ក្រុម Boko Haram វាយប្រហារ​នៅ​នីហ្សេរីយ៉ា​បណ្តាល​ឱ្យស្លាប់​រាប់សិបនាក់​

មនុស្សរាប់សិបនាក់ត្រូវបានសម្លាប់ បន្ទាប់យុទ្ធជនមកពីក្រុម Boko Haram បានវាយប្រហារភូមិមួយនៅភាគឦសានប្រទេសនីហ្សេរីយ៉ា ដោយដុតបំផ្លាញហាង និងផ្ទះសម្បែងជាច្រើនកាលពីរសៀលថ្ងៃអាទិត្យ។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី០៤ខែកញ្ញានេះ។

លោក Dungus Abdulkarim អ្នកនាំពាក្យប៉ូលិសនៅរដ្ឋ Yobe បាននិយាយថា ជនសង្ស័យជាភេរវករមកពីក្រុម Boko Haram ប្រហែល១៥០នាក់ ប្រដាប់ដោយកាំភ្លើងវែង និង RPGs (គ្រាប់បែក)។ ពួកគេបានសម្លាប់មនុស្សជាច្រើន និងបានដុតហាង និងផ្ទះជាច្រើនក្នុងទីក្រុង Mafa ខណៈចំនួន​ពិត​ប្រាកដ​នៃ​អ្នក​ស្លាប់​ក្នុង​ការ​វាយ​ប្រហារ​នោះ​មិនទាន់ត្រូវបានដឹងនៅឡើយនោះទេ។

ការវាយប្រហារនេះគឺជាការសងសឹកចំពោះការសម្លាប់អ្នកប្រយុទ្ធ Boko Haram ដោយអ្នកត្រួតពិនិត្យក្នុងតំបន់។ ក្រុមមន្ត្រី បាននិយាយថា កិច្ចខិតខំប្រឹងប្រែងកំពុងបន្តដើម្បីបញ្ជាក់ពីចំនួនមនុស្សដែលត្រូវបានសម្លាប់នៅក្នុងទីក្រុង Mafa ខណៈយ៉ាងហោចណាស់មនុស្ស ៨១ នាក់ត្រូវបានសម្លាប់នៅក្នុងការវាយប្រហារនេះ។

សាកសពចំនួន១៥ត្រូវបានកប់រួចហើយ បន្ថែមពីលើនេះ ជនរងគ្រោះដែលបានស្លាប់មួយចំនួន ត្រូវបានសាច់ញាតិរបស់ពួកគេយកទៅបញ្ចុះនៅមុនពេលទាហានមកដល់។ មនុស្ស​ជា​ច្រើន​នៅ​តែ​បាត់​ខ្លួន ហើយ​កន្លែង​លាក់​ខ្លួន​មិន​ទាន់​ដឹងនៅឡើយ។

យោងតាមមន្ត្រីយោធាម្នាក់ដែលអមដំណើរមេបញ្ជាការកងទ័ព ទៅ Mafa កាលពីល្ងាចថ្ងៃចន្ទ បាននិយាយថា ផ្លូវទៅកាន់ភូមិនេះត្រូវបានបំពាក់ដោយគ្រឿងផ្ទុះ ខណៈកងទ័ពបានគ្រប់គ្រងដើម្បីបំផ្ទុះ។

មន្ត្រីរូបនេះបានប្រាប់ទីភ្នាក់ងារសារព័ត៌មាន៖«យើងបានរកឃើញសាកសពចំនួន៣៧នាក់​ហើយបាននាំពួកគេទៅកាន់មន្ទីរពេទ្យ Babangida General»។ ចំណែក លោក Modu Mohammed ដែលរស់នៅក្នុងទីក្រុង Mafa បាននិយាយថា អ្នកស្រុកជាច្រើននាក់ទៀតបានបាត់ខ្លួន ហើយបានប៉ាន់ប្រមាណចំនួនអ្នកស្លាប់ច្រើនជាង១០០នាក់ ខណៈសាកសពមួយចំនួននៅតែស្ថិតក្នុងព្រៃនៅឡើយ

Yobeគឺជារដ្ឋមួយក្នុងចំណោមរដ្ឋចំនួន៣ដែលមានការបះបោររយៈពេល១៥ឆ្នាំដោយក្រុម Boko Haram និងក្រុម hardline ផ្សេងទៀត ដែលបានសម្លាប់មនុស្សរាប់ម៉ឺននាក់ និងបានជម្លៀសមនុស្សជាង ២លាននាក់។ ក្រុមប្រដាប់អាវុធទាំងនេះបានពង្រឹងជំហររបស់ពួកគេដោយធ្វើការជាមួយក្រុមឧក្រិដ្ឋជនដែលជាចោរវាយឆ្មក់ភូមិ សម្លាប់ និងចាប់ពង្រត់អ្នកស្រុក និងដុតផ្ទះចោលបន្ទាប់ពីប្លន់រួច៕

អត្ថបទ៖ ប៊ុន សុភាព