ព័ត៌មានអន្ដរជាតិ

មនុស្សស្លាប់២០នាក់ និងជាង៥លាននាក់រងផលប៉ះពាល់ ព្រោះទឹកជំនន់នៅបង់ក្លាដែស

បានផុស

៦ ខែ មុន

នៅ

ថ្ងៃចន្ទ ២៦ សីហា ២០២៤

ដោយ

Chheang

យ៉ាងហោចណាស់មនុស្ស២០នាក់បានស្លាប់ និងជាង៥,២លាននាក់បានរងផលប៉ះពាល់នៅក្នុងប្រទេសបង់ក្លាដែសដោយសារតែទឹកជំនន់ដែលបណ្តាលមកពីភ្លៀងមូសុងធ្លាក់មិនឈប់មិនឈរ និងការកើនឡើងនៃទឹកទន្លេ។

សកម្មភាពចុះជួយសង្គ្រោះប្រជាជននៅភូមិ Feni ប្រទេសបង់ក្លាដែស (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រជាជនជាច្រើនត្រូវជាប់គាំងខ្លួន ហើយកំពុងមានតម្រូវការបន្ទាន់នូវស្បៀងអាហារ ទឹកស្អាត ថ្នាំពេទ្យ និងសម្លៀកបំពាក់។ ចំណែកប្រជាជនខ្លះរស់នៅតំបន់ដាច់ស្រយាល ហើយផ្លូវក្នុងស្រុកជាច្រើនត្រូវបានកាត់ផ្ដាច់ ដែលជាហេតុរារាំងដល់កិច្ចខិតខំប្រឹងប្រែងរបស់ក្រុមជួយសង្គ្រោះ។

នាយករដ្ឋមន្ត្រីបណ្ដោះអាសន្ន លោក Mohammad Yunus បាននិយាយនៅក្នុងសុន្ទរកថាតាមទូរទស្សន៍កាលពីថ្ងៃទី២៥ខែសីហាថា រដ្ឋាភិបាលបានអនុម័តវិធានការចាំបាច់ទាំងអស់ ដើម្បីធានាឲ្យមានការវិលមករកភាពប្រក្រតីវិញយ៉ាងឆាប់រហ័សសម្រាប់ជនរងគ្រោះដោយសារទឹកជំនន់ ក្រោមការសម្របសម្រួលរវាងស្ថាប័នរដ្ឋ និងស្ថាប័នឯកជន។

លោក Abdul Halim ជាកសិករមួយរូបវ័យ៦៥ឆ្នាំមកពីភូមិមួយនៅក្នុងស្រុក Comilla បាននិយាយថា ខ្ទមរបស់គាត់ត្រូវបានទឹកហូរកួចយកទៅភ្លាមៗ ហើយទឹកជំនន់មានកម្ពស់ដល់ទៅ ៣ម៉ែត្រកាលពីពាក់កណ្តាលយប់។ កសិកររូបនេះបានប្រាប់ទីភ្នាក់ងារព័ត៌មាន Reuters ថា៖ «មិនមានទំនិញ និងទឹកស្អាតទេ។ កម្រមាននរណាម្នាក់បានចូលមកជួយដល់ក្នុងភូមិណាស់។ អ្នកត្រូវតែទៅជិតផ្លូវធំដើម្បីយកជំនួយ»។

ប្រជាជនមួយចំនួន បានចោទប្រកាន់ថា ទឹកជំនន់បណ្តាលមកពីការបើកទ្វារទឹកទំនប់នៅឥណ្ឌាដែលជាប្រទេសជិតខាងរបស់បង់ក្លាដែស។ យ៉ាងណា រដ្ឋាភិបាលឥណ្ឌាបានច្រានចោលនូវការចោទប្រកាន់បែបនេះ។

នាយករដ្ឋមន្ត្រីបណ្ដោះអាសន្នបង់ក្លាដែស បាននិយាយថា៖ «យើងបានចាប់ផ្តើមពិភាក្សាជាមួយប្រទេសជិតខាង ដើម្បីការពារស្ថានភាពទឹកជំនន់នាពេលអនាគត»។

នាយកដ្ឋានឧតុនិយមបង់ក្លាដែស បានព្រមានថា ស្ថានភាពទឹកជំនន់អាចនឹងបន្តកើតមាន ប្រសិនបើភ្លៀងមូសុងនៅតែបន្ត ខណៈកម្រិតទឹកដែលកំពុងស្រកមានសភាពយឺតខ្លាំង។ អាជ្ញាធរបានឲ្យដឹងថា មនុស្សជាង ៤០ម៉ឺននាក់បានជ្រកកោននៅក្នុងជុំរុំភៀសខ្លួនចំនួន ៣៥០០ទីតាំង នៅក្នុងស្រុកភូមិដែលរងគ្រោះដោយសារតែទឹកជំនន់៕

ដោយ៖ ឈាង