ព័ត៌មានអន្ដរជាតិ

ទឹកជំនន់សម្លាប់មនុស្ស១៤នាក់នៅភាគខាងជើងឥណ្ឌូណេស៊ី

បានផុស

៥ ខែ មុន

នៅ

ថ្ងៃចន្ទ ២៦ សីហា ២០២៤

ដោយ

យ៉ាងហោចមនុស្ស១៤នាក់បានស្លាប់ ២នាក់រងរបួស និងមនុស្ស៨នាក់ទៀតបានបាត់ខ្លួននៅក្នុងខេត្ត Maluku ភាគខាងជើងនៃប្រទេសឥណ្ឌូណេស៊ីកាលពីថ្ងៃអាទិត្យ បន្ទាប់ពីទឹកជំនន់យ៉ាងគំហុកបានវាយប្រហារខេត្តនេះបង្កផលប៉ះពាល់មនុស្សរាប់ពាន់នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារគ្រប់គ្រងគ្រោះមហន្តរាយរបស់ឥណ្ឌូណេស៊ី (BNPB) បានឲ្យដឹងថា ទឹកជំនន់ដែលបង្កឡើងដោយភ្លៀងធ្លាក់ខ្លាំងចាប់តាំងពីថ្ងៃសៅរ៍មកបានបំផ្លាញផ្ទះចំនួន១០ខ្នងយ៉ាងធ្ងន់ធ្ងរ ខូចខាតធុនស្រាលរាប់សិប និងខូចខាតហេដ្ឋារចនាសម្ព័ន្ធផ្សេងៗទៀតនៅក្នុងទីក្រុង Ternate ខណៈមានការព្យាករថា ភ្លៀងធ្លាក់ខ្លាំងអាចនឹងបន្តនៅប៉ុន្មានថ្ងៃខាងមុខថែមទៀត។ BNPB ក៏បានព្រមានអ្នកស្រុកឱ្យមានការប្រុងប្រយ័ត្នខ្ពស់និងធ្វើតាមការណែនាំរបស់អាជ្ញាធរលើបញ្ហាគ្រោះទឹកជំនន់ជាបន្តបន្ទាប់។

ជាមួយគ្នានេះ BNPB ក៏បានដាក់ពង្រាយក្រុមការងារដើម្បីជួយជម្លៀសជនរងគ្រោះ និងស្វែងរក ដើម្បីជម្លៀសជនរងគ្រោះដែលរងគ្រោះដោយការរអិលបាក់ដី និងកម្ទេចកំទីដែលហូរកាត់តាមរយៈទឹកជំនន់ដែលកំពុងបន្តវាយប្រហារ។

កាលពីខែឧសភា គ្រោះទឹកជំនន់និងបំណាក់ដីនៅខេត្តស៊ូម៉ាត្រាភាគខាងលិចឥណ្ឌូណេស៊ី បានសម្លាប់មនុស្សជាង៦០នាក់ ស្របពេលដែលពិភពលោកកំពុងជួបប្រទះនូវបញ្ហាការប្រែប្រួលអាកាសធាតុដ៏ធ្ងន់ធ្ងរ។ មិនត្រឹមតែឥណ្ឌូនេស៊ី ប៉ុណ្ណោះទេ ប្រទេសផ្សេងៗទៀតដូចជាប្រទេសបង់ក្លាដែល ឥណ្ឌា ក៏កំពុងប្រឈមនឹងបញ្ហាទឹកជំនន់ដ៏ធ្ងន់ធ្ងរដែលបណ្ដាលឲ្យជម្លៀសមនុស្សរាប់ម៉ឺននាក់៕