ប្រទេសកាហ្សាក់ស្ថាន គ្រៀវបុរស១១នាក់ ដែល​រំលោភ​កុមារ

ប្រទេសកាហ្សាក់ស្ថាន បានប្រកាសពីការគ្រៀវទ្រង់ទ្រាយធំលើបុរសចំនួន១១នាក់ ដែលត្រូវចោទប្រកាន់ពីបទ​រំលោភ​បំពាន​ផ្លូវ​ភេទ​​អនីតិជន​នៅ​ក្នុង​ទីក្រុង Kostanay ភាគខាងជើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ត្បិតតែគ្មានការផ្តល់ព័ត៌មានលម្អិតជុំវិញករណីនេះក៏ពិតមែន ប៉ុន្តែសារព័ត៌មាន Daily Mail បានចុះផ្សាយកាលពីថ្ងៃសុក្រទី២៣ខែសីហាឆ្នាំ២០២៤ថា ជនរំលោភសេពសន្ថវៈកុមារទាំង១១នាក់ ត្រូវបានគ្រៀវដោយចាក់សារធាតុគីមី ២៤លើកក្នុងឆ្នាំនេះ។

ការកាត់ទោសនេះកើតឡើងចំពេលប្រទេសកាហ្សាក់ស្ថាន ធ្វើយុទ្ធនាការរឹតបន្តឹងច្បាប់បច្ចុប្បន្ន ដែលអនុញ្ញាតឲ្យគ្រៀវជនល្មើសផ្លូវភេទកុមារ ហើយវាកើតឡើង ស្របពេលមានការចាប់ខ្លួនអភិបាលរងក្រុង និងជាសមាជិកបក្សកាន់អំណាចលោក Sekikhan Zhakupov ដែលរងការចោទប្រកាន់ពីបទរំលោភផ្លូវភេទលើក្មេងប្រុសអាយុប្រាំពីរឆ្នាំ។

ប្រសិនបើ​ត្រូវបាន​កាត់ទោស​តាមច្បាប់​បច្ចុប្បន្ន អភិបាលរងរូបនេះ ​អាច​ប្រឈម​នឹង​ការគ្រៀវ​ដោយ​សារធាតុ​គីមី និង​​ជាប់​ពន្ធនាគារ​យូរឆ្នាំថែមទៀត។ មិនត្រឹមប៉ុណ្ណឹង ក្រោយចេញពីពន្ធនាគារ ព័ត៌មានអំពីអាស័យដ្ឋានរបស់គាត់ ក៏នឹងត្រូវផ្សព្វផ្សាយជាសាធារណៈផងដែរ ដើម្បីឲ្យឪពុកម្តាយទាំងឡាយ ស្គាល់ច្បាស់ពីកន្លែងដែលមានគ្រោះថ្នាក់។

សូមបញ្ជាក់ថា កាហ្សាក់ស្ថាន ស្ថិតក្នុងចំណោមប្រទេស ដែលមានច្បាប់តឹងតែងបំផុត ប្រឆាំងជនណាដែលរំលោភបំពានផ្លូវភេទកុមារ។ ក្នុងមួយឆ្នាំ បុរសកាហ្សាក់ស្ថានប្រហែល៣០នាក់ ត្រូវប្រឈមនឹងការគ្រៀវដោយប្រើសារធាតុគីមី ប៉ុន្តែគេជឿថា តួលេខនេះនឹងបន្តកើនឡើងទៀត៕

អត្ថបទ៖ សុខ សុវណ្ណ

ចុចអាន៖ រដ្ឋមួយនៅអាមេរិក នឹងចាប់គ្រៀវ អ្នករំលោភបំពានផ្លូវភេទអនីតិជន