ត្រឹមមួយសប្តាហ៍ ទឹកជំនន់ធ្ងន់ធ្ងរនៅភាគខាងជើងប្រទេសថៃ បណ្តាលឲ្យមនុស្សស្លាប់២២នាក់

តាមការចុះផ្សាយរបស់ Bangkok Post កាលពីថ្ងៃអាទិត្យទី២៥ខែសីហាឆ្នាំ២០២៤ ស្ថានភាពទឹកជំនន់នៅខេត្តចំនួន២២ នាភាគខាងជើងប្រទេសថៃ គឺនៅតែធ្ងន់ធ្ងរ ខណៈគិតត្រឹមមួយសប្តាហ៍ប៉ុណ្ណោះ មានមនុស្សស្លាប់រហូតដល់ទៅ២២នាក់ និងប៉ះពាល់ដល់ ៣០ ៨០៧គ្រួសារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលជាមួយគ្នានោះដែរ អាជ្ញាធរបានចេញការព្រមានឲ្យមន្ត្រីគ្រប់លំដាប់ថ្នាក់ ត្រូវចាត់វិធានការគ្រប់បែបយ៉ាង ដើម្បីទប់ស្កាត់គ្រោះមហន្តរាយនិងដោះស្រាយករណីចាំបាច់ណាមួយ។

ត្រឹមមួយសប្តាហ៍ គិតពីថ្ងៃទី១៦ដល់ថ្ងៃទី២២ខែសីហា, ទឹកជំនន់នៅខេត្តភាគខាងជើង​ បានបណ្តាលឲ្យមនុស្សចំនួន២២នាក់បាត់បង់ជីវិត ដោយក្នុងនោះ គ្រាន់តែ ភូកេត មានមនុស្សស្លាប់ដល់ទៅ១៣នាក់ឯណោះ។

ដោយឡែក អភិបាលរងក្រុងបាងកក លោក Wissanu Sapsompol ក៏បញ្ជាក់ដែរថា សាលាក្រុងកំពុងពិនិត្យកម្រិតទឹកនៅតាមដងទន្លេ Chao Phraya យ៉ាងដិតដល់ជាទីបំផុតនិងចែករំលែកទិន្នន័យជាមួយនាយកដ្ឋានធារាសាស្ត្រ មជ្ឈមណ្ឌលរដ្ឋបាលទឹកជាតិ និង ការិយាល័យធនធានទឹកជាតិ។

លោក Surasee Kittimonthon អគ្គលេខាធិការ ONWR កាលពីថ្ងៃអាទិត្យ បាននិយាយថា កម្ពស់ទឹកក្នុងទន្លេមេគង្គនៅតែបន្តកើនឡើង និងប៉ះពាល់ដល់តំបន់វាលទំនាបនៅភាគខាងជើង។

ទន្ទឹមនោះ លោកនិយាយថា ONWR បានផ្ញើសេចក្តីជូនដំណឹងបន្ទាន់មួយទៅកាន់លេខាធិការដ្ឋានគណៈកម្មការទន្លេមេគង្គ (MRCS) រួចហើយ ដោយស្នើសុំឲ្យបង្កើនការឃ្លាំមើលស្ថានភាពទឹកជំនន់ក្នុងខេត្តចំនួន៨គឺ Chiang Rai, Loei, Nong Khai, Bueng Kan, Nakhon Phanom, Mukdahan, Amnat Charoen និង Ubon Ratchathani។

លិខិត​នោះ​ក៏​ជំរុញ​ឲ្យ​ក្រុមមន្ត្រី​ រាយការណ៍​ពី​ស្ថានភាព​ទឹកជំនន់ដល់​ប្រទេស​ជាសមាជិក​រួម​មាន​កម្ពុជា ឡាវ និង​វៀតណាមផងដែរ៕

អត្ថបទ៖ សុខ សុវណ្ណ

ចុចអាន៖ គីម ជុងអ៊ុន ប្តេជ្ញានាំជនរងគ្រោះដោយទឹកជំនន់ជាង ១៥ ០០០នាក់ ទៅទីក្រុងព្យុងយ៉ាង