ព័ត៌មានអន្ដរជាតិ

អ៊ីស្រាអែល រងការចោទប្រកាន់ថាទិញពាណិជ្ជកម្មលើ Google ដើម្បីបង្ខូចឈ្មោះស្ថាប័ន UN

បានផុស

៦ ខែ មុន

នៅ

ថ្ងៃអាទិត្យ ១ កញ្ញា ២០២៤

ដោយ

Chheang

រដ្ឋាភិបាលអ៊ីស្រាអែល ត្រូវបានចោទប្រកាន់ពីរឿងទិញការផ្សាយពាណិជ្ជកម្មនៅលើ Google ដើម្បីបង្ខូចកិត្តិយសទីភ្នាក់ងារជំនួយ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីននៅតំបន់ជិតបូព៌ា (UNRWA) និងរារាំងដល់ការបរិច្ចាគជំនួយ។ នេះបើយោងតាមសេចក្តីថ្លែងការណ៍របស់ UNRWA កាលពីថ្ងៃទី៣១ខែសីហា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Philippe Lazzarini ប្រធាន UNRWA បានប្រកាសនៅលើបណ្ដាញសង្គម X ដើម្បីបរិហារអំពីអ្វីដែលលោកបានពិពណ៌នាថាជា «យុទ្ធនាការព័ត៌មានមិនពិត» ធ្វើឡើងដោយអ៊ីស្រាអែល ចំពេលមានជម្លោះដែលកំពុងបន្តនៅក្នុងតំបន់ហ្គាហ្សា។ លោក Lazzarini បាននិយាយថា «ការផ្សព្វផ្សាយព័ត៌មានមិនពិត និងព័ត៌មានខុស នៅតែបន្តត្រូវបានប្រើប្រាស់ធ្វើជាអាវុធក្នុងសង្គ្រាមតំបន់ហ្គាហ្សា»។

លោកបានចោទប្រកាន់រដ្ឋាភិបាលអ៊ីស្រាអែលថាបានទិញការផ្សាយពាណិជ្ជកម្មរបស់ Google ដើម្បីរារាំងអ្នកប្រើប្រាស់ពីការផ្ដល់ជំនួយដល់ UNRWA និងដើម្បីអនុវត្តយុទ្ធនាការបរិហារកេរ្តិ៍ប្រឆាំងនឹងស្ថាប័នអង្គការសហប្រជាជាតិ។ លោក Lazzarini បានកត់សម្គាល់ថា៖ «UNRWA គឺជាអង្គការមនុស្សធម៌ដ៏ធំបំផុតដែលឆ្លើយតបទៅនឹងវិបត្តិនៅហ្គាហ្សា» ដោយសង្កត់ធ្ងន់ថា យុទ្ធនាការនេះមិនត្រឹមតែធ្វើឲ្យខូចកេរ្តិ៍ឈ្មោះរបស់ទីភ្នាក់ងារប៉ុណ្ណោះទេ ថែមទាំងបង្កគ្រោះថ្នាក់ដល់អាយុជីវិតក្រុមការងាររបស់ខ្លួនផងដែរ។

លោក Lazzarini បានអំពាវនាវឲ្យបញ្ចប់ «ទង្វើដោយចេតនា» ក្នុងការផ្សព្វផ្សាយព័ត៌មានមិនពិត និងបានជំរុញឲ្យមានការស៊ើបអង្កេតលើបញ្ហានេះ។ លោកក៏បានរិះគន់ក្រុមហ៊ុនជាច្រើន រួមទាំងបណ្ដាញសង្គមផងដែរ សម្រាប់ការទទួលយកផលចំណេញពីការផ្សព្វផ្សាយព័ត៌មានមិនពិត ដោយមិនបានចាត់វិធានការរឹងមាំ ដើម្បីប្រយុទ្ធប្រឆាំងនឹងសកម្មភាពទាំងនោះ។

អ៊ីស្រាអែល បានជំរុញជាយូរមកហើយនូវការបិទ UNRWA ដែលជាទីភ្នាក់ងារអង្គការសហប្រជាជាតិតែមួយគត់ ដែលមានកាតព្វកិច្ចជាពិសេស ក្នុងការដោះស្រាយតម្រូវការមូលដ្ឋានរបស់ជនភៀសខ្លួនប៉ាឡេស្ទីន។ UNRWA ត្រូវបានបង្កើតឡើងដោយសេចក្ដីសម្រេចរបស់អង្គការសហប្រជាជាតិក្នុងឆ្នាំ១៩៤៩ សម្រាប់ផ្តល់ជំនួយ និងការការពារដល់ជនភៀសខ្លួននៅហ្ស៊កដានី ស៊ីរី លីបង់ តំបន់ West Bank និងតំបន់ហ្គាហ្សាស្ទ្រីប៕

ដោយ៖ ឈាង