កូរ៉េ​ខាង​ជើង ចាប់ផ្ដើម​បង្ហោះ​ប៉េងប៉ោង​សំរាម​ចូល​ដី​កូរ៉េ​ខាង​ត្បូង​វិញ ក្រោយ​ផ្អាក​ជិត​១​ខែ

ប្រទេសកូរ៉េខាងជើង បាន​ចាប់ផ្ដើម​ឡើង​វិញ​នូវ​ការ​បញ្ជូនប៉េងប៉ោងដែលផ្ទុកសំរាមឆ្លងកាត់ព្រំដែនកូរ៉េខាងត្បូង នៅព្រឹកថ្ងៃព្រហស្បតិ៍​នេះ ដោយបានបាញ់បង្ហោះប៉េងប៉ោង​សរុប​ប្រហែល ៤២០​ប៉េងប៉ោង។

អគ្គសេនាធិការចម្រុះកូរ៉េខាងត្បូង (JCS) បាននិយាយថា កូរ៉េខាងជើងនឹងចាប់ផ្តើមបញ្ជូនប៉េងប៉ោងសំរាមម្តងទៀតនៅថ្ងៃព្រហស្បតិ៍ ដោយចាប់ផ្តើមនៅម៉ោងប្រហែល៩ព្រឹក ហើយ​ក្នុង​នោះ​មាន​​​ប្រមាណ​ ២០​ប៉េងប៉ោង​បាន​ធ្លាក់​នៅទីក្រុងសេអ៊ូល និងខេត្ត Gyeonggi។

JCS បានបន្ថែម​ថា ប៉េងប៉ោងទាំងនោះ ភាគច្រើនផ្ទុកសំណល់ក្រដាស និងថង់ប្លាស្ទិក ហើយមិនមានសារធាតុគ្រោះថ្នាក់​ទេ ប៉ុន្តែបានព្រមានសាធារណជន​ឲ្យ​ប្រុងប្រយ័ត្ន និងកុំប៉ះពាល់។ JCS ជំរុញឲ្យ​ប្រជាជនរាយការណ៍ពីការ​រក​​ឃើញប៉េងប៉ោងណាមួយទៅកាន់អង្គភាពយោធា ឬប៉ុស្តិ៍ប៉ូលីសដែលនៅ​ក្បែរ។

នេះ​ជា​ការ​បង្ហោះ​ប៉េងប៉ោង​សំរាម​សា​ជា​ថ្មី​ម្ដង​ទៀត​របស់​រដ្ឋាភិបាល​ក្រុង​ព្យុងយ៉ាង បន្ទាប់​ពី​បាន​ផ្អាក​អស់​រយៈពេល​២៥​ថ្ងៃ​កន្លង​ទៅ។​

កូរ៉េខាងជើង​ បាន​បង្ហោះ​ប៉េងប៉ោង​​ដែល​ពោរពេញ​ទៅដោយ​កាកសំណល់​ផ្សេងៗ​ ​ឆ្លងកាត់​ព្រំដែន​ទៅកាន់​កូរ៉េខាងត្បូង​តាំងពី​ចុងខែ​ឧសភា។ ការ​បង្ហោះ​ប៉េង​ប៉ោង​នេះ ធ្វើ​ឡើង​​ដើម្បី​ជា​ការ​ឆ្លើយ​តប​ទៅនឹង​ការ​បង្ហោះ​ប៉េងប៉ោង​ដែល​មាន​ផ្ទុក​ខិត្តប័ណ្ណប្រឆាំងទីក្រុងព្យុងយ៉ាង​ដោយក្រុមអ្នករត់​គេចខ្លួន​ចេញ​ពី​​កូរ៉េ​ខាង​ជើង​មក​សុំ​សិទ្ធិ​ជ្រក​កោន​នៅ​​កូរ៉េ​ខាង​ត្បូង។

ក្រុម​សកម្មជន​កូរ៉េ​ខាង​ត្បូង ដែល​​បង្ហោះ​ប៉េងប៉ោង​​ទៅ​កូរ៉េ​ខាង​ជើង មាន​ឈ្មោះ​ថា «Free North Korea Movement» ហើយ​ពួក​គេ​​រាល់​គ្នា​សុទ្ធ​តែ​​ជា​​អ្នក​ដែល​ធ្លាប់​បាន​រត់​គេច​ខ្លួន​ចេញ​ពី​​ការ​ដឹក​នាំ​របស់​កូរ៉េ​ខាង​ជើង។ ក្រុម Free North Korea Movement ​បាន​បញ្ជូន​ប៉េងប៉ោង ចង​ភ្ជាប់​ USB ផ្ទុក​នូវ​​​​ចម្រៀង K-Pop និង​ភាពយន្ត​កូរ៉េ​ខាង​ត្បូង​ផ្សេងៗ ជា​ពិសេស​ខិត្តប័ណ្ណ​រិះគន់​របប​ដឹក​នាំ​របស់​លោក គីម ជុងអ៊ុន៕

ដោយ៖ ឈាង

ចុចអាន៖ កូរ៉េ​ខាង​ត្បូង បង្ហាញ​ពី​ចំនួន​ប៉េងប៉ោង​សំរាម​ដែល​ក្រុង​ព្យុងយ៉ាង​បង្ហោះ​ចូល​ទឹកដីខ្លួន