អ៊ុយក្រែន ផ្ទុះជម្លោះផ្ទៃក្នុង ឈានដល់បណ្តេញមេទ័ពអាកាស ក្រោយ F-16 ធ្លាក់

BBC បានចុះផ្សាយនៅថ្ងៃសៅរ៍ទី៣១ខែសីហាឆ្នាំ២០២៤ថា ប្រធានាធិបតីអ៊ុយក្រែន Vladimir Zelensky បានបណ្តេញមេទ័ពអាកាស Nikolay Oleshchuk ចេញពីតំណែង ហើយរដ្ឋាភិបាលទីក្រុងកៀវក៏កើតជម្លោះផ្ទៃក្នុងផងដែរ បន្ទាប់ពីហេតុការណ៍ធ្លាក់យន្តហោះចម្បាំង F-16។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍ យន្តហោះដែលផ្តល់ដោយអាមេរិកមួយគ្រឿង បានធ្លាក់កាលពីថ្ងៃចន្ទ ដោយសម្លាប់ទាំងពីឡុតឈ្មោះ Aleksey ‘Moonfish’ Mes ផងដែរ ប៉ុន្តែទីក្រុងកៀវ បានលាក់ព័ត៌មាននេះរហូតដល់ថ្ងៃព្រហស្បតិ៍ទើបទម្លាយ។

មេដឹកនាំអ៊ុយក្រែន មិនប្រាប់ហេតុផលជុំវិញការបណ្តេញនេះទេ ប៉ុន្តែបច្ចុប្បន្ន មានការជជែកគ្នាបែកផ្សែងក្នុងជួររដ្ឋាភិបាលលោក Zelensky ដោយអ្នកនយោបាយម្នាក់ឈ្មោះ Mariana Bezuhla នៅក្នុងគណៈកម្មការការពារសភា បានចេញមុខអះអាងថា យន្តហោះ F-16 នោះ គឺត្រូវបានបាញ់ទម្លាក់ដោយប្រព័ន្ធការពារអាកាស Patriot របស់អ៊ុយក្រែនខ្លួនឯង។

ការចោទប្រកាន់បែបនេះហើយ ទើបឈានដល់ការឈ្លោះប្រកែកគ្នា ដល់ថ្នាក់លោក Oleshchuk ស្តីបន្ទោសចំៗថា លោកស្រី Bezuhla មើលងាយមើលថោកថ្នាក់ដឹកនាំយោធា។ ជាការឆ្លើយតបក្តៅៗ លោកស្រី Bezuhla អះអាងថា អ្នកមិនអាចយកភ្លើងខ្ចប់ក្រដាសបានឡើយ។

សូមបញ្ជាក់ថា នេះមិនមែនលើកដំបូងទេ ដែលលោក Zelensky បណ្តេញមេទ័ពចេញពីតំណែង ចាប់តាំងពីប្រទេសរុស្ស៊ី បានប្រតិបត្តិការសឹកពេញទំហឹងនៅក្នុងខែកុម្ភៈឆ្នាំ២០២២។

តួយ៉ាង នៅក្នុងខែកុម្ភៈឆ្នាំនេះ លោកបានបណ្តេញអគ្គមេបញ្ជាការនៃកងកម្លាំងប្រដាប់អាវុធគឺលោក Valerii Zaluzhnyi ហើយកាលពីខែមិថុនា លោកក៏បណ្តេញឧត្តមសេនីយ៍ឯក Yuriy Sodol ផងដែរ៕

អត្ថបទ៖ សុខ សុវណ្ណ

ចុចអាន៖ អ៊ុយក្រែន បញ្ជាក់ពីការធ្លាក់យន្តហោះចម្បាំង F-16 ទី១ ស្លាប់ទាំងពីឡុតម្នាក់