ព័ត៌មានអន្ដរជាតិ

មេ Telegram ប្រឈមការចោទប្រកាន់ ១២ករណីនៅបារាំង

បានផុស

៥ ខែ មុន

នៅ

ថ្ងៃអង្គារ ២៧ សីហា ២០២៤

ដោយ

តាមការចុះផ្សាយរបស់ NTD នៅថ្ងៃអង្គារទី២៧ខែសីហាឆ្នាំ២០២៤, រដ្ឋអាជ្ញាទីក្រុងប៉ារីសលោក Laure Beccuau បានបង្ហាញបញ្ជីមួយដែលក្នុងនោះគេមើលឃើញថា មានការចោទប្រកាន់ចំនួន១២ករណីប្រឆាំងនឹងស្ថាបនិក Telegram លោក Pavel Durov ក្រោយការចាប់ខ្លួននៅក្នុងប្រទេសបារាំង កាលពីថ្ងៃទី២៤ខែសីហា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុង១២ករណីនេះ គឺបូករួមទាំងការចោទប្រកាន់ធ្ងន់ធ្ងរមួយចំនួនផងដែរដូចជាពាក់ព័ន្ធការចែកចាយរូបភាពអាសអាភាសរបស់កុមារ បទល្មើសទាក់ទងនឹងគ្រឿងញៀន ការក្លែងបន្លំ និងលាងលុយកខ្វក់។

លើសពីនេះ លោក Durov ថែមទាំងរងការចោទប្រកាន់ពីបទបដិសេធសហការជាមួយអាជ្ញាធរលើសំណើផ្តល់ទិន្នន័យដោយស្របច្បាប់ និងសមគំនិតចែកចាយឧបករណ៍ឧក្រិដ្ឋកម្មតាមអ៊ីនធឺណិតទៀតផង។

ខាងក្រោយនេះគឺជាការចោទប្រកាន់លម្អិតទាំង១២ករណី ដែលលោក Durov ត្រូវប្រឈមមុខ៖

ចូលដៃក្នុងការគ្រប់គ្រងគេហទំព័រវេទិកាអនឡាញ ដើម្បីជួយសម្រួលដល់ប្រតិបត្តិការខុសច្បាប់នៅក្នុងក្រុមឆបោក។
បដិសេធសំណើរបស់អាជ្ញាធរមានសមត្ថកិច្ច ក្នុងការផ្តល់ព័ត៌មានឬឯកសារចាំបាច់ដោយស្របច្បាប់។
សមគំនិតរក្សាទុករូបភាពអាសអាភាសរបស់អនីតិជន។
ចែកចាយ ឬបង្កើតរូបភាពអាសអាភាសសម្រាប់អនីតិជន នៅក្នុងក្រុមខិលខូច។
បទល្មើសពាក់ព័ន្ធនឹងគ្រឿងញៀន រួមមាន ការទទួលបាន កាន់កាប់ និងលក់សារធាតុញៀន។
ចូលដៃក្នុងការផ្តល់ លក់ ឬការចែកចាយឧបករណ៍ កម្មវិធី ឬទិន្នន័យដែលត្រូវបានបង្កើតឡើងឬកែ ដើម្បីចូលទៅបំផ្លាញប្រព័ន្ធដំណើរការទិន្នន័យដោយស្វ័យប្រវត្តិទាំងដែលគ្មានហេតុផលស្របច្បាប់។
ចូលដៃប្រព្រឹត្តអំពើឆបោកជាមួយក្រុមខិលខូច។
ឃុបឃិតគ្នាប្រព្រឹត្តបទឧក្រិដ្ឋ ឬបទល្មើស។
លាងលុយកខ្វក់ដែលបានមកពីក្រុមប្រព្រឹត្តបទល្មើស និងឧក្រិដ្ឋកម្ម។
ផ្តល់សេវាដោះកូដ (crypto) ដោយសម្ងាត់។
ផ្តល់ឧបករណ៍ដោះកូដ crypto ដោយគ្មានការប្រកាសជាមុនទេ។
នាំចូលឧបករណ៍ដោះកូដ crypto ដោយគ្មានការប្រកាសជាមុន។

ត្បិតតែការចោទប្រកាន់ទាំង១២ករណីខាងលើមិនបង្ហាញថា តើបទល្មើសមួយៗត្រូវជាប់គុកប៉ុន្មានឆ្នាំក៏ពិតមែន ប៉ុន្តែមុននេះអាជ្ញាធរបារាំង បានឲ្យដឹងថា លោក Durov ត្រូវប្រឈមនឹងការជាប់ពន្ធនាគាររយៈពេល២០ឆ្នាំ បើត្រូវចោទប្រកាន់មែន៕

អត្ថបទ៖ សុខ សុវណ្ណ

ចុចអាន៖ រុស្ស៊ី ប្រតិកម្មខ្លាំងៗចំពោះការចាប់ខ្លួនមេ Telegram នៅបារាំង