រុស្ស៊ី វាយប្រហារទ្រង់ទ្រាយធំលើអ៊ុយក្រែន មួយថ្ងៃបាញ់មីស៊ីល១២៧គ្រាប់ និងដ្រូន ១០៩គ្រឿង

មេបញ្ជាការកងទ័ពអាកាសអ៊ុយក្រែន Mykola Oleshchuk បញ្ជាក់យ៉ាងច្បាស់ថា រុស្ស៊ីបានបើកការវាយប្រហារទ្រង់ទ្រាយធំបំផុតមួយ សឹងតែទូទាំងប្រទេសអ៊ុយក្រែនទៅហើយ ដោយក្នុងនោះមានការបាញ់មីស៊ីលអស់ចំនួន១២៧គ្រាប់ និងដ្រូន១០៩គ្រឿង កាលពីថ្ងៃចន្ទទី២៦ខែសីហាឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC, ក្នុងការវាយប្រហារនោះ ទីក្រុងកៀវអះអាងថា ភាគច្រើនគឺកំណត់គោលដៅលើហេដ្ឋារចនាសម្ព័ន្ធស៊ីវិលសំខាន់ៗ ដោយថែមទាំងសម្លាប់មនុស្សចំនួន៧នាក់ទៀតផង។

ស្របពេលជាមួយគ្នានោះ ប្រធានាធិបតីអ៊ុយក្រែន លោក Volodymyr Zelensky ក៏បង្ហោះនៅលើ Telegram ដែរថា «នេះគឺជាការវាយប្រហារធំបំផុតមួយ ដោយមានមីស៊ីលជាង១០០គ្រាប់ និងដ្រូនប្រភេទ Shahed ប្រហែល១០០គ្រឿង»។

ជុំវិញការឡើងកម្តៅថ្មីនេះ ទីក្រុងមូស្គូប្រកាសនៅថ្ងៃនោះថា ខ្លួនបានបើកការវាយប្រហារដ៏ធំមួយលើហេដ្ឋារចនាសម្ព័ន្ធថាមពលរបស់អ៊ុយក្រែន និងវាយលុកគ្រប់គោលដៅទាំងអស់ ខណៈក្រសួងការពារជាតិរុស្ស៊ីបញ្ជាក់ពីការកំណត់គោលដៅលើរោងចក្រថាមពលអគ្គិសនីនៅក្នុងតំបន់ចំនួន៩ រួមទាំងទីក្រុង កៀវ និង Odessa ផងដែរ។

ក្រោយ​ការ​វាយ​ប្រហារ​របស់​រុស្សី តំបន់​ជា​ច្រើន​ក្នុង​ប្រទេស​អ៊ុយក្រែនក៏​ដាច់​ចរន្ត​អគ្គិសនី និង​ទឹក ហើយលោក Zelensky អះអាងថា វិស័យថាមពលបានរងការខូចខាតយ៉ាងធ្ងន់ធ្ងរ។

ត្បិតតែការវាយប្រហារលើកនេះមានទ្រង់ទ្រាយធំក៏ពិតមែន ប៉ុន្តែវាមិនទាន់ធំដូចខែធ្នូឆ្នាំ២០២៣ទេ ដែលកាលនោះរុស្ស៊ីបានបាញ់មីស៊ីល១៥៨គ្រាប់ ស្រោចលើអ៊ុយក្រែន។

ចាប់តាំងពីរុស្ស៊ីបើកប្រតិបត្តិការសឹកពេញទំហឹងនៅអ៊ុយក្រែនក្នុងឆ្នាំ២០២២មក ខ្លួនតែងកំណត់គោលដៅលើហេដ្ឋារចនាសម្ព័ន្ធថាមពលរបស់អ៊ុយក្រែនជានិច្ច ជាពិសេសប៉ុន្មានខែចុងក្រោយនេះ ដែលទីក្រុងមូស្គូធ្វើឲ្យប្រជាជនអ៊ុយក្រែន ត្រូវរងទុក្ខវេទនាដោយសារគ្មានអគ្គិសនីប្រើប្រាស់៕

អត្ថបទ៖ សុខ សុវណ្ណ

ចុចអាន៖ លោក Zelensky គាំទ្រ​ឥណ្ឌា​រៀបចំ​កិច្ច​ប្រជុំ​កំពូល​សន្តិភាព​លើក​ទី​២​របស់​អ៊ុយក្រែន