ព័ត៌មានអន្ដរជាតិ

ជម្លោះមីយ៉ាន់ម៉ា៖ របបយោធាបញ្ចូលក្រុមតស៊ូប្រដាប់អាវុធសំខាន់ៗជា «អង្គការភេរវករ»

បានផុស

២ សប្តាហ៍ មុន

នៅ

ថ្ងៃពុធ ៤ កញ្ញា ២០២៤

ដោយ

របបយោធាមីយ៉ាន់ម៉ាបានដាក់បញ្ចូលក្រុមប្រដាប់អាវុធជនជាតិភាគតិចធំៗចំនួនបីដែលបានរុលទៅមុខក្នុងការប្រយុទ្ធពាសពេញតំបន់ភាគខាងជើង និងភាគខាងលិចនៃប្រទេសមីយ៉ាន់ម៉ាកាលពីឆ្នាំមុនថាជាក្រុម «ភេរវករ»។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី០៤ខែកញ្ញានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការដាក់បញ្ជូលនេះត្រូវបានធ្វើឡើងនៅថ្ងៃទី២ខែកញ្ញា ហើយអនុវត្តចំពោះកងទ័ពសម្ព័ន្ធភាពប្រជាធិបតេយ្យជាតិមីយ៉ាន់ម៉ា (MNDAA) កងទ័ពរំដោះជាតិ Ta’ang (TNLA) និង កងទ័ព Arakan ខណៈនៅក្រោមច្បាប់ប្រឆាំងភេរវកម្ម សមាជិកភាពនិងការទំនាក់ទំនងជាមួយក្រុមដែលមានស្លាកថា «អង្គការភេរវករ» ត្រូវបានហាមឃាត់។

សារព័ត៌មានក្នុងស្រុកបានដកស្រង់សម្តី ឧត្តមសេនីយ Min Aung Hlaing ដែលជាប្រធានក្រុមប្រឹក្សារដ្ឋបាលរដ្ឋរបស់យោធា (SAC) បាននិយាយថា «អ្នកដែលទាក់ទងភេរវករទាំងនេះក៏កំពុងប្រព្រឹត្តអំពើភេរវកម្មដែរ»។

ក្រុមប្រដាប់អាវុធបានបង្កើតសម្ព័ន្ធភាពបងប្អូនទាំងបី ដើម្បីចាប់ផ្តើមការវាយលុកដ៏ធំមួយឆ្ពោះទៅចុងឆ្នាំមុន ដែលបានផ្តល់សន្ទុះថ្មីដល់កិច្ចខិតខំប្រឹងប្រែងដើម្បីដករបបយោធាដែលធ្វើរដ្ឋប្រហារខែកុម្ភៈឆ្នាំ២០២១។

ការវាយលុករបស់ពួកគេបានឈានទៅដល់ផ្នែកខ្លះនៃប្រទេសមីយ៉ាន់ម៉ាជាប់ព្រំដែនចិននិងថៃ ក៏ដូចជានៅភាគខាងលិចនៃតំបន់រ៉ាឃីន ជាកន្លែងដែលក្រុមស្រាវជ្រាវជម្លោះ Crisis Group ថា កងទ័ព Arakan ហាក់ដូចជាកំពុងគ្រប់គ្រងទឹកដីដែលមានប្រជាជនប្រហែលមួយលាននាក់។

ជាមួយគ្នានេះកងកម្លាំងការពារប្រជាជន (PDFs) ជនស៊ីវិលដែលបានកាន់អាវុធប្រឆាំងនឹងយោធាក៏បានរីកចម្រើនគួរឱ្យកត់សម្គាល់នៅក្នុងតំបន់ Mandalay កណ្តាល ខណៈ PDFs ត្រូវបានបង្កើតឡើងក្នុងឆ្នាំ២០២១ ដោយរដ្ឋាភិបាលរួបរួមជាតិ (NUG) នៃក្រុមអ្នកនយោបាយ និងសកម្មជនជាប់ឆ្នោត បន្ទាប់ពីយោធាបានបាញ់ប្រហារលើការតវ៉ាដ៏ធំដោយប្រើកម្លាំង។

គួររម្លឹកថា កងទ័ព Arakan ដែលយោធាចោទប្រកាន់ពីការរំលោភសិទ្ធិនោះ ត្រូវបានរដ្ឋាភិបាលរបស់លោកស្រី Aung San Suu Kyi ចាត់ទុកថា ជាអង្គការភេរវកររួចទៅហើយ។ ទោះយ៉ាងណាយោធាបានដកឈ្មោះចេញពីរខែក្រោយរដ្ឋប្រហារ បន្ទាប់ពីមានបទឈប់បាញ់ តែក្រោយមកបទឈប់បាញ់ត្រូវបានបំពាន។

គួរបញ្ជាក់ថា សមាគមជំនួយសម្រាប់អ្នកទោសនយោបាយ ដែលជាក្រុមតាមដានក្នុងស្រុក និយាយថា មនុស្សចំនួន ៥៥៩៩ នាក់ត្រូវបានសម្លាប់ចាប់តាំងពីរដ្ឋប្រហារ ខណៈដែលជាង ២ម៉ឺននាក់កំពុងត្រូវបានឃុំខ្លួននៅក្នុងពន្ធនាគារ ខណៈភាពវឹកវរនៅក្នុងប្រទេសមីយ៉ាន់ម៉ានៅមិនទាន់ធូរស្រាលនៅឡើយ រួមទាំងមិនទាន់មានការបោះឆ្នោតជ្រើសរើសរដ្ឋាភិបាលថ្មីនៅឡើយ៕