ពលករថៃជិត២ម៉ឺននាក់នៅម៉ាឡេស៊ី វិលត្រឡប់មកផ្ទះវិញដោយសារវិបត្តិកូវីដ

យោងតាមអគ្គកុងស៊ុលថៃប្រចាំទីក្រុង Kota Bharu នៃប្រទេសម៉ាឡេស៊ីលោក Mongkol Sinsomboon បានឲ្យដឹងថា ពលករថៃប្រហែល១៩,០០០នាក់នៅប្រទេសម៉ាឡេស៊ី បានវិលត្រឡប់ទៅផ្ទះវិញ ដោយសារផលប៉ះពាល់សេដ្ឋកិច្ចបង្កឡើងដោយជំងឺរាតត្បាតកូវីដ១៩និងប្រាក់រីងហ្គីតរបស់ប្រទេសម៉ាឡេស៊ី ខណៈមនុស្ស៣០,០០០នាក់ផ្សេងទៀត បន្តស្នាក់នៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Mongkol និយាយថា តួលេខបានបង្ហាញថា ពលករថៃចំនួន៣៨,៤៨៧នាក់ បានធ្វើការស្របច្បាប់នៅក្នុងប្រទេសម៉ាឡេស៊ីនិង ៣០,០០០នាក់ផ្សេងទៀតកំពុងធ្វើការខុសច្បាប់នៅក្នុងប្រទេសជិតខាងមួយនេះ។

លោកបន្តថា ពលករចំណាកស្រុកថៃទាំង២ក្រុមនេះ បានផ្ញើប្រាក់មកផ្ទះវិញប្រហែល៤០០លានបាតក្នុងមួយខែ។ 

ប៉ុន្តែរលកថ្មីនៃជំងឺកូវីដ១៩នៅដើមឆ្នាំនេះដែលក៏វាយប្រហារយ៉ាងខ្លាំងដល់ប្រទេសម៉ាឡេស៊ីផងដែរ បានជំរុញឲ្យរដ្ឋាភិបាលម៉ាឡេស៊ីអំពាវនាវឲ្យដាក់ប្រទេសក្នុងគ្រាអាសន្ន និងបណ្តាលឲ្យពលករថៃជាច្រើននាក់គ្មានការងារធ្វើ។

យោងតាមតួលេខការងាររបស់ប្រទេសម៉ាឡេស៊ីបានបង្ហាញថា ប្រទេសម៉ាឡេស៊ីបានជួលជនជាតិមីយ៉ាន់ម៉ា១២៥,៧៩៥នាក់ ជនជាតិឥណ្ឌា១១៧,៧៣៣នាក់ ជនជាតិបង់ក្លាដែស៥៦៨,៩២៩នាក់ ជនជាតិនេប៉ាល់៣១៦,១០២នាក់ ជនជាតិឥណ្ឌូនេស៊ី៧០៤,១៧៥នាក់និងជនជាតិថៃ៣៨,៤៨៧នាក់ មុនពេលមានជំងឺរាតត្បាតផ្ទុះឡើង៕

ប្រែសម្រួលដោយ៖ Vann Vann

ប្រភព៖ Bangkok Post

ចុចអាន៖ ក្រសួង​សុខាភិបាល​ផ្អាក​ការ​ចាក់​វ៉ាក់សាំង AstraZeneca​ ជូន​ពលរដ្ឋ​អាយុ៦០ឆ្នាំ​បណ្តោះអាសន្ន​ ដើម្បី​សម្រួល​មក​ចាក់​តាម​ថ្ងៃ​វិញ

ចុចអាន៖ មកលេង​ផ្ទះ​២​ថ្ងៃ​នៅ​តាកែវ ត្រឡប់​ទៅ​កំពង់សោម​វិញ ធ្វើតេស្ត​ឃើញ​វិជ្ជមាន​កូ​វីដ​-១៩