ហ្វីលីពីន រកឃើញករណីឆ្លងជំងឺ mpox ក្នុងសហគមន៍បន្ថែមទៀត

តាមការចុះផ្សាយរបស់ CNA នៅថ្ងៃចន្ទទី២៦ខែសីហាឆ្នាំ២០២៤ ពេលនេះប្រទេសហ្វីលីពីន បានបញ្ជាក់ពីការរកឃើញករណីឆ្លងជំងឺ mpox ក្នុងសហគមន៍ចំនួន២ករណីបន្ថែមទៀត ប៉ុន្តែនោះសុទ្ធតែជាពូជ Clade 2 ដែលមិនសូវកាចសាហាវដូច Clade 1b នោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីក្រសួងក្រសួងសុខាភិបាល Teodoro Herbosa បានឲ្យដឹងថា នេះគឺជាករណីឆ្លងជំងឺ mpox ក្នុងសហគមន៍ ជាពិសេសនៅទីក្រុងម៉ានីលតែម្តង។ ករណីថ្មីនេះគឺត្រូវបានរកឃើញលើបុរសអាយុ៣៧ឆ្នាំម្នាក់និងបុរសអាយុ៣៣ឆ្នាំម្នាក់ នៅម៉ានីល។

បូករួមទាំងករណី២នេះទៀត មានន័យថា ហ្វីលីពីន មានការឆ្លងជំងឺ mpox សរុប១២ករណីហើយ គិតចាប់ពីខែកក្កដាឆ្នាំ២០២២មក។

ទោះបីជាយ៉ាងណាក៏ដោយ ទាំងនោះសុទ្ធសឹងជាជំងឺ mpox ពូជ Clade 2 មិនសូវគ្រោះថ្នាក់ដូចពូជ Clade 1b ដែលអង្គការសុខភាពពិភពលោក កំពុងព្រួយបារម្ភខ្លាំងនោះទេ។

បច្ចុប្បន្ននេះ ជំងឺ mpox ពូជគ្រោះថ្នាក់ Clade 1b កំពុងជាក្តីបារម្ភខ្លាំងបំផុតនៅក្នុងសហគមន៍វេជ្ជសាស្ត្រពិភពលោក ខណៈដែលមេរោគពូជថ្មីដ៏កាចសាហាវនេះ បានធ្លាយចេញពីតំបន់អាហ្វ្រិក ឆ្លងរាលដាលដល់ប្រទេសស៊ុយអែតនិងថៃហើយ។​​

Clade 1B បានផ្ទុះឡើងដំបូងនៅសាធារណរដ្ឋប្រជាធិបតេយ្យកុងហ្គោ ហើយឆ្លងរាលដាលក្នុងទ្វីបអាហ្វ្រិកបណ្តាលឲ្យមានមនុស្សស្លាប់រាប់សិបនាក់រួចទៅហើយ។

សម្រាប់រោគសញ្ញា, ជំងឺ mpox បណ្តាលឲ្យកើតកន្ទួលលើស្បែកឈានដល់ពងបែក ឬដំបៅនៅគ្រប់ទីកន្លែងលើរាងកាយ រួមទាំងប្រដាប់ភេទផងដែរ។ រោគសញ្ញាផ្សេងទៀតមានដូចជាគ្រុនក្តៅ ឈឺក្បាល ឈឺខ្នង ឈឺសាច់ដុំ ឈឺសន្លាក់ ឡើងកូនកណ្តុរ ញ័រញាក់ និងអស់កម្លាំង៕

អត្ថបទ៖ សុខ សុវណ្ណ

ចុចអាន៖ ជំងឺ mpox ពូជកាចសាហាវ កំពុងធ្វើឲ្យពិភពលោក ព្រួយបារម្ភខ្លាំង