ព័ត៌មានអន្ដរជាតិ

ថៃពង្រីកការវិនិយោគផលិតស្រោមអនាម័យ ខណៈប្រទេស៥មានអ្នកប្រើច្រើនដាច់គេ

បានផុស

១ ម៉ោង មុន

នៅ

ថ្ងៃពុធ ២៨ សីហា ២០២៤

ដោយ

ប្រទេសចំនួនប្រាំមានអ្នកប្រើប្រាស់ស្រោមអនាម័យច្រើនជាងគេ គឺ ចិន សហរដ្ឋអាមេរិក ឥណ្ឌា ឥណ្ឌូណេស៊ី និងប្រទេសជប៉ុន ហើយក្រុមផលិតស្រោមអនាម័យរបស់ថៃគឺក្រុមហ៊ុន Thai Nippon Rubber Industries (TNR) បានទទួលសិទ្ធិផ្តាច់មុខក្នុងការផលិត និងលក់ស្រោមអនាម័យយីហោ Playboy នៅទូទាំងពិភពលោក សម្រាប់រយៈពេល៣០ឆ្នាំ លើកលែងតែនៅប្រទេសម៉ិកស៊ិក។

ក្រុមហ៊ុននេះមើលឃើញកំណើននៃការប្រើប្រាស់នឹងបន្តកើនឡើងចន្លោះពី៥ទៅ៧ភាគជារៀងរាលឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម khaosod បញ្ចាក់ថា ក្រុមហ៊ុនគ្រោងនឹងលក់ស្រោមអនាម័យ Playboy លំដាប់ថ្នាក់ខ្ពស់នៅក្នុងប្រទេសថៃ និងទូទាំងពិភពលោក រួមទាំងនៅសហរដ្ឋអាមេរិក ប្រទេសចិន និងទីផ្សារដែលកំពុងរីកចម្រើនដូចជាប្រទេសឥណ្ឌា វៀតណាម និងអាហ្វ្រិក ហើយគោលដៅនឹងផ្តោតលើមនុស្សវ័យក្មេងដែលមានអាយុពី ១៨ទៅ៣៦ ឆ្នាំ។

លើសពីនេះ ក្រុមហ៊ុនកំពុងរៀបចំវិនិយោគប្រមាណពី ៥០០ ទៅ ៨០០លានបាតនៅចុងឆ្នាំក្រោយ ដើម្បីសាងសង់រោងចក្រថ្មីមួយនៅលើផ្ទៃដីទំហំ១៦រ៉ៃ (២៥៦០០ម៉ែត្រការ៉េ)។ បច្ចុប្បន្នក្រុមហ៊ុនកំពុងដំណើរការជ្រើសរើសទីតាំងក្នុងតំបន់ឧស្សាហកម្មផ្សេងៗក្នុងខេត្តឈុនបុរី។ រោងចក្រថ្មីនេះនឹងបង្កើនសមត្ថភាពផលិតស្រោមអនាម័យសរុបពីបច្ចុប្បន្ន ២ ពាន់លានកញ្ចប់ក្នុងមួយឆ្នាំដល់៣ពាន់លានកញ្ចប់ក្នុងមួយឆ្នាំ។

បន្ថែមពីលើស្រោមអនាម័យ Playboy ក៏មានគម្រោងអភិវឌ្ឍផលិតផលផ្សេងទៀតដូចជាប្រេងរំអិលដែលបញ្ចូលប្រេង CBD និងការផលិតស្រោមអនាម័យដែលស្តើងជាងផលិតផលមានលើទីផ្សារសេរីនាពេលបច្ចុប្បន្ននេះថែមទៀតផង។

ដោយឡែក កាលពីថ្ងៃទី ២៦ ខែសីហា លោក Amorn Darraratanaroj នាយកប្រតិបត្តិនៃក្រុមហ៊ុន TNR ដែលជាក្រុមហ៊ុនផលិត និងចែកចាយស្រោមអនាម័យក្នុងប្រទេសថៃ បាននិយាយថា ទីផ្សារស្រោមអនាម័យពិភពលោកបច្ចុប្បន្នមានតម្លៃ ២០០ពាន់លានបាត (៥៨.៧ ពាន់លានដុល្លារ) ហើយអាចរីកចម្រើនក្នុងអត្រា ៥ទៅ៧ភាគរយ។ចំណែកទីផ្សារនៅក្នុងប្រទេសថៃត្រូវបានគេប៉ាន់ប្រមាណថាមានចំនួន ១.៥ពាន់លានបាត (៤៤លានដុល្លារ) ហើយកំពុងកើនឡើង ៧ភាគរយជារៀងរាល់ឆ្នាំ ស្របតាមនិន្នាការទីផ្សារពិភពលោក។

ទន្ទឹមនោះទៀតដែរ លោក Ben Kohn នាយកប្រតិបត្តិនៃក្រុមហ៊ុន PLBY Group, Inc. និងជាម្ចាស់យីហោ Playboy បានបង្ហាញពីទំនុកចិត្តរបស់លោកចំពោះភាពជាដៃគូរយៈពេលវែងជាមួយ TNR ។ គាត់ជឿជាក់ថា កិច្ចសហការនេះ នឹងអាចឲ្យស្រោមអនាម័យម៉ាក Playboy វាយលុកទីផ្សារពិភពលោកបានយ៉ាងឆាប់រហ័ស ជាពិសេសប្រទេសគោលដែលប្រើស្រោមច្រើនជាងគេ៕