ព័ត៌មានអន្ដរជាតិ

ច្បាប់ថ្មីនៅអូស្ត្រាលី អនុញ្ញាតឲ្យបុគ្គលិកមិនចាំបាច់អើពើនឹងថៅកែ ក្រោយម៉ោងការងារ

បានផុស

៦ ខែ មុន

នៅ

ថ្ងៃសៅរ៍ ២៤ សីហា ២០២៤

ដោយ

Chheang

ចាប់ពីថ្ងៃទី២៦ខែសីហាឆ្នាំ២០២៤តទៅ និយោជិតនៅអូស្ត្រាលីនឹងមានសិទ្ធិមិនអើពើជាមួយថៅកែរបស់ពួកគេបាននៅក្រោយពេលចប់ម៉ោងធ្វើការ នេះក៏ដោយសារតែការអនុម័តច្បាប់ថ្មីដែលចែងអំពី «សិទ្ធិក្នុងការផ្តាច់ទំនាក់ទំនង»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមពិតទៅ ច្បាប់ថ្មីនេះ ត្រូវបានអនុម័តតាំងពីខែកុម្ភៈមកម៉្លេះ តែទើបត្រូវចាប់ផ្ដើមអនុវត្តនៅថ្ងៃចន្ទសប្ដាហ៍ក្រោយ។ ក្នុងច្បាប់ថ្មី និយោជិតអាចបដិសេធមិនស្ថិតនៅក្រោមការត្រួតត្រា ឬឆ្លើយតបចំពោះការទាក់ទងពីនិយោជករបស់ពួកគេនៅខាងក្រៅម៉ោងការងារ។

និយោជកអាចប្រឈមនឹងការផាកពិន័យរហូតដល់ ១៨ ០០០ដុល្លារ បើរកឃើញថាបានបំពានច្បាប់នេះ។ ចំណែកឯនិយោជិតមិនអាចត្រូវបានរងការដាក់វិន័យ ឬបណ្តេញចេញ សម្រាប់ការបដិសេធទំនាក់ទំនងក្រៅម៉ោងធ្វើការដែលបានកំណត់របស់ពួកគេឡើយ។

ពាក់ព័ន្ធនឹងច្បាប់ថ្មី ក្រុមនិយោជកបានរិះគន់ថាច្បាប់នេះប្រញាប់ប្រញាល់ក្នុងការអនុម័តពេក និងនៅមានកំហុសឆ្គងនៅឡើយ។

សូមបញ្ជាក់ថា ច្បាប់ស្រដៀងគ្នានេះ ក៏មានចែងនៅក្នុងប្រទេសមួយចំនួនផងដែរដូចជា បារាំង អាល្លឺម៉ង់ និងបែលហ្ស៊ិក ដែលផ្តល់ឲ្យនិយោជិតនូវសិទ្ធិក្នុងការបិទទូរសព្ទរបស់ពួកគេ នៅពេលចប់ម៉ោងធ្វើការ៕

ដោយ៖ ឈាង

Related Topics:ប្រទេសអូស្ត្រាលី