​ទឹកជំនន់​នៅ​នីហ្សេរីយ៉ា​​បង្ខំ​ជម្លៀស​មនុស្ស​ជា​ង​​៤ម៉ឺន​នាក់​និង​៤៩​នាក់ល​ង់ស្លាប់​

យ៉ាងហោចណាស់មនុស្ស៤៩នាក់បានស្លាប់ និងរាប់​ម៉ឺន​នាក់ត្រូវ​បាន​ជម្លៀស​ទៅ​រក​​កន្លែងសុវត្ថិភាព​នៅក្នុងប្រទេស​នីហ្សេរីយ៉ាស្ថិត​​នៅ​​តំបន់​អាហ្រ្វិក​ខាងលិច បន្ទាប់ពីមានភ្លៀងធ្លាក់ខ្លាំងបានបណ្តាលឱ្យមានទឹកជំនន់​ធ្ងន់ធ្ងរនៅភាគឦសាននៃប្រទេស​ដែល​ហែក​ហួរ​ដោយអស្ថេរភាព​សង្គម​​។ យោង​សារព័ត៌មាន​ Al Jazeera ចេញ​ផ្សាយ​​​នៅថ្ងៃទី២៧ខែសីហានេះ។

អ្នកនាំពាក្យ ទីភ្នាក់ងារគ្រប់គ្រងគ្រា​អាសន្ន​​​​ជាតិ (NEMA) បានឲ្យដឹងថា ខេត្ត​ចំនួនបីនៅភាគឦសាន រួម​មាន​ ខេត្ត​Jigawa Adamawa និង ខេត្ត Taraba បានរងផលប៉ះពាល់យ៉ាងធ្ងន់ធ្ងរដោយសារទឹកជំនន់ ក្នុង​នោះ​មាន​មនុស្សចំនួន៤១៣៤៤នាក់ត្រូវបានបង្ខំ​ចិត្តជម្លៀស​ចេញ​​ដើម្បី​រក​កន្លង​សុវត្ថិភាព​។ ទឹកជំនន់នៅតែបន្តឆក់យកជីវិត និងទ្រព្យសម្បត្តិ ដោយបណ្ដាលឲ្យរដ្ឋាភិបាលខ្វះខាតធនធានសម្រាប់ការអភិវឌ្ឍនិងស្ដារប្រទេស​ឡើងវិញ។

ជាមួយគ្នានេះរដ្ឋាភិបាលបាននិយាយថា នៅឆ្នាំនេះ ខេត្ត​​ចំនួន៣១ក្នុងចំណោមខេត្ត​ចំនួន៣៦របស់ប្រទេសមាន​ហានិភ័យ​ក្នុងការជួបប្រទះ «ទឹកជំនន់ធ្ងន់ធ្ងរ» ។

ភ្លៀងធ្លាក់ខ្លាំងក៏បានបន្ថែមបញ្ហាស្មុគស្មាញ​​កាន់តែ​ខ្លាំង​ដល់​វិស័យកសិកម្ម ខណៈកសិករបោះបង់ចោលកសិដ្ឋានរបស់ពួកគេនៅភាគឦសាន ដោយសារការវាយប្រហារម្តងហើយម្តងទៀតពីក្រុមប្រដាប់អាវុធ និងនៅ​តែ​មាន​ការ​ព្រួយ​បារម្ភថានឹងការវាយប្រហារបំផ្លិច​បំផ្លាញ​បន្ថែម​ទៀត។

នៅឆ្នាំ ២០២២ ប្រទេសនីហ្សេរីយ៉ាបានជួបប្រទះនឹងទឹកជំនន់ដ៏អាក្រក់បំផុត​​ក្នុងរយៈពេលជាងមួយទសវត្សរ៍ ដែលបានសម្លាប់មនុស្សជាង ៦០០នាក់ ផ្លាស់ទីលំនៅប្រហែល១,៤លាននាក់ និងបានបំផ្លាញដីស្រែចំនួន ៤៤ម៉ឺន​ហិកតា។ ទឹកជំនន់​លើក​នេះ​​ក៏បានបំផ្លាញដីស្រែចំការកសិកម្មប្រហែល៦៩៣ហិកតា។ ប្រទេសនីហ្សេរីយ៉ាក៏កំពុងប្រយុទ្ធប្រឆាំងនឹងអតិផរណាពីរខ្ទង់ដោយសារតម្លៃអាហារខ្ពស់។

មួយរយៈចុងក្រោយនេះ ប្រទេសនានាជុំវិញពិភពលោកបានប្រឈមនឹងបញ្ហាទឹកជំនន់ធ្ងន់ធ្ងរ ដូចជា ប្រទេសបង់ក្លាដែស ឥណ្ឌា ឥណ្ឌូណេស៊ី រួមទាំងប្រទេសថៃ ខណៈការប្រែប្រួលអាកាសធាតុកាន់តែអាក្រក់ៗទៅ៕

អត្ថបទ៖ ប៊ុន សុភាព