ដ៏ដូចជាបច្ចឹមប្រទេស ប៉ុន្តែឥណ្ឌាបានផ្តល់ជំនួយមនុស្សធម៌ទៅកាន់អ៊ុយក្រែន៕