ព័ត៌មានអន្ដរជាតិ

អ៊ីស្រាអែល យល់ព្រមឈប់បាញ់រយៈពេលខ្លី ដើម្បីឲ្យ WHO ផ្ដល់វ៉ាក់សាំងគ្រុនស្វិតដៃជើងដល់កុមារហ្គាហ្សា

បានផុស

៧ ខែ មុន

នៅ

ថ្ងៃសុក្រ ៣០ សីហា ២០២៤

ដោយ

Chheang

អង្គការសុខភាពពិភពលោក (WHO) បានប្រកាសកាលពីថ្ងៃទី២៩ខែសីហាថា ខ្លួនបានឈានដល់កិច្ចព្រមព្រៀងជាមួយអ៊ីស្រាអែលសម្រាប់ការផ្អាកមានកំណត់ ក្នុងការប្រយុទ្ធគ្នានៅតំបន់ហ្គាហ្សា ដើម្បីអនុញ្ញាតឲ្យមានការចាក់វ៉ាក់សាំងជំងឺគ្រុនស្វិតដៃជើងដល់កុមាររាប់សែននាក់ បន្ទាប់ពីមានទារកម្នាក់បានឆ្លងជំងឺនេះជាលើកដំបូងមិនធ្លាប់មានក្នុងរយៈពេល២៥ឆ្នាំនៅលើទឹកដីប៉ាឡេស្ទីន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Rik Peeperkorn តំណាងអង្គការសុខភាពពិភពលោក បាននិយាយថា យុទ្ធនាការចាក់វ៉ាក់សាំងនឹងចាប់ផ្តើមនៅថ្ងៃអាទិត្យទី១ខែកញ្ញា នៅចំកណ្ដាលតំបន់ហ្គាហ្សា ជាមួយនឹងសកម្មភាពផ្អាកបាញ់គ្នារបស់អ៊ីស្រាអែលនៅលើទឹកដីប៉ាឡេស្ទីន ចាប់ពីម៉ោង៦ព្រឹកដល់ម៉ោង៣រសៀលក្នុងរយៈពេល៣ថ្ងៃ ហើយអាចត្រូវបន្ត១ថ្ងៃបន្ថែមទៀតប្រសិនបើចាំបាច់។

លោក Peeperkorn បានប្រាប់សន្និសីទសារព័ត៌មានរបស់អង្គការសហប្រជាជាតិតាមវីដេអូខលចេញពីទីក្រុង Deir al-Balah នៃតំបន់ហ្គាហ្សាថា កិច្ចខិតខំប្រឹងប្រែង ដែលត្រូវបានសម្របសម្រួលជាមួយអាជ្ញាធរអ៊ីស្រាអែល នឹងត្រូវបន្តទៅភាគខាងត្បូងនៃតំបន់ហ្គាហ្សា និងចុងក្រោយនៅភាគខាងជើងហ្គាហ្សាសម្រាប់ការផ្អាកសកម្មភាពស្រដៀងគ្នានេះដែរ។

យុទ្ធនាការចាក់វ៉ាក់សាំងនេះ គឺសំដៅលើកុមារអាយុក្រោម១០ឆ្នាំចំនួន ៦៤ម៉ឺននាក់ ដែលម្នាក់ៗនឹងទទួលបានវ៉ាក់សាំងជំងឺគ្រុនស្វិតដៃជើងបន្តក់តាមមាត់ចំនួន២លើក ដោយ១លើកត្រូវបន្តក់ចំនួន២ដំណក់។ គម្លាតរវាងការទទួលវ៉ាក់សាំងទាំង២លើក មានរយៈពេល៤សប្ដាហ៍។

លោក Peeperkorn បានរៀបរាប់ថា ការផ្អាកសកម្មភាពបាញ់គ្នាមានសារៈសំខាន់ណាស់ ដែលអាចឲ្យប្រជាជននៅហ្គាហ្សានាំកូនរបស់ពួកគេទៅទទួលវ៉ាក់សាំង និងត្រឡប់ទៅកន្លែងដែលពួកគេស្នាក់នៅវិញនៅត្រឹមម៉ោង៣រសៀល។

លោកបានមានប្រសាសន៍ថា៖ «យើងមានកិច្ចព្រមព្រៀងមួយលើបញ្ហានេះ ដូច្នេះយើងរំពឹងថាគ្រប់ភាគីនឹងប្រកាន់ខ្ជាប់នូវចំណុចនេះ»។

អង្គការសុខភាពពិភពលោក បានលើកឡើងថា បុគ្គលិកសុខាភិបាលត្រូវចាក់វ៉ាក់សាំងកុមារនៅហ្គាហ្សាឲ្យបានយ៉ាងហោចណាស់ ៩០% ដើម្បីបញ្ឈប់ការឆ្លងជំងឺគ្រុនស្វិតដៃជើង។ យុទ្ធនាការនេះនឹងមានការចូលរួមពីក្រុមសុខាភិបាលចល័ត និងបុគ្គលិកពេទ្យជាង ២១០០នាក់មកពីទីភ្នាក់ងារអង្គការសហប្រជាជាតិ និងក្រសួងសុខាភិបាលនៃតំបន់ហ្គាហ្សា ដែលធ្វើការនៅរាប់រយកន្លែងនៅទូទាំងហ្គាហ្សា។

កាលពីថ្ងៃទី១៦ខែសីហា នៅហ្គាហ្សាបានរកឃើញករណីជំងឺគ្រុនស្វិតដៃជើងដំបូងគេក្នុងរយៈពេល២៥ឆ្នាំនៅទីក្រុង Deir al-Balah។ ករណីនេះកើតលើទារកអាយុ១០ខែម្នាក់ ដែលមិនបានទទួលថ្នាំបង្ការជំងឺគ្រុនស្វិតដៃជើង។

ជំងឺនេះឆ្លងខ្លាំងជាចម្បងលើកុមារដែលមានអាយុក្រោម ៥ឆ្នាំ ហើយម្នាក់ក្នុងចំណោមមនុស្ស២០០នាក់ដែលឆ្លងវីរុសនឹងមានអាការៈស្វិតដៃជើងមិនអាចព្យាបាលបាននោះឡើយ។ យោងតាមអង្គការសុខភាពពិភពលោក (WHO) ចន្លោះពី ៥% ទៅ ១០% នៃអ្នកជំងឺបានស្លាប់ដោយសារតែការស្វិតប្រព័ន្ធដំណើរការផ្លូវដង្ហើម។

ក្រសួងសុខាភិបាលហ្គាហ្សា បានប្រាប់ថា វីរុសត្រូវបានរកឃើញនៅក្នុងសំណាកទឹកសំណល់ដែលបានយកនៅក្នុងតំបន់ Khan Younis នៅភាគខាងត្បូងនៃហ្គាហ្សា និងកន្លែងជាច្រើនទៀតនៅចំកណ្ដាលតំបន់ហ្គាហ្សា។ ភាគច្រើនវីរុសទាំងនោះជាញឹកញាប់ឆ្លងតាមរយៈទឹកសម្អុយ ហើយវាងាយឆ្លងខ្លាំងណាស់ ជាពិសេសក្មេងតូចៗ។ វីរុសប្រភេទនេះអាចបណ្តាលរាងកាយខ្វិន និងស្វិត ហើយខ្លះឈានដល់ស្លាប់៕

ដោយ៖ ឈាង

ចុចអាន៖ តំបន់ហ្គាហ្សា ទទួលបានវ៉ាក់សាំងគ្រុនស្វិតដៃជើងជាង១លានដូស