ព័ត៌មានអន្ដរជាតិ

អាមេរិក បដិសេធសំណើបញ្ជូនអ្នកជំនាញការ F-16 ទៅអ៊ុយក្រែន

បានផុស

៦ ខែ មុន

នៅ

ថ្ងៃអាទិត្យ ១ កញ្ញា ២០២៤

ដោយ

Chheang

សេតវិមានបានច្រានចោលសំណើរបស់មន្ទីរបញ្ចកោណក្នុងការបញ្ជូនអ្នកម៉ៅការពិសេសរបស់អាមេរិកទៅកាន់ប្រទេសអ៊ុយក្រែន ដើម្បីជួយធ្វើតំហែទាំយន្តហោះចម្បាំង F-16 និងសម្ភារៈយោធាលោកខាងលិចផ្សេងទៀត ក្រោមហេតុផលនៃបញ្ហាសន្តិសុខ។ នេះបើយោងតាមរបាយការណ៍មួយដែលកាសែត The Wall Street Journal (WSJ) ទទួលបានពីប្រភពមន្ត្រីអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

WSJ បានផ្សាយកាលពីថ្ងៃទី៣១ខែសីហាថា សហគមន៍ស៊ើបការណ៍សម្ងាត់អាមេរិក បានចាត់ទុកផែនការនេះថា ប្រថុយប្រថានពេក ព្រោះរុស្ស៊ីអាច «កំណត់គោលដៅអ្នកម៉ៅការអាមេរិកនៅអ៊ុយក្រែន»។ ផ្ទុយទៅវិញ មន្ត្រីអាមេរិកសង្ឃឹមថា ទំនួលខុសត្រូវសម្រាប់សេវាកម្មយន្តហោះ F-16 នឹងត្រូវបានទទួលយកដោយបណ្ដាប្រទេសអឺរ៉ុប។

កាលពីចុងខែកក្កដា អ៊ុយក្រែនបានទទួលយន្តហោះចម្បាំង F-16 ចំនួន ៦គ្រឿងក្នុងចំណោម ៨០គ្រឿង ដែលសម្ព័ន្ធមិត្តរបស់ខ្លួនសន្យាថានឹងផ្ដល់ឲ្យ ប៉ុន្តែការទទួលយកយន្តហោះចម្បាំងនេះពុំមានវត្តមានរបស់អ្នកបច្ចេកទេសស៊ីវិលមកជាមួយនោះទេ។

យោធាអ៊ុយក្រែន បាននិយាយថា កាលពីថ្ងៃទី២៦ខែសីហា យន្តហោះ F-16 ១គ្រឿងរបស់ខ្លួន បានធ្លាក់ ហើយក្នុងនោះក៏មានអ្នកបើកយន្តហោះម្នាក់បានស្លាប់។ បន្ទាប់ពីការធ្លាក់ រដ្ឋាភិបាលទីក្រុងកៀវបានកើតជម្លោះផ្ទៃក្នុង ហើយប្រធានាធិបតីអ៊ុយក្រែន លោក Vladimir Zelensky បានបណ្តេញមេទ័ពអាកាស លោក Nikolay Oleshchuk ចេញពីតំណែង៕

ដោយ៖ ឈាង

ចុចអាន៖ អ៊ុយក្រែន ផ្ទុះជម្លោះផ្ទៃក្នុង ឈានដល់បណ្តេញមេទ័ពអាកាស ក្រោយ F-16 ធ្លាក់