ព័ត៌មានអន្ដរជាតិ

ថៃព្រមានពលរដ្ឋមិនឱ្យធ្វើដំណើរទៅអ៊ីស្រាអែល និងប្រទេសជិតខាងជាបណ្ដោះអាសន្ន

បានផុស

៦ ខែ មុន

នៅ

ថ្ងៃអង្គារ ២៧ សីហា ២០២៤

ដោយ

ក្រសួងការបរទេសថៃ នៅថ្ងៃទី២៦ ខែសីហា ឆ្នាំ២០២៤ បានចេញសេចក្តីព្រមានប្រជាពលរដ្ឋថៃឱ្យចៀសវាងការធ្វើដំណើរទៅកាន់ប្រទេសអ៊ីស្រាអែលនិងប្រទេសជិតខាងនោះជាបណ្តោះអាសន្ន។ ការចេញសេចក្តីព្រមាននេះត្រូវបានឡើងបន្ទាប់ពីមានការប៉ះទង្គិចគ្នាយ៉ាងខ្លាំងក្លារវាង “កងទ័ពអ៊ីស្រាអែល-ហេសបូឡា”។

***(រូបថតពីបណ្ដាញសង្គមX របស់លោក Nikorndej Plankkun។)***

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យក្រសួងការបរទេសថៃ លោក Nikorndej Plankkun បាននិយាយថា នៅថ្ងៃទី២៦ ខែសីហា ក្រសួងបានដឹកនាំកិច្ចប្រជុំក្រុមការងារនៃមជ្ឈមណ្ឌលសម្របសម្រួលសង្គ្រោះបន្ទាន់តាមរយៈប្រព័ន្ធវីដេអូពីចម្ងាយដើម្បីវាយតម្លៃស្ថានការណ៍នៅអ៊ីស្រាអែលនិងលីបង់ បន្ទាប់ពីយោធាអ៊ីស្រាអែលបានបើកការវាយប្រហារតាមអាកាសប្រឆាំងនឹងមូលដ្ឋានមីស៊ីលរបស់ក្រុមហេសបូឡា (Hezbollah) រាប់ពាន់កន្លែងនៅភាគខាងត្បូងនៃប្រទេសលីបង់ ហើយក្រុមនេះបានបាញ់កាំជ្រួចទៅកាន់ប្រទេសអ៊ីស្រាអែលជាង៣២០គ្រាប់កាលពីថ្ងៃទី២៥ ខែសីហា ឆ្នាំ២០២៤។

កិច្ចប្រជុំបានវាយតម្លៃស្ថានការណ៍នៅអ៊ីស្រាអែលថា នៅតែមានភាពផុយស្រួយ ដោយស្ថានទូតថៃទាំងអស់បានរៀបចំផែនការនិងត្រៀមខ្លួនរួចជាស្រេចដើម្បីជួយដល់ប្រជាពលរដ្ឋថៃ ប្រសិនបើស្ថានការណ៍កាន់តែអាក្រក់ទៅៗ និងអំពាវនាវប្រជាពលរដ្ឋថៃដែលគ្រោងនឹងធ្វើដំណើរទៅកាន់ប្រទេសអ៊ីស្រាអែល ឬប្រទេសជិតខាងឱ្យមានការប្រុងប្រយ័ត្នក្នុងការធ្វើដំណើរ ឬពិចារណាពន្យារពេលការធ្វើដំណើរ ប្រសិនបើគ្មានហេតុផលចាំបាច់ និងស្នើឱ្យប្រជាពលរដ្ឋថៃនៅតំបន់នោះត្រូវតាមដានការវាយតម្លៃស្ថានការណ៍របស់អាជ្ញាធរមូលដ្ឋាន និងសេចក្តីប្រកាសព្រមានរបស់ស្ថានទូតថៃប្រចាំប្រទេសនីមួយៗយ៉ាងយកចិត្តទុកដាក់។

ទន្ទឹមគ្នានេះ ក្រសួងការបរទេសនិងស្ថាប័នពាក់ព័ន្ធថៃ នឹងវាយតម្លៃស្ថានការណ៍យ៉ាងយកចិត្តទុកដាក់ និងបន្តផ្តល់ជំនួយដល់ប្រជាពលរដ្ឋថៃក្នុងតំបន់ទាំងនោះជាបន្ទាន់ក្នុងករណីចាំបាច់៕

ប្រែសម្រួលដោយ៖ គង់ សំអាន