ព័ត៌មានអន្ដរជាតិ

វៀតណាម បំបែកសម្បុកក្រុមជួញដូរទារក ចាប់ឃាត់ខ្លួនមនុស្សបាន១៦នាក់

បានផុស

៥ ខែ មុន

នៅ

ថ្ងៃព្រហស្បតិ៍ ២៩ សីហា ២០២៤

ដោយ

Chheang

មន្ត្រីប៉ូលិសក្រុងហូជីមិញ បានចាប់ឃាត់ខ្លួនមនុស្សប្រុសស្រីចំនួន១៦នាក់ ដែលបានធ្វើសកម្មភាពជួញដូរទារកខុសច្បាប់ក្នុងខេត្តក្រុងចំនួន៣២នៅទូទាំងប្រទេស។ នេះបើយោងតាមការចុះផ្សាយរបស់សារព័ត៌មានវៀតណាម VnExpress កាលពីថ្ងៃទី២៨ខែសីហា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប៉ូលិសបាននិយាយនៅក្នុងសន្និសីទកាសែតកាលពីថ្ងៃពុធថា ក្រុមជួញដូរទារកនេះ មានមេក្លោងឈ្មោះ Cao Thi Thu Phuong អាយុ៤១ឆ្នាំ និងឈ្មោះ Nguyen Thi Anh Dao អាយុ៣៥ឆ្នាំ ព្រមទាំងគ្នីគ្នាចំនួន១៤នាក់ផ្សេងទៀត។ អ្នកទាំងនោះត្រូវបានដាក់ឲ្យស្ថិតនៅក្រោមការស៊ើបអង្កេតពីបទជួញដូរអនីតិជន និងក្លែងបន្លំត្រា និងឯកសារ។

ក្រុមអ្នកស៊ើបអង្កេត បានឲ្យដឹងថា ឈ្មោះ Dao នៅពេលត្រូវបានចាប់ខ្លួន គឺកំពុងស្នាក់នៅសណ្ឋាគារមួយកន្លែងនៅសង្កាត់ Tan Binh ជាមួយនឹងទារកទើបកើតបានចំនួន៣ថ្ងៃម្នាក់។ Dao បានសារភាពថាបានបោកបញ្ឆោតម្តាយទារកនៅខេត្ត Dak Lak ដោយអះអាងថាខ្លួនជាមនុស្សមិនអាចមានកូន និងចង់យកទារកនោះទៅចិញ្ចឹម។ ប៉ុន្តែតាមពិត Dao គ្រោងនឹងលក់កូននោះឲ្យប្តីប្រពន្ធមួយគូនៅទីក្រុងហូជីមិញក្នុងតម្លៃ ៤០លានដុង ឬប្រហែលនឹង ១៦០៨ដុល្លារ។

ការស៊ើបអង្កេតបន្ថែមទៀតបានឈានទៅដល់ការចាប់ខ្លួនឈ្មោះ Phuong ដែលត្រូវបានចោទប្រកាន់ថាជាមេក្លោងធំនៃក្រុមជួញដូរទារក ក្រោមរូបភាពនៃការស្មុំកូន។

ចាប់តាំងពីដើមឆ្នាំ២០២៤មក ក្រុមនេះបានទិញទារក ១៦នាក់ក្នុងតម្លៃពី ១០ទៅ២៣លានដុងក្នុងម្នាក់ៗ ហើយលក់វិញក្នុងតម្លៃ ៣៥ទៅ៧៥លានដុង ដោយទទួលបានប្រាក់ចំណេញខុសច្បាប់រាប់រយលានដុងឯណោះ។

ដើម្បីបិទបាំងការជួញដូរ ក្រុមនេះបានរកទៅឈ្មោះ Phan Phuong Nam អាយុ៣៥ឆ្នាំ ឲ្យក្លែងបន្លំឯកសារដើម្បីធ្វើឲ្យការស្មុំកូនហាក់មានភាពស្របច្បាប់ត្រឹមត្រូវ។ ប៉ូលិសបានឆ្មក់ចូលក្នុងបរិវេណផ្ទះរបស់ Nam ហើយបានរកឃើញកុំព្យូទ័រ ម៉ាស៊ីនបោះពុម្ព ត្រាក្លែងក្លាយ និងឯកសារក្លែងក្លាយ រួមទាំងសំបុត្រកំណើត។

ប៉ូលិសបាននិយាយថា ទារកចំនួន៨៤នាក់អាចត្រូវបានគេជួញដូរនៅទីតាំងចំនួន៣២កន្លែងផ្សេងៗគ្នា ហើយទារកជាច្រើនត្រូវបានជួយសង្គ្រោះក្នុងអំឡុងពេលប្រតិបត្តិការ៕

ដោយ៖ ឈាង

Related Topics:ប្រទេសវៀតណាម