ព័ត៌មានអន្ដរជាតិ

ចម្ការស្រកានាគនៅវៀតណាមរងផលប៉ះពាល់ខ្លាំងដោយសារទឹកជំនន់

បានផុស

៦ ខែ មុន

នៅ

ថ្ងៃសៅរ៍ ៣១ សីហា ២០២៤

ដោយ

ទឹកជំនន់បានបំផ្លាញផលិតកម្មផ្លែស្រកានាគរបស់វៀតណាម ខណៈខេត្តធំ Binh Thuan ដែលស្ថិតនៅភាគខាងត្បូងជាប់មាត់សមុទ្រ រងផលប៉ះពាល់ធ្ងន់ធ្ងរបំផុតនៅគ្រោះទឹកជំនន់ក្នុងឆ្នាំនេះ។ នេះបើយោងតាមការចេញផ្សាយរបស់សារព័ត៌មាន VN Express នៅថ្ងៃទី៣០ខែសីហា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភ្លៀងធ្លាក់ខ្លាំងនៅក្នុងខេត្ត Binh Thuan របស់ប្រទេសវៀតណាម បានជន់លិចចម្ការស្រកានាគរាប់រយហិកតា និងបង្ខំអ្នកស្រុកចេញពីផ្ទះរបស់ពួកគេជាបន្តបន្ទាប់ក្នុងរយៈពេលប៉ុន្មានខែថ្មីៗនេះ ខណៈកសិករក្នុងស្រុក Ho Van Trung បានខូចខាតដំណាំផ្លែស្រកានាគ និងត្រសក់ទាំងអស់នៅឆ្នាំនេះ។

ខេត្ត Binh Thuan មានផ្ទៃដីដាំដំណាំស្រកានាគចំនួន ២៨០០០ហិកតា ដែលជាខេត្តមានផ្ទៃដីដំាដុះស្រកានាគធំជាងគេនៅវៀតណាម។ ផលិតផលស្រកានាគផ្តល់ទិន្នផលប្រមាណ៦០ម៉ឺនតោនក្នុងមួយឆ្នាំៗ បានរងផលប៉ះពាល់ធ្ងន់ធ្ងរបំផុត ក្នុងនោះប្រហែល២០០គ្រួសារនិងដីដំណាំស្រកានាគ៤០០ហិកតាភាគច្រើនត្រូវបានជន់លិច។ អ្នកស្រុកជាង៧០គ្រួសារត្រូវបានបង្ខំជម្លៀសចេញពីលំនៅឋានជាបណ្តោះអាសន្ន។

យោងតាមទីភ្នាក់ងារព័ត៌មាន AFP ការនាំចេញផ្លែស្រកានាគរបស់វៀតណាមមានតម្លៃរហូតដល់១,៨ពាន់លានដុល្លារក្នុងឆ្នាំ ២០១៨ ប៉ុន្តែតួលេខនេះបានធ្លាក់ចុះក្នុងរយៈពេលប៉ុន្មានឆ្នាំចុងក្រោយនេះ ដោយសារផ្លែឈើលូតលាស់ក្នុងស្ថានភាពក្តៅ និងស្ងួត ហើយមិនអាចទប់ទល់នឹងការលិចលង់ក្នុងទឹកបានទេ។

ការិយាល័យស្ថិតិទូទៅរបស់ប្រទេសវៀតណាម បានឱ្យដឹងថា ទឹកជំនន់បានបណ្តាលឱ្យមានការខូចខាតប្រហែល៨៥ លានដុល្លារក្នុងរយៈពេល៧ខែដំបូងនៃឆ្នាំ២០២៤ ពោលគឺកើនឡើងទ្វេដងកាលពីឆ្នាំមុន។ លើសពីនេះមនុស្ស៩១នាក់បានស្លាប់ ឬរាយការណ៍ថាបាត់ខ្លួនដោយសារតែទឹកជំនន់ក្នុងអំឡុងពេលនោះ។

គួរបញ្ជាក់ថា មិនត្រឹមតែប្រទេសវៀតណាមដែលរងផលប៉ះពាល់ពីទឹកជំនន់នោះទេ ប្រទេសជិតខាងដូចជាប្រទេសថៃនៅពេលនេះក៏កំពុងជួបប្រទះនូវគ្រោះទឹកជំនន់ធ្ងន់ធ្ងរផងដែរ ខណៈនៅប្រទេសឥណ្ឌាមនុស្សរហូតដល់ទៅ៣៦បានបាត់បង់ជីវិត និងជម្លៀសមនុស្សទៅកាន់តំបន់សុវត្ថិភាពដើម្បីគេចចេញពីទឹកជំនន់៕