ព័ត៌មានអន្ដរជាតិ

ក្រុងហូជីមិញ ប្រកាសពីការផ្ទុះឡើងនៃជំងឺកញ្ជ្រឹល ក្រោយមានមនុស្សស្លាប់៣នាក់

បានផុស

៤ សប្តាហ៍ មុន

នៅ

ថ្ងៃពុធ ២៨ សីហា ២០២៤

ដោយ

Chheang

ទីក្រុងហូជីមិញនៅក្នុងប្រទេសវៀតណាម បានប្រកាសពីការផ្ទុះឡើងនៃជំងឺកញ្ជ្រឹលចំពេលមានករណីឆ្លងកើនឡើង និងមានមនុស្សស្លាប់ចំនួន៣នាក់។ នេះគឺជាការប្រកាសលើកដំបូងហើយអំពីការសាយភាយនៃជំងឺកញ្ជ្រឹលនៅក្នុងទីក្រុងហូជីមិញ។

កុមារជាអ្នកជំងឺកញ្ជ្រឹលម្នាក់កំពុងសម្រាកព្យាបាលនៅមន្ទីរពេទ្យកុមារក្រុងហូជីមិញ (រូបភាព៖ VIET NAM NEWS)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសារព័ត៌មានវៀតណាម VnExpress បានរាយការណ៍ថា ក្រុងហូជីមិញនឹងចាប់ផ្តើមយុទ្ធនាការមួយ ដើម្បីបន្ថែមការចាក់វ៉ាក់សាំងជំងឺកញ្ជ្រឹលដល់កុមារទាំងអស់ដែលមានអាយុពី១ឆ្នាំដល់៥ឆ្នាំ ដោយមិនគិតពីកំណត់ត្រានៃការចាក់វ៉ាក់សាំងពីមុននោះឡើយ។ មួយវិញទៀត អាយុកុមារដែលទទួលការចាក់វ៉ាក់សាំង អាចនឹងត្រូវដំឡើងខ្ពស់ជាងនេះ ដោយអាស្រ័យលើការវិវត្តនៃការផ្ទុះឡើងនៃជំងឺកញ្ជ្រឹល។

ករណីមានអាការៈគ្រុនក្តៅកន្ទួលដែលសង្ស័យថាជាជំងឺកញ្ជ្រឹល នឹងត្រូវនាំយកទៅធ្វើតេស្តក្នុងរយៈពេល២៤ម៉ោងនៅតាមទីតាំងសុខាភិបាលដែលរដ្ឋបានរៀបចំ។

បើយោងតាមមជ្ឈមណ្ឌលគ្រប់គ្រងជំងឺក្រុងហូជីមិញ គិតចាប់ពីដើមឆ្នាំ២០២៤រហូតដល់ថ្ងៃទី២២ខែសីហា ទីក្រុងហូជីមិញបានរកឃើញជំងឺកញ្ជ្រឹលចំនួន៣៥៣ករណី។ ដោយឡែកចាប់ពីឆ្នាំ២០២១ដល់ឆ្នាំ២០២៣ មានករណីវិជ្ជមានជំងឺកញ្ជ្រឹលតែ១គត់ប៉ុណ្ណោះ។

អាការៈគ្រុនក្តៅហើយកន្ទួលចំនួន៨៥ករណី ត្រូវបានរាយការណ៍កាលពីសប្តាហ៍មុន ហើយក្នុងនោះមាន២០ករណីត្រូវបានបញ្ជាក់ថាជាជំងឺកញ្ជ្រឹល។ កញ្ជ្រឹល ជាជំងឺផ្លូវដង្ហើមដែលងាយឆ្លងខ្លាំង ហើយរោគសញ្ញាចាប់ផ្ដើមចេញក្នុងចន្លោះពី៧ទៅ២១ថ្ងៃ។

អ្នកជំនាញផ្នែកវេជ្ជសាស្ត្រ បានព្រមានថា ជំងឺនេះអាចនាំឲ្យមានផលវិបាកធ្ងន់ធ្ងរ រួមទាំងជំងឺរលាកសួត រលាកខួរក្បាល រលាកត្រចៀក រលាកភ្នាសភ្នែក រាក និងខ្លះឈានដល់ស្លាប់។

ជំងឺកញ្ជ្រឹលអាចគ្រប់គ្រងបានយ៉ាងមានប្រសិទ្ធភាពលុះត្រាតែអត្រាភាពស៊ាំសហគមន៍ឈានដល់ ៩៥ភាគរយ ហើយបុគ្គលម្នាក់ៗបានទទួលវ៉ាក់សាំងចំនួន២ដូស៕

ដោយ៖ ឈាង

Related Topics:ប្រទេសវៀតណាម