ព័ត៌មានអន្ដរជាតិ

ហ្វីលីពីន បិទសាលារៀន ផ្អាកជើងហោះហើរ ព្រោះតែខ្យល់ព្យុះ

បានផុស

៤ ខែ មុន

នៅ

ថ្ងៃចន្ទ ២ កញ្ញា ២០២៤

ដោយ

Chheang

ប្រទេសហ្វីលីពីន បានបិទសាលារៀននៅក្នុងរដ្ឋធានីម៉ានីល នៅថ្ងៃទី២ខែកញ្ញានេះ ហើយបានលុបចោលជើងហោះហើរមួយចំនួន ដោយសារតែភ្លៀងធ្លាក់ខ្លាំងដែលបង្កឡើងដោយព្យុះ Yagi និងការកើនឡើងនៃឥទ្ធពិលខ្យល់មូសុងនិរតី។

ព្យុះនៅខេត្ត Leyte ប្រទេសហ្វីលីពីន កាលពីឆ្នាំ២០២២/ រូបតំណាង (រូបថត៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លេខាធិការប្រតិបត្តិរបស់ប្រធានាធិបតីហ្វីលីពីន លោក Lucas Bersamin បានប្រកាសផ្អាកថ្នាក់រៀនទាំងនៅសាលារដ្ឋ និងឯកជនទាំងអស់នៅក្នុងរដ្ឋធានី។ ចំណែកអាជ្ញាធរអាកាសយានដ្ឋានអន្តរជាតិម៉ានីល បាននិយាយថា ជើងហោះហើរក្នុងស្រុកមួយចំនួនរបស់ក្រុមហ៊ុនអាកាសចរណ៍ Philippine Airlines និងក្រុមហ៊ុន Cebu Air ក៏ត្រូវបានលុបចោលផងដែរដោយសារតែកត្តាអាកាសធាតុមិនអំណោយផល។

យោងតាមទីភ្នាក់ងារឧតុនិយម និងជលសាស្ត្រហ្វីលីពីន PAGASA ព្យុះដែលមានឈ្មោះថា Enteng នៅក្នុងភាសាហ្វីលីពីន មានកម្លាំងខ្យល់ចន្លោះពី ៧៥គីឡូម៉ែត្រក្នុង១ម៉ោង ទៅដល់ ៩០គីឡូម៉ែត្រក្នុង១ម៉ោង។ ព្យុះនេះអាចបោកបក់លើខេត្ត Isabela ឬខេត្ត Cagayan ភាគខាងជើងកោះ Luzon នៅរសៀល ឬយប់ថ្ងៃទី២ខែកញ្ញា។

ភ្នាក់ងារ PAGASA បានព្យាករថានឹងអាចកើតមានទឹកជំនន់ និងបំណាក់ដីផងដែរ។

កាលពីសប្តាហ៍មុន រដ្ឋាភិបាលហ្វីលីពីនបានផ្អាកថ្នាក់រៀន និងលុបចោលជើងហោះហើរ ដោយសារភ្លៀងធ្លាក់ខ្លាំងបានជន់លិចរដ្ឋធានីម៉ានីល និងតំបន់ក្បែរនោះ។

ជារៀងរាល់ឆ្នាំ ព្យុះស៊ីក្លូនប្រហែល២០ បានឆ្លងកាត់ហ្វីលីពីន ដែលជាប្រទេសងាយទទួលរងគ្រោះមហន្តរាយធម្មជាតិ៕

ដោយ៖ ឈាង