ព័ត៌មានអន្ដរជាតិ

លោក Zelenskiy ស្នើកាណាដា ជួយបញ្ចុះបញ្ចូលលោកខាងលិចឲ្យអ៊ុយក្រែនអាចវាយចូលជ្រៅនៅរុស្ស៊ី

បានផុស

៦ ខែ មុន

នៅ

ថ្ងៃពុធ ៤ កញ្ញា ២០២៤

ដោយ

Chheang

ប្រធានាធិបតីប្រទេសអ៊ុយក្រែន លោក Volodymyr Zelenskiy បាននិយាយកាលពីថ្ងៃអង្គារថា លោកបានស្នើឲ្យនាយករដ្ឋមន្ត្រីកាណាដា លោក Justin Trudeau បង្កើនការគាំទ្រក្នុងចំណោមដៃគូលោកខាងលិចរបស់អ៊ុយក្រែន ដើម្បីអនុញ្ញាតឲ្យមានការវាយប្រហារកាន់តែជ្រៅលើគោលដៅយោធាក្នុងប្រទេសរុស្ស៊ី។

នាយករដ្ឋមន្ត្រីកាណាដា លោក Justin Trudeau និងប្រធានាធិបតីប្រទេសអ៊ុយក្រែន លោក Volodymyr Zelenskiy (រូបភាព៖ Shuterstock)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Zelenskiy បានជំរុញឲ្យលោក Trudeau បញ្ចុះបញ្ចូលសម្ព័ន្ធមិត្តឲ្យផ្តល់ «ការអនុញ្ញាតដល់អ៊ុយក្រែន និងមធ្យោបាយចាំបាច់ ដើម្បីវាយប្រហារគោលដៅយោធានៅលើទឹកដីនៃប្រទេសឈ្លានពាន»។

កាណាដា ដែលជាសមាជិកអង្គការណាតូ ហើយមានជនភៀសខ្លួនអ៊ុយក្រែនច្រើនជាងគេបំផុតលើពិភពលោក បានផ្តល់ជំនួយផ្នែកយោធា និងហិរញ្ញវត្ថុដល់ទីក្រុងកៀវ ចាប់តាំងពីរុស្ស៊ីបានឈ្លានពានក្នុងខែកុម្ភៈឆ្នាំ២០២២។

យោងតាមសេចក្ដីថ្លែងការណ៍របស់ការិយាល័យរបស់នាយករដ្ឋមន្ត្រីកាណាដា លោក Trudeau បានប្រាប់លោក Zelenskiy ថា ការវាយប្រហាររបស់រុស្ស៊ី បាន«ពង្រឹងបន្ថែមទៀតនូវការរួបរួមជាសកល និងដំណោះស្រាយសម្រាប់ការគាំទ្រអ៊ុយក្រែនក្នុងការចូលរួមជាអន្តរជាតិនាពេលខាងមុខ»។

លោក Zelenskiy បានបង្ហោះសារនៅលើបណ្ដាញទំនាក់ទំនង Telegram ថា មេដឹកនាំទាំង២ក៏បានពិភាក្សាអំពីសន្និសីទមួយផងដែរ ដែលប្រទេសកាណាដានឹងត្រូវធ្វើជាម្ចាស់ផ្ទះលើប្រធានបទ «អ្នកទោស»។ សន្និសីទនេះគឺជាអ្វីដែលធ្លាប់លើកឡើងនៅក្នុងកិច្ចប្រជុំកំពូលសន្តិភាពទីក្រុងកៀវកាលពីខែមិថុនា។

ការិយាល័យរបស់លោក Trudeau បានប្រកាសថា ប្រទេសកាណាដានឹងធ្វើជាម្ចាស់ផ្ទះនៃកិច្ចប្រជុំនេះនៅកម្រិតរដ្ឋមន្ត្រីការបរទេស។

បើយោងតាមប្រភពពីរដ្ឋធានី Ottawa របស់កាណាដា កិច្ចប្រជុំនេះទំនងជានឹងធ្វើឡើងនៅក្នុងខែតុលាខាងមុខ៕

ដោយ៖ ឈាង