ជប៉ុន​ប្រតិកម្ម​ខ្លាំង​និង​ទាម​ទារ​ភាគីចិន​កុំ​ឱ្យ​រំលោភដែន​​អធិបតេយ្យភាព​ខ្លួន​

ប្រទេសជប៉ុនបាន​ចេញ​ប្រតិកម្ម​និង​​​តវ៉ាយ៉ាងខ្លាំង​ជាមួយ​មហា​អំណាច​​ចិន បន្ទាប់ពីយន្តហោះចម្បាំងរបស់​មហាយក្ស​ចិនបាន​លុកលុយចូលដែនអាកាសរបស់ខ្លួន​កាលពីថ្ងៃចន្ទ។ នេះ​បើយោងតាមការចេញផ្សាយរបស់ទូរទស្សន៍ជាតិជប៉ុន​NHK​ នៅ​ថ្ងៃទី២៧ខែសីហានេះ។

យោង​ក្រសួងការពារជាតិជប៉ុន យន្តហោះស៊ើបការណ៍សម្ងាត់ប្រភេទ​ Y-9 របស់ចិន បានស្ថិតនៅក្នុងដែនអាកាសរបស់ប្រទេសជប៉ុនប្រហែល​២​នាទីកាលពីព្រឹកថ្ងៃចន្ទ នៅពេលដែលវាកំពុងហោះហើរលើផ្ទៃទឹកភាគអាគ្នេយ៍នៃកោះ Danjo ដែលជាផ្នែកមួយរបស់ទីក្រុង Goto ក្នុងខេត្ត​Nagasaki ។

ពាក់ព័ន្ធបញ្ហានេះ អនុរដ្ឋមន្ត្រីការបរទេសជប៉ុន លោក Okano Masataka បានកោះហៅស្ថានទូតចិន​ប្រចាំរាជធានី​​តូក្យូ ដើម្បីបង្ហាញការ​ប្រឆាំងនឹងការឈ្លានពានដែលបានបញ្ជាក់ជាលើកដំបូងដោយយន្តហោះចម្បាំងចិនចូលទៅក្នុង​ដែន​អាកាសរបស់ប្រទេសជប៉ុន និងបានទាមទារយ៉ាងខ្លាំងឱ្យប្រទេសចិនចាត់វិធានការដើម្បីការពារការកុំឲ្យមានហេតុ​ការណ៍​បែបនេះកើតឡើង​ជា​ថ្មី​​ទៀត​​។

ជាមួយគ្នានេះ អគ្គនាយកការិយាល័យកិច្ចការអាស៊ី និងមហាសមុទ្រនៃក្រសួងការបរទេសជប៉ុន លោក Namazu Hiroyuki ក៏បាន​បង្ហាញ​ការ​តវ៉ា​ ពេលដែលលោកបានជួបជាមួយអគ្គនាយកនៃនាយកដ្ឋានកិច្ចការអាស៊ីនៃក្រសួងការបរទេសចិន លោក Liu Jinsong នៅទីក្រុងតូក្យូ។

មន្ត្រីជាន់ខ្ពស់ក្រសួងការពារជាតិជប៉ុន បានព្រមានថា នេះអាចជាផ្នែកមួយនៃកិច្ចខិតខំប្រឹងប្រែងរបស់ទីក្រុងប៉េកាំង ក្នុងការគំរាមកំហែងដល់ផលប្រយោជន៍របស់ប្រទេសជប៉ុន ទាំងនៅក្នុងសមុទ្រ និងនៅលើអាកាស ខណៈមានការឈ្លាន​ពាន​ជាច្រើនដោយកងទ័ពជើងទឹកចិន និងឆ្មាំឆ្នេរសមុទ្រចូលទៅក្នុងដែនទឹករបស់ប្រទេសជប៉ុន។ ប្រឈម​ការ​តវ៉ា​ខ្លាំងក្ មិនទាន់មានការអត្ថាធិប្បាយពីភាគីចិននៅឡើយនោះទេជុំវិញ​ប្រតិកម្ម​របស់​ប្រទេស​​ជប៉ុន។

ទោះជា​បែបនេះ​ក្តី​ មន្ត្រីរដ្ឋាភិបាលជប៉ុនមួយចំនួនបាននិយាយថា វាលឿនពេកក្នុងការសន្និដ្ឋានថា សកម្មភាពចុងក្រោយរបស់ចិនមានចេតនាបង្កការគំរាមកំហែង ដោយជប៉ុន​នឹង​បន្ត​វាយតម្លៃ​ឧបទ្ទវហេតុ​នេះ និងកំពុង​តាម​ដាន​សកម្មភាព​របស់​ចិនបន្ថែមទៀត៕

អត្ថបទ៖ ប៊ុន សុភាព