មេ Telegram ត្រូវដោះលែងឲ្យនៅក្រៅឃុំ ហាមចាកចេញពីប្រទេសបារាំង

តាមការចុះផ្សាយរបស់ BBC, តុលាការក្រុងប៉ារីស បានសម្រេចដោះលែងនាយកប្រតិបត្តិ Telegram លោក Pavel Durov ឲ្យនៅក្រៅឃុំជាមួយលក្ខខណ្ឌបង់ប្រាក់៥លានអឺរ៉ូ និងហាមឃាត់ចាកចេញពីប្រទេសបារាំង ព្រមទាំងបើកការស៊ើបអង្កេតជាផ្លូវការលើរូបគាត់ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋអាជ្ញា Laure Beccuau បានប្រកាសកាលពីល្ងាចថ្ងៃពុធទី២៨ខែសីហាថា ចៅក្រមនៅតុលាការក្រុងប៉ារីស បានសម្រេចបើកការស៊ើបអង្កេត ជុំវិញការចោទប្រកាន់ពាក់ព័ន្ធនឹងអំពើឧក្រិដ្ឋកម្មដែលវេទិកាអនឡាញនេះអនុញ្ញាតឲ្យមានប្រតិបត្តិការខុសច្បាប់ ដូចជាការផ្សព្វផ្សាយរូបភាពអាសអាភាសរបស់កុមារ ជួញដូរគ្រឿងញៀន ក្លែងបន្លំ បដិសេធចែករំលែកព័ត៌មានតាមសំណើរបស់អាជ្ញាធរ លាងលុយកខ្វក់ និងផ្តល់សេវាស្រាយកូដអ៊ិនគ្រីបដល់ឧក្រិដ្ឋជន។

ត្បិតតែ​ដោះ​លែងនៅ​ក្រៅ​ឃុំមែន ប៉ុន្តែលោក Durov ត្រូវស្ថិតក្រោមការត្រួតពិនិត្យរបស់តុលាការនិងហាមឃាត់ចាកចេញពីប្រទេសបារាំង ហើយត្រូវរាយការណ៍ទៅប៉ូលិសពីរដងក្នុងមួយសប្តាហ៍ផងដែរ។

​នៅ​ប្រទេស​បារាំង ការដែលរដ្ឋអាជ្ញាបើកការស៊ើបអង្កេតជាផ្លូវការបែបនេះ ​មិន​មែនមាន​ន័យ​ថា ​ជនសង្ស័យត្រូវជាប់​ពិរុទ្ធ​ឬ​នឹង​ត្រូវ​កាត់ទោស​នោះ​ទេ។ វា​គ្រាន់តែ​មាន​ន័យ​ថា ​ចៅក្រម​ជឿថា ​មាន​ភស្តុតាង​គ្រប់គ្រាន់​ដើម្បី​បន្ត​ការស៊ើបអង្កេតប៉ុណ្ណោះ ហើយការស៊ើបអង្កេតនោះទៀតសោត អាចអូសបន្លាយពេលរាប់ឆ្នាំ មុនឈានដល់ការសម្រេចដាក់ទោសឬទម្លាក់ចោល។

សូមបញ្ជាក់ជាថ្មី អាជ្ញាធរបារាំង បានចាប់ខ្លួនលោក Durov អាយុ៣៩ឆ្នាំ នៅអាកាសយានដ្ឋាន Le Bourget ខាងក្រៅទីក្រុងប៉ារីសកាលពីល្ងាចថ្ងៃទី២៤ខែសីហា ក្រោយមេ Telegram រូបនេះជិះយន្តហោះឯកជន ចេញពីប្រទេសអាស៊ែបៃហ្សង់។

យោងតាមរដ្ឋអាជ្ញា Laure Beccuau, តាមពិតការចាប់ខ្លួនលោក Durov គឺជាផ្នែកមួយនៃការស៊ើបអង្កេតដែលចាប់ផ្តើមតាំងតែពីថ្ងៃទី៨ខែកក្កដាមកម្ល៉េះ៕

អត្ថបទ៖ សុខ សុវណ្ណ

ចុចអាន៖ អារ៉ាប់រួម ផ្អាកកិច្ចព្រមព្រៀងទិញយន្តហោះចម្បាំង៨០គ្រឿងពីបារាំង ព្រោះខឹងរឿងចាប់ខ្លួនមេ Telegram