ជប៉ុន លុបចោលជើងហោះហើរនិងសេវារថភ្លើង ដោយសារព្យុះ សានសាន

ប្រទេសជប៉ុន ត្រូវបង្ខំចិត្តលុបចោលជើងហោះហើរនិងសេវារថភ្លើងល្បឿនលឿនមួយចំនួន ខណៈព្យុះទីហ្វុង សានសាន កាន់តែខិតជិតមកដល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ NHK នៅថ្ងៃពុធទី២៨ខែសីហា, ក្រុមហ៊ុនរថភ្លើងល្បឿនលឿន Kyushu Shinkansen បានប្រកាសផ្អាកសេវានៅស្ថានីយ Kumamoto ទៅដល់ស្ថានីយ Kagoshima-chuo ចាប់ពីម៉ោង៨យប់ថ្ងៃពុធទៅ។

ដោយឡែកនៅថ្ងៃព្រហស្បតិ៍ ក្រុមហ៊ុននេះនឹងផ្អាកសេវារថភ្លើងនៅស្ថានីយ Hakata ដល់ Kumamoto និងនៅស្ថានីយ Kyushu ទាំងមូលតែម្តង ចំណែកថ្ងៃសុក្រក្រុមហ៊ុនអាចផ្អាកឬពន្យារពេលនៅស្ថានីយ​ Sanyo ហើយថ្ងៃសៅរ៍នឹងផ្អាកនៅ Tokaido។

ស្របពេលជាមួយគ្នានោះដែរ ជើងហោះហើរក្នុងស្រុកចំនួន៨២ជើង ភាគច្រើនចេញ-ចូលអាកាសយានដ្ឋាន Kagoshima គឺនឹងត្រូវលុបចោលនៅថ្ងៃពុធ ជាហេតុធ្វើឲ្យប៉ះពាល់ដល់អ្នកដំណើរប្រមាណ ៣ ៣០០នាក់។

ចំពោះជើងហោះហើរអន្តរជាតិវិញ, ជើងហោះហើរចំនួន៦ នៅអាកាសយានដ្ឋានអន្តរជាតិ Kansai និង Chubu ទំនងជានឹងលុបចោលដែរ ដែលអាចប៉ះពាល់ដល់អ្នកដំណើរ ៤២៧នាក់។ រីឯក្រុមហ៊ុន All Nippon Airways និយាយថា ជើងហោះហើរចំនួន៨០ជើង នៅអាកាសយានដ្ឋាន Miyazaki, Kagoshima និងកន្លែងផ្សេងទៀត ក៏នឹងត្រូវលុបចោលដែរ ដែលប៉ះពាល់ដល់អ្នកដំណើរប្រហែល ៥ ១០០នាក់ចាប់ពីថ្ងៃពុធដល់ថ្ងៃសុក្រ។

សម្រាប់កម្ពុជាវិញ សានសាន គឺជាព្យុះទី១០ដែលជះឥទ្ធិពលមកលើព្រះរាជជាណាចក្រកម្ពុជា រហូតដល់ថ្ងៃទី៣០សីហា ធ្វើឲ្យមានភ្លៀងធ្លាក់លាយឡំជាមួយខ្យល់កន្ត្រាក់ចាប់៤០ ទៅ៥០ភាគរយ៕

អត្ថបទ៖ សុខ សុវណ្ណ

ចុចអាន៖ ព្យុះទី១០ឈ្មោះ សានសាន នៅតែបន្តជះឥទិ្ធពល​លើកម្ពុជារហូតដល់ថ្ងៃទី៣០សីហា