ព័ត៌មានអន្ដរជាតិ

ម៉ាឡេស៊ី ចោទប្រកាន់អតីតនាយករដ្ឋមន្ត្រីពីបទប្រមាថខ្សែរាជវង្ស

បានផុស

៤ សប្តាហ៍ មុន

នៅ

ថ្ងៃអង្គារ ២៧ សីហា ២០២៤

ដោយ

Chheang

ម៉ាឡេស៊ី បានចោទប្រកាន់មេដឹកនាំបក្សប្រឆាំង និងជាអតីតនាយករដ្ឋមន្ត្រី លោក Muhyiddin Yassin ពីបទបះបោរ និងប្រមាថអតីតព្រះមហាក្សត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេធាវីរបស់លោក Muhyiddin បាននិយាយនៅថ្ងៃទី២៧ខែសីហានេះថា កូនក្ដីរបស់ខ្លួនដែលធ្លាប់ដឹកនាំប្រទេសម៉ាឡេស៊ីរយៈពេល១៧ខែចន្លោះឆ្នាំ២០២០ដល់ឆ្នាំ២០២១ ត្រូវបានចោទប្រកាន់នៅតុលាការរដ្ឋ Kelantan ពីបទបំបោរ ជុំវិញសុន្ទរកថានយោបាយមួយរបស់លោកកាលពីជិត២សប្ដាហ៍មុន។

ប្រទេសម៉ាឡេស៊ី បានអនុវត្តទម្រង់រាជាធិបតេយ្យដ៏ប្លែកខុសគេលើពិភពលោក ដែលស្តេចស៊ុលតង់ទាំង៩របស់ប្រទេសនេះ ប្តូរវេនគ្នាធ្វើជាព្រះមហាក្សត្ររៀងរាល់៥ឆ្នាំម្តង។ រាជាធិបតេយ្យដើរតួយ៉ាងសំខាន់ និងត្រូវបានប្រារព្ធឡើងដោយការគោរពយ៉ាងជ្រាលជ្រៅ។ ការសម្ដែងមតិអវិជ្ជមានអំពីខ្សែរាជវង្ស អាចត្រូវបានកាត់ទោសក្រោមច្បាប់បះបោរ ដែលអនុម័តតាំងតែពីសម័យអាណានិគមមកម៉្លេះ។

នៅក្នុងសុន្ទរកថានយោបាយកាលពីថ្ងៃទី១៥ខែសីហា លោក Muhyiddin បានចោទសួរអំពីទំនុកចិត្តរបស់អតីតព្រះមហាក្សត្រ Al-Sultan Abdullah Ahmad Shah បន្ទាប់ពីការបោះឆ្នោតសកលរបស់ម៉ាឡេស៊ីក្នុងឆ្នាំ២០២២ ដែលបណ្តាលឲ្យមានការព្យួរសភា។ លោក Muhyiddin ថា យោងតាមរបាយការណ៍ លោកបានទទួលនូវការគាំទ្រពីសមាជិកសភាគ្រប់គ្រាន់ដើម្បីបង្កើតរដ្ឋាភិបាលបន្ទាប់ពីការបោះឆ្នោត ប៉ុន្តែហេតុអ្វីបានជាព្រះអង្គម្ចាស់ Al-Sultan Abdullah មិនបានឲ្យលោកស្បថចូលកាន់តំណែងជានាយករដ្ឋមន្ត្រី។ ដោយឡែក ទ្រង់បានតែងតាំងលោក Datuk Seri Anwar Ibrahim ដែលកាលណោះជាមេបក្សប្រឆាំង ធ្វើជានាយករដ្ឋមន្ត្រីទៅវិញនៅក្នុងខែវិច្ឆិកាឆ្នាំ២០២២។

ការគ្រងរាជ្យរយៈពេល៥ឆ្នាំរបស់ព្រះអង្គម្ចាស់ Al-Sultan Abdullah បានបញ្ចប់កាលពីខែមករាដើមឆ្នាំ២០២៤។

ព្រះអង្គម្ចាស់ Al-Sultan Abdullah (រូបភាព៖ BERNAMA)

ព្រះអង្គម្ចាស់ Al-Sultan Abdullah មិនបានធ្វើការអត្ថាធិប្បាយជាសាធារណៈអំពីការលើកឡើងរបស់លោក Muhyiddin នោះទេ។

លោក Muhyiddin ដែលដឹកនាំក្រុមប្រឆាំងអភិរក្សកណ្ដាលនិយមម៉ាឡេស៊ី អាចប្រឈមនឹងការជាប់ពន្ធនាគាររយៈពេល៣ឆ្នាំ និងពិន័យជាប្រាក់១១៤៨ដុល្លារ ប្រសិនបើត្រូវបានរកឃើញថាមានកំហុស។

លោក Muhyiddin ក៏ត្រូវបានចោទប្រកាន់ពីបទពុករលួយ និងការលាងលុយកខ្វក់នៅក្នុងសំណុំរឿងដាច់ដោយឡែកមួយទៀត កាលពីឆ្នាំមុន។ ការចោទប្រកាន់នេះត្រូវលោក Muhyiddin ចាត់ទុកថាពាក់ព័ន្ធនឹងហេតុផលនយោបាយ។ យ៉ាងណា លោកនាយករដ្ឋមន្ត្រី Anwar បានបដិសេធថា រដ្ឋាភិបាលរបស់លោកមិនបានកំណត់គោលដៅជាគូប្រជែងនយោបាយនោះឡើយ ដោយនិយាយថា ការចោទប្រកាន់នេះគឺជាផ្នែកមួយនៃកិច្ចខិតខំប្រឹងប្រែងដើម្បីកម្ចាត់អំពើពុករលួយនៅក្នុងជួរមន្ត្រីជាន់ខ្ពស់ប៉ុណ្ណោះ៕

ដោយ៖ ឈាង

Related Topics:ប្រទេសម៉ាឡេស៊ី