អាមេរិក រឹបអូសយកយន្តហោះតម្លៃ១៣លានដុល្លារ របស់ប្រធានាធិបតីវ៉េណេស៊ុយអេឡា

តាមការចុះផ្សាយរបស់ CNN នៅថ្ងៃអង្គារទី៣ខែកញ្ញាឆ្នាំ២០២៤, រដ្ឋាភិបាលសហរដ្ឋអាមេរិក បានរឹបអូសយកយន្តហោះមួយគ្រឿងរបស់ប្រធានាធិបតីវ៉េណេស៊ុយអេឡា Nicolas Maduro ដោយអះអាងថា យន្តហោះគឺទិញទាំងបំពានលើការដាក់ទណ្ឌកម្មរបស់ទីក្រុងវ៉ាស៊ីនតោន ខណៈរដ្ឋបាលលោក ចូ បៃដិន ចោទលោក Maduro ពីបទជួញដូរគ្រឿងញៀន ហើយមិនទទួលស្គាល់ជ័យជម្នះរបស់គាត់ ក្នុងការបោះឆ្នោតប្រធានាធិបតីប្រទេសវ៉េណេស៊ុយអេឡា ចំនួនពីរលើកចុងក្រោយឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីអាមេរិកប្រាប់ទៅ CNN ថា «ការ​រឹបអូសយក​យន្តហោះ​របស់​ប្រមុខ​រដ្ឋ​បរទេសបែបនេះ គឺពាក់ព័ន្ធនឹង​រឿង​ព្រហ្មទណ្ឌ។ នៅទីនេះ យើងកំពុងផ្ញើសារយ៉ាងច្បាស់ថា គ្មាននរណានៅពីលើច្បាប់ទេ ហើយក៏គ្មាននរណាអាចរំលោភទណ្ឌកម្មរបស់សហរដ្ឋអាមេរិកបានដែរ»។

យន្តហោះនេះមានឈ្មោះ Dassault Falcon 900EX ផលិតដោយក្រុមហ៊ុនបារាំង មួយគ្រឿងតម្លៃប្រហែល ១៣លានដុល្លារ ហើយលោក Maduro ធ្លាប់ជិះទៅប្រទេសជាច្រើន។ អាមេរិករឹបអូសយន្តហោះនេះ ខណៈដែលវាត្រូវយកទៅសាធារណរដ្ឋដូមីនិក ដើម្បីធ្វើការថែទាំ ហើយក្រោយការរឹបអូស អាមេរិកក៏ផ្ទេរយន្តហោះនេះទៅកាន់រដ្ឋហ្ល្វរីដា។

យ៉ាងណា វ៉េណេស៊ុយអេឡាប្រតិកម្មខ្លាំងៗចំពោះរឿងនេះ ដោយនិយាយថា ទង្វើរបស់អាមេរិក ប្រៀបដូចជាចោរអ៊ីចឹងខណៈ រដ្ឋមន្ត្រីការបរទេសវេណេស៊ុយអេឡាលោក Yván Gil សង្កត់ធ្ងន់ថា សហរដ្ឋអាមេរិកតែងប្រើវិធានការបង្ខិតបង្ខំ ដែលពួកគេដាក់ជាឯកតោភាគីនិងខុសច្បាប់នៅជុំវិញពិភពលោក។

ទន្ទឹមនោះ នៅក្នុងសេចក្តីថ្លែងការណ៍មួយ រដ្ឋាភិបាលវេណេស៊ុយអេឡាបញ្ជាក់ថា ខ្លួនសូមរក្សាសិទ្ធិក្នុងការចាត់វិធានការផ្លូវច្បាប់ទាំងអស់ ដើម្បីប៉ះប៉ូវការខូចខាតនេះដល់ប្រទេសជាតិ។

នេះ​ជា​យន្តហោះ​ទី​ពីរ​របស់វេណេស៊ុយអេឡា​ ដែល​អាមេរិករឹបអូសយក​ក្នុង​ឆ្នាំ​នេះ។ ដោយឡែកកាលពីខែកុម្ភៈ អាហ្សង់ទីនបានបញ្ជូនយន្តហោះដឹកទំនិញ Boeing 747-300M ដែលរឹបអូសនៅឆ្នាំ២០២២មួយគ្រឿងឲ្យអាមេរិក ពាក់ព័ន្ធការចោទប្រកាន់ថា ទីក្រុង ការ៉ាកាស បានទិញពីក្រុមហ៊ុនអ៊ីរ៉ង់ដែលជាប់ទណ្ឌកម្ម។

មិនត្រឹមប៉ុណ្ណឹង រដ្ឋាភិបាលទី​ក្រុង​វ៉ាស៊ីនតោន​ ក៏បាន​រឹបអូស​គណនី​ធនាគារ និង​ទ្រព្យសកម្ម​របស់​វេណេស៊ុយអេឡា ​មាន​តម្លៃ ២ ពាន់​លាន​ដុល្លារ​ក្នុង​រយៈពេល​ប៉ុន្មាន​ឆ្នាំ​ថ្មីៗ​នេះផងដែរ៕

អត្ថបទ៖ សុខ សុវណ្ណ

ចុចអាន៖ អាមេរិក បដិសេធបាន​ផ្ដល់​ការ​លើកលែង​ទោស​ឲ្យ​លោក ម៉ាឌូរ៉ូ ដោយ​សម្ងាត់​