ព័ត៌មានអន្ដរជាតិ

លោក គីម អំពាវនាវឲ្យផលិតដ្រូនអត្តឃាតឲ្យបានច្រើនថែមទៀត

បានផុស

៦ ខែ មុន

នៅ

ថ្ងៃចន្ទ ២៦ សីហា ២០២៤

ដោយ

Chheang

លោក គីម ជុងអ៊ុន (Kim Jong Un) បានអំពាវនាវឲ្យមានការអភិវឌ្ឍ និងការផលិត «ដ្រូនអត្តឃាត» បន្ថែមទៀត ខណៈដែលបុរសខ្លាំងកូរ៉េខាងជើងរូបនេះបានចុះត្រួតពិនិត្យ «ការសាកល្បងសមត្ថភាព» ដោយជោគជ័យ នៃដ្រូនប្រយុទ្ធ និងចារកម្មជាច្រើនប្រភេទរបស់ខ្លួន។

លោក គីម ជុងអ៊ុន កំពុងមើលការសាកល្បងសមត្ថភាពដ្រូន (រូបភាព៖ KCNA)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រព័ន្ធផ្សព្វផ្សាយកូរ៉េខាងជើង KCNA បានរាយការណ៍នៅថ្ងៃទី២៦ខែសីហាថា លោក គីម បានមើលការសាកល្បងនៃដ្រូនដែលបើកការវាយប្រហារតាមដែនសមុទ្រ និងដីគោកជាច្រើន ដែលបង្កើតឡើងដោយវិទ្យាស្ថាន Drone របស់កូរ៉េខាងជើង កាលពីថ្ងៃសៅរ៍សប្ដាហ៍មុន។ KCNA ផ្សាយថា ដ្រូនទាំងអស់នោះបាន «កំណត់អត្តសញ្ញាណ និងកម្ទេចគោលដៅបានយ៉ាងត្រឹមត្រូវ បន្ទាប់ពីហោះហើរតាមផ្លូវកំណត់ទុកជាមុនផ្សេងៗគ្នា»។

រូបថតដែលភ្ជាប់មកជាមួយរបាយការណ៍របស់ KCNA បានបង្ហាញពីរូបភាពមិនច្បាស់នៃដ្រូនអត្តឃាតពណ៌សចំនួន២គ្រឿងវាយប្រហារគោលដៅ រួមទាំងរូបភាពដ៏គួរឲ្យភ្ញាក់ផ្អើលដែលបង្ហាញពីដ្រូន១គ្រឿងបានបំផ្លាញនូវអ្វីដែលមើលទៅដូចជាគំរូនៃរថក្រោះប្រយុទ្ធ K-2 ដ៏សំខាន់របស់ប្រទេសកូរ៉េខាងត្បូង។

បន្ទាប់ពីឃើញពីជោគជ័យ និងសារៈសំខាន់កាន់តែខ្លាំងឡើងរបស់ដ្រូននៅលើសមរភូមិ មេដឹកនាំកូរ៉េខាងជើងបាននិយាយថា ការអភិវឌ្ឍប្រភេទអាវុធផ្សេងៗគ្នា និងការបង្កើនសមត្ថភាពប្រយុទ្ធជាលំដាប់របស់ដ្រូន គឺជារឿងចាំបាច់ក្នុងការត្រៀមខ្លួនសម្រាប់សង្គ្រាម ដើម្បីប្រើប្រាស់នៅក្នុងកងពលថ្មើរជើងយុទ្ធសាស្ត្រ និងអង្គភាពប្រតិបត្តិការពិសេស ក៏ដូចជាដ្រូនឈ្លបយកការណ៍យុទ្ធសាស្ត្រ និងដ្រូនវាយប្រហារពហុបំណង។

សូមបញ្ជាក់ថា នៅឯពិព័រណ៍អាវុធ និងព្យុហយាត្រាយោធាកាលពីខែកក្កដាឆ្នាំ២០២៣ ទីក្រុងព្យុងយ៉ាងបានបង្ហាញជាលើកដំបូងនូវប្រភេទដ្រូនថ្មីចំនួន២ដែលមានលក្ខណៈស្រដៀងទៅនឹងដ្រូន Global Hawk ខ្នាតធំ និងដ្រូន Reaper ខ្នាតមធ្យមរបស់សហរដ្ឋអាមេរិក។

កាលពីខែមករា កូរ៉េខាងជើងបាននិយាយថា ខ្លួនក៏បានសាកល្បងដ្រូនវាយប្រហារក្រោមទឹក ដែលមានសមត្ថភាពបំពាក់នុយក្លេអ៊ែរ ហើយត្រូវបានរចនាឡើងដើម្បីកម្ទេចនាវាកងទ័ពជើងទឹក និងកំពង់ផែ។ ការសាកល្បងនេះធ្វើឡើងជាការឆ្លើយតបទៅនឹងសមយុទ្ធកងទ័ពជើងទឹករួមគ្នាដោយកូរ៉េខាងត្បូង សហរដ្ឋអាមេរិក និងជប៉ុន។

មិនខុសពីលើកមុន ការសាកល្បងដ្រូនអត្តឃាតចុងក្រោយនេះ បានកើតឡើងចំពេលដែលសហរដ្ឋអាមេរិក និងកូរ៉េខាងត្បូងបានបន្តធ្វើសមយុទ្ធយោធារួមគ្នាទ្រង់ទ្រាយធំ ដែលលោក គីម អះអាងថាវាជាសមយុទ្ធសម្រាប់ការឈ្លានពាន៕

ដោយ៖ ឈាង

Related Topics:ប្រទេសកូរ៉េខាងជើង