ណាសា ព្រមានពីអាចម៍ផ្កាយធំមួយ ដែលហោះមកកៀកផែនដីនៅ ថ្ងៃទី១៥នេះ

នាពេលថ្មីៗនេះ អង្គការណាសា បានចេញការព្រមានអំពីអាចម៍ផ្កាយដ៏ធំមួយ ដែលកំពុងហោះមកកៀកផែនដី ក្នុងល្បឿនគួរឲ្យបារម្ភ ហើយត្បិតតែវាមិនបុកពិភពលោកក៏ពិតមែន ប៉ុន្តែវាអាចបង្កផលប៉ះពាល់ខ្លះដល់ផ្កាយរណបនៅលំហអាកាស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ណាសា ប្រកាសថា អាចម៍ផ្កាយនេះនឹងចូលជិតផែនដីបំផុតនៅថ្ងៃទី១៥ខែកញ្ញា ជាមួយចម្ងាយ ៩៩៧ ៧៩៣គីឡូម៉ែត្រពីផែនដី ហើយតាមការចុះផ្សាយរបស់ Times of India កាលពីថ្ងៃចន្ទទី២ខែកញ្ញាឆ្នាំ២០២៤, អាចម៍ផ្កាយនេះឈ្មោះ 2024 ON មានអង្កត់ផ្ចិត ២១៩ម៉ែត្រ និងកំពុងធ្វើដំណើរល្បឿន ៤០ ២៣៣គីឡូម៉ែត្រក្នុងមួយម៉ោង។

2024 ON ត្រូវបានរកឃើញដំបូងដោយកម្មវិធីសង្កេតវត្ថុជិតផែនដីរបស់អង្គការណាសា ហើយគេតាមដានអាចម៍ផ្កាយនេះជាយូរមកហើយ ព្រោះថាវាក៏អាចជះឥទ្ធិពលដល់ភពផែនដីផងដែរ ដោយសារតែចម្ងាយដ៏ជិតរបស់វា។

ការព្រមាននេះកើតឡើងបន្ទាប់ពី ណាសា ប្រកាសរកឃើញអាចម៌ផ្កាយចំនួន៥ ហោះកៀកភពផែនដី ចាប់ពីថ្ងៃទី២៧ខែសីហាដល់ថ្ងៃទី១ខែកញ្ញា។

អាចម៌ផ្កាយទាំង៥មានឈ្មោះថា 2020 RL, 2021 RA10, 2012 SX49, 2016 RJ20 និង 2021 JT ហើយដំណើរឆ្លងកាត់របស់វា ជាឱកាសឲ្យក្រុមអ្នកវិទ្យាសាស្រ្ត ណាសា សិក្សាកាន់តែច្បាស់អំពីសមាសធាតុរបស់វា ខណៈការ​ពិនិត្យ​កាន់តែ​ជិត​​បែប​នេះ​ អាច​នាំឲ្យ​មាន​តម្រុយ​សំខាន់ៗ​ ឈានដល់ការយល់ដឹងអំពី​ដំណើរដើមទងរបស់​ចក្រវាលថែមទៀតផង។

មជ្ឈមណ្ឌល Jet Propulsion Laboratory របស់ណាសា បានបញ្ជាក់យ៉ាងច្បាស់ថា អាចម៍ផ្កា​យទាំងនេះគឺជាថ្ម ទឹកកក ឬកម្ទេចកម្ទីដែលបន្សល់ពីការកកើតផែនដី កាលពីប្រហែល ៤.៦ពាន់លានឆ្នាំមុន៕

អត្ថបទ៖ សុខ សុវណ្ណ

ចុចអាន៖ ណាសា កំពុងតាមដាន អាចម៍ផ្កាយចំនួន៥ ដែលនឹងហោះកៀកផែនដី ក្នុងសប្តាហ៍នេះ