ជនភៀសខ្លួនរ៉ូហ៊ីងយ៉ាទាមទារឲ្យបញ្ចប់អំពើហិង្សានៅ​មីយ៉ាន់ម៉ា

ជនភៀសខ្លួនរ៉ូហ៊ីងយ៉ារាប់ម៉ឺននាក់នៅក្នុងប្រទេសបង់ក្លាដែសបានប្រមូលផ្តុំគ្នានៅក្នុងជំរុំដើម្បីប្រារព្ធខួប៧​ឆ្នាំ​នៃការបង្ក្រាបដោយប្រើ​កម្លាំង​យោធានៅក្នុងប្រទេសមីយ៉ាន់ម៉ាដែលបានបង្ខំឱ្យពួកគេភៀសខ្លួន​ទៅ​កាន់​ប្រទេស​ផ្សេង​ៗ ដើម្បីសុវត្ថិភាព​។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី២៦ខែសីហានេះ។

ជនភៀសខ្លួនមានតាំងពីកុមាររហូតដល់មនុស្សចាស់បាន​កាន់​បដា គ្រវីទង់​ និងស្រែកពាក្យស្លោកកាលពីថ្ងៃអាទិត្យនៅក្នុងជំរុំក្នុងទីក្រុង Cox’s Bazar ដោយទាមទារឱ្យបញ្ចប់អំពើហិង្សា និងការវិលត្រឡប់របស់ពួកគេទៅកាន់ប្រទេសមីយ៉ាន់ម៉ាវិញដោយសុវត្ថិភាព។ មនុស្ស​ជា​ច្រើន​នាក់​ក៏​បាន​ពាក់​បូ​ដែល​មាន​ពាក្យ​ថា «ការ​ចងចាំ​អំពី​អំពើ​ប្រល័យ​ពូជសាសន៍​រ៉ូហ៊ីងយ៉ា» ហើយផ្ទាំងបដារបស់ពួកគេខ្លះបានសរសេរថា «ក្តីសង្ឃឹមត្រឡប់ទៅផ្ទះ» និង «ពួកយើងជនជាតិរ៉ូហ៊ីងយ៉ាគឺជាពលរដ្ឋនៃប្រទេសមីយ៉ាន់ម៉ា»។

គួរបញ្ជាក់ថា ជាយូរ​មក​ហើយ ជនជាតិរ៉ូហ៊ីងយ៉ាដែលភាគច្រើនជាជនជាតិភាគតិចមូស្លីម ជាគោលដៅនៃការរើសអើង និង​អំពើហិង្សា​នៅ​ប្រទេសមីយ៉ាន់ម៉ា។ ក្នុងឆ្នាំ២០១៧ យ៉ាងហោចណាស់ ជនជាតិរ៉ូហ៊ីងយ៉ា ៧៥ម៉ឺន​នាក់បានភៀសខ្លួនទៅកាន់ប្រទេសជិតខាងបង់ក្លាដែស បន្ទាប់ពីយោធាមីយ៉ាន់ម៉ាបានបើកការបង្ក្រាបដែលឥឡូវនេះបានក្លាយជាសំណុំរឿងក្ដីប្រល័យពូជសាសន៍នៅតុលាការយុត្តិធម៌អន្តរជាតិនៅទីក្រុងឡាអេ។

ក្នុងប៉ុន្មានសប្តាហ៍ថ្មីៗនេះ ជនជាតិរ៉ូហ៊ីងយ៉ារាប់ពាន់នាក់ទៀតត្រូវបានគេរាយការណ៍ថា បានភៀសខ្លួនចេញពី​រដ្ឋ​រ៉ាឃីន​ភាគ​ខាងលិចប្រទេសមីយ៉ាន់ម៉ាទៅកាន់ប្រទេសបង់ក្លាដែស ខណៈដែលការប្រយុទ្ធកាន់តែកើនឡើងរវាងរបបយោធា និងកងទ័ពអារ៉ាកាន (Arakan)ដែលជាក្រុមប្រដាប់អាវុធជនជាតិភាគតិចដ៏មានឥទ្ធិពលដែលជ្រើសរើសពីភាគច្រើននៃពុទ្ធសាសនិក។

ក្រុមវេជ្ជសាស្ត្រអន្តរជាតិ វេជ្ជបណ្ឌិតគ្មានព្រំដែន ដែលស្គាល់ដោយអក្សរកាត់ MSF បានឲ្យដឹងថាក្រុមការងាររបស់ខ្លួននៅ Cox’s Bazar បានព្យាបាលមនុស្ស៣៩នាក់ដែលមានរបួសដែលទាក់ទងនឹងជម្លោះ អំពើហិង្សា រួមទាំងរបួសគ្រាប់កាំភ្លើង ក្នុងរយៈពេល ៤ ថ្ងៃរហូតដល់ថ្ងៃទី ៧ខែសីហា ខណៈជាង៤០ ភាគរយនៃអ្នករងរបួសគឺជាស្ត្រី និងកុមារ។

អង្គការយូនីសេហ្វក៏បានបង្កើនការព្រមានអំពីស្ថានភាពកាន់តែអាក្រក់នៅក្នុងរដ្ឋរ៉ាឃីន ដោយលើកឡើងពីការកើនឡើងនូវរបាយការណ៍នៃជនស៊ីវិល ជាពិសេសកុមារដែលត្រូវបានចាប់ខ្លួននៅក្នុងការបាញ់ប្រហារនេះ ខណៈប្រាំពីរឆ្នាំបន្ទាប់ពីការបណ្តេញចេញពីប្រទេសមីយ៉ាន់ម៉ា ដែលក្នុងនោះមានកុមារជនភៀសខ្លួនរ៉ូហ៊ីងយ៉ាប្រហែលកន្លះលាននាក់កំពុងធំធាត់នៅក្នុងជំរុំជនភៀសខ្លួនដ៏ធំបំផុតរបស់ពិភពលោក ។

ទន្ទឹមនឹងនេះ រដ្ឋមន្ត្រីការបរទេសបង់ក្លាដែស លោក Mohammad Touhid Hossain បានប្រាប់ទីភ្នាក់ងារព័ត៌មាន Reuters នៅខែនេះថា ប្រទេសផ្សេងទៀតដែលនៅជិតខាងមីយ៉ាន់ម៉ា ដូចជាឥណ្ឌា គួរតែធ្វើអ្វីបន្ថែមទៀត។លោក Hossain ក៏បានអំពាវនាវឱ្យមានសម្ពាធអន្តរជាតិបន្ថែមទៀតលើកងទ័ព Arakan ឱ្យបញ្ឈប់ការវាយប្រហារលើជនជាតិរ៉ូហ៊ីងយ៉ានៅក្នុងរដ្ឋរ៉ាឃីន។

គួររំឭកថាប្រទេសមីយ៉ាន់ម៉ាបានធ្លាក់ចូលទៅក្នុងភាពមិនប្រាកដប្រជានិងវឹកវរក្នុងខែកុម្ភៈ ឆ្នាំ២០២១ នៅពេលដែលយោធាបានដណ្តើមអំណាចពីរដ្ឋាភិបាលរបស់លោកស្រី Aung San Suu Ky។ ការដណ្តើមអំណាចនេះបានបង្កឱ្យមានបាតុកម្មទ្រង់ទ្រាយធំប្រឆាំងនឹងការគ្រប់គ្រងរបស់យោធាដែលបានវិវត្តទៅជាការបះបោរប្រដាប់អាវុធនៅពេលដែលយោធាបានឆ្លើយតបដោយប្រើកម្លាំង៕

អត្ថបទ៖ ប៊ុន សុភាព