ព័ត៌មានអន្ដរជាតិ

អ៊ីរ៉ង់ ថ្កោលទោសអាមេរិក ក្រោយរឹបអូសយន្តហោះរបស់ប្រធានាធិបតីវ៉េណេស៊ុយអេឡា

បានផុស

៧ ខែ មុន

នៅ

ថ្ងៃព្រហស្បតិ៍ ៥ កញ្ញា ២០២៤

ដោយ

Chheang

លោក Nasser Kanaani អ្នកនាំពាក្យក្រសួងការបរទេសអ៊ីរ៉ង់ បានថ្កោលទោសការរឹបអូសយន្តហោះតម្លៃ១៣លានដុល្លាររបស់ប្រធានាធិបតីវ៉េណេស៊ុយអេឡា លោក នីកូឡាស ម៉ាឌូរ៉ូ ដោយរដ្ឋាភិបាលសហរដ្ឋអាមេរិក ហើយបានចាត់ទុកទង្វើនេះថាជាការបំពានច្បាប់អន្តរជាតិ។ នេះបើយោងតាមការចុះផ្សាយរបស់សារព័ត៌មាន Iran Front Page នៅថ្ងៃទី៥ខែកញ្ញា។

លោក Nasser Kanaani អ្នកនាំពាក្យក្រសួងការបរទេសអ៊ីរ៉ង់ (រូបភាព៖ FarsNews)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យអ៊ីរ៉ង់ បាននិយាយថា ការរឹបអូសបានធ្វើឡើងផ្ទុយទៅនឹងច្បាប់អន្តរជាតិ និងបទដ្ឋាននានា ជាពិសេសពាក់ព័ន្ធនឹងអភ័យឯកសិទ្ធិនៃទ្រព្យសម្បត្តិដែលជាកម្មសិទ្ធិរបស់រដ្ឋ និងបទប្បញ្ញត្តិនៃច្បាប់អាកាសចរណ៍ស៊ីវិលអន្តរជាតិ រួមទាំងអនុសញ្ញាទីក្រុង Chicago ផងដែរ។

លោកបានបន្ថែមថា ចំណាត់ការនេះ ដែលជាការបន្តនៃសកម្មភាពឯកតោភាគីបង្ខិតបង្ខំរបស់សហរដ្ឋអាមេរិក នឹងលើកទឹកចិត្តបន្ថែមទៀតដល់ការប្លន់យន្តហោះដោយខុសច្បាប់ និងបង្កការគំរាមកំហែងដល់សន្តិភាព និងសន្តិសុខអាកាសចរណ៍។

លោក Kanaani បានសម្តែងការគាំទ្រចំពោះកិច្ចខិតខំប្រឹងប្រែងរបស់រដ្ឋាភិបាលវ៉េណេស៊ុយអេឡា ក្នុងការដណ្តើមយន្តហោះដែលរឹបអូសបានមកវិញ ដោយជំរុញឲ្យមានការពង្រឹងកិច្ចសហប្រតិបត្តិការក្នុងចំណោមប្រទេសផ្សេងៗ ដើម្បីប្រឆាំងនឹងការដាក់ទណ្ឌកម្មរបស់សហរដ្ឋអាមេរិក និងវិធានការឯកតោភាគីផ្សេងទៀត។

ក្រសួងយុត្តិធម៌អាមេរិក បានប្រកាសកាលពីថ្ងៃច័ន្ទពីការរឹបអូសយន្តហោះដែលប្រើដោយប្រធានាធិបតីវ៉េណេស៊ុយអេឡា ដោយអះអាងថាវាត្រូវបានទិញតាមរយៈក្រុមហ៊ុនខុសច្បាប់ និងរំលោភលើទណ្ឌកម្មរបស់សហរដ្ឋអាមេរិក។

យន្តហោះ Dassault Falcon 900EX របស់លោក ម៉ាឌូរ៉ូ ត្រូវបានគេរាយការណ៍ថារឹបអូសនៅក្នុងសាធារណរដ្ឋដូមីនីក ហើយត្រូវបានផ្ទេរទៅមន្ទីរឃុំឃាំងរបស់មន្ត្រីសហព័ន្ធអាមេរិកក្នុងរដ្ឋផ្លរីដា៕